ഇനി മുട്ട് വേദന ഉള്ളവർക്കും മലകയറാം..!!; കുത്തനെയുള്ള പടവുകൾ കയറാൻ നിങ്ങളെ 'റോബോട്ട് കാലു'കൾ സഹായിക്കും; ചുമ്മാ..ഈസിയായി കയറി യുവതി; വൈറലായി വീഡിയോ
ബീജിംഗ്: സാങ്കേതിക വിദ്യയിൽ മുന്നേറുന്ന ചൈന ടൂറിസം മേഖലയിലും നൂതന പരീക്ഷണങ്ങളുമായി എത്തുന്നു. റോബോട്ടിക് എക്സോസ്‌കെലിറ്റൺ ധരിച്ച് കുത്തനെയുള്ള പടവുകൾ അനായാസം കയറുന്ന യുവതിയുടെ വീഡിയോ സമൂഹ മാധ്യമങ്ങളിൽ വൈറലായിരിക്കുകയാണ്. ഏത് കയറ്റവും അനായാസമാക്കാൻ സഹായിക്കുന്ന ഈ റോബോട്ടിക് കാലുകൾ വാടകയ്ക്ക് ലഭ്യമാണ്.
ഇൻസ്റ്റാഗ്രാമിൽ പങ്കുവെച്ച വീഡിയോയിൽ, ഒരു യുവതി റോബോട്ടിക് എക്സോസ്‌കെലിറ്റൺ ധരിച്ച് പടവുകൾ കയറുന്നത് കാണാം. "ചൈന ജീവിക്കുന്നത് 2050-ൽ. എനിക്ക് വെറും 8.50 ഡോളറിന് (ഏകദേശം 750 രൂപ) മല കയറാൻ റോബോട്ട് കാലുകൾ വാടകയ്‌ക്കെടുക്കാൻ കഴിയുമോ?" എന്ന അടിക്കുറിപ്പോടെയാണ് വ്ലോഗർ വീഡിയോ പങ്കുവെച്ചത്. ഈ എക്സോസ്‌കെലിറ്റണുകൾ ഭാരം കുറഞ്ഞതും ധരിക്കാൻ എളുപ്പവുമാണ്. മനുഷ്യരുടെ ചലനങ്ങളെ തിരിച്ചറിഞ്ഞ് പ്രവർത്തിക്കുന്ന ആർട്ടിഫിഷ്യൽ ഇൻ്റലിജൻസിൻ്റെ (AI) സഹായത്തോടെയാണ് ഇവ പ്രവർത്തിക്കുന്നത്. ഒറ്റ ചാർജിൽ മണിക്കൂറുകളോളം ഉപയോഗിക്കാം എന്നത് ഇവയുടെ പ്രധാന സവിശേഷതയാണ്.
ഈ എക്സോസ്‌കെലിറ്റണുകൾ ശാരീരികമായി ബുദ്ധിമുട്ടുള്ളവർക്ക് ഉപയോഗിക്കാൻ സാധിക്കില്ലെന്ന് യുവതി വിശദീകരിച്ചു. കാരണം, കാലുകൾ സ്വയം ചലിപ്പിച്ചാൽ മാത്രമേ ഇവ പ്രവർത്തിക്കുകയുള്ളൂ. ശരീരത്തിൻ്റെ ചലനങ്ങളെ സഹായിക്കുക മാത്രമാണ് ഉപകരണം ചെയ്യുന്നത്. നടക്കാൻ കഴിയുന്നവർക്ക് ഇത് സഹായകരമാണെങ്കിലും ഭിന്നശേഷിയുള്ളവരെ സഹായിക്കാൻ ഇവയ്ക്ക് കഴിയില്ലെന്ന് യുവതി കൂട്ടിച്ചേർത്തു.
റോബോട്ടിക് കാലുകളുടെ ഭാരത്തെക്കുറിച്ച് സംസാരിക്കവെ, ബാറ്ററി പാക്കിന് അൽപ്പം ഭാരമുണ്ടെങ്കിലും ഓൺ ചെയ്യുമ്പോൾ ഭാരം ഗണ്യമായി കുറയുമെന്ന് യുവതി പറഞ്ഞു. ഒരു ബാക്ക്പാക്ക് ചുമക്കുന്നതിനോടാണ് ഭാരത്തെ ഉപമിച്ചത്. റോബോട്ടിക് കാലുകൾ ഉപയോഗിച്ചപ്പോൾ സാധാരണ അനുഭവപ്പെടുന്ന ക്ഷീണം ഉണ്ടായില്ലെന്നും അവർ വ്യക്തമാക്കി. വീഡിയോ വൈറലായതോടെ നിരവധി പേർ ഇതിനെക്കുറിച്ച് കമന്റ് ചെയ്യുകയും ചർച്ചകളിൽ പങ്കുചേരുകയും ചെയ്തു. ഇത് ടൂറിസം രംഗത്തും കായിക രംഗത്തും വൻ മുന്നേറ്റങ്ങൾക്ക് വഴിതുറക്കുമെന്നാണ് പ്രതീക്ഷിക്കുന്നത്.
