ഇപ്പൊ...ഇൻസ്റ്റ തുറന്നാൽ കാണുന്നത് മുഴുവൻ 'ഹസ്കി' മയം; തമിഴ് ഗാനത്തിന്റെ ചെറിയൊരു പോർഷനിടയിൽ ചെക്കന്റെ തീ..പെർഫോമൻസ്; സോഷ്യൽ മീഡിയ തൂക്കിയ ആ 'എഐ' വീഡിയോയുടെ പിന്നിലാര്?

നിലവിൽ സോഷ്യൽ മീഡിയയിൽ വലിയ തരംഗം സൃഷ്ടിച്ചിരിക്കുകയാണ് ഒരു 'ഹസ്കി നായ'യുടെ നൃത്തം ചെയ്യുന്ന വീഡിയോ. ആർട്ടിഫിഷ്യൽ ഇൻ്റലിജൻസ് (AI) ഉപയോഗിച്ച് എഡിറ്റ് ചെയ്ത ഈ ദൃശ്യം ചുരുങ്ങിയ സമയം കൊണ്ട് ലക്ഷക്കണക്കിന് കാഴ്ചക്കാരെ നേടിക്കഴിഞ്ഞു. കേരളത്തിലെ മിൽമ പോലുള്ള പ്രമുഖ ബ്രാൻഡുകളും ഈ ട്രെൻഡിനെ ഏറ്റെടുത്തിട്ടുണ്ട്.

ഈ ട്രെൻഡിൻ്റെ തുടക്കം പഴയ നോർത്ത് ഇന്ത്യൻ ടിക്ക് ടോക്ക് വീഡിയോകളെ ഓർമ്മിപ്പിക്കുന്ന തരത്തിലുള്ള ചില ഇൻസ്റ്റഗ്രാം പേജുകളിൽ നിന്നാണ്. പഴയ ടിക്ക് ടോക്ക് വീഡിയോകളെ പരിഹസിച്ചുകൊണ്ട് ആരംഭിച്ച ഈ ശ്രമങ്ങൾ പിന്നീട് ഒരു അത്ഭുതകരമായ മാറ്റത്തിന് സാക്ഷ്യം വഹിച്ചു. പ്രശസ്തമായ തമിഴ് ചിത്രം 'വെടി'യിലെ 'ഇച്ച് ഇച്ച്' എന്ന ഗാനത്തിൻ്റെ പശ്ചാത്തലത്തിലാണ് നൃത്തം ചെയ്യുന്ന ഹസ്കിയുടെ വീഡിയോ പ്രചരിക്കുന്നത്.

ഇതുവരെ ഇത്തരം ട്രോൾ വീഡിയോകൾക്ക് പിന്നിൽ ആരാണെന്ന് വ്യക്തമല്ല. എന്നാൽ, "ഡാൻസിങ് ഹസ്കി" എന്ന ഈ ട്രെൻഡ് സോഷ്യൽ മീഡിയയിൽ കൂടുതൽകാലം നിലനിൽക്കുമെന്നാണ് പ്രതീക്ഷിക്കുന്നത്. ഇതിനോടകം തന്നെ തമിഴ്, തെലുങ്ക്, മലയാളം ഭാഷകളിലുള്ള നിരവധി പേജുകൾ ഈ ട്രെൻഡ് ഏറ്റെടുത്ത് പുതിയ വീഡിയോകൾ പുറത്തിറക്കിയിട്ടുണ്ട്.

ഹസ്കി എന്നറിയപ്പെടുന്ന ഈ നായ വർഗ്ഗം, വടക്കൻ സൈബീരിയയിൽ നിന്നുള്ള ഇടത്തരം വലുപ്പമുള്ളവയാണ്. ഇവ പ്രധാനമായും സ്ലെഡ് വലിക്കാനും മറ്റുമാണ് ഉപയോഗിക്കുന്നത്. ചെന്നായയുടെ രൂപസൗന്ദര്യവും ശക്തമായ ശരീരഘടനയും തണുത്ത കാലാവസ്ഥയെ അതിജീവിക്കാനുള്ള കഴിവും ഇവയെ സവിശേഷമാക്കുന്നു. കൂടാതെ, നീലയോ തവിട്ടുനിറമോ അല്ലെങ്കിൽ ഇവയുടെ മിശ്രിതമോ ആയ കണ്ണുകൾ ഹസ്കിയുടെ പ്രധാന പ്രത്യേകതകളിലൊന്നാണ്. ഇവ ബുദ്ധിശക്തിയും കായികക്ഷമതയും ഉള്ള ഇനമാണ്.

പ്രേക്ഷകർ ആകാംഷയോടെ കാത്തിരിക്കുന്ന ഒരു കാര്യം, ഈ ട്രെൻഡിൻ്റെ തുടർച്ചയായി പുതിയ ഡാൻസിങ് ഹസ്കി വീഡിയോകൾ ഉണ്ടാകുമോ എന്നതാണ്. ഈ ആവേശകരമായ ട്രെൻഡ് എങ്ങനെ മുന്നോട്ട് പോകുമെന്നത് ഉറ്റുനോക്കുകയാണ് സോഷ്യൽ മീഡിയ ലോകം.