ഏഴാം ക്ലാസ് വിദ്യാർത്ഥിനി ഷംനയെ കൊലപ്പെടുത്തിയത് കഴുത്തു ഞെരിച്ചു ശ്വാസംമുട്ടിച്ച്; അമ്മ ലൈജീനയുടെ അറസ്റ്റ് രേഖപ്പെടുത്തി മൊഴിയെടുക്കും; അറസ്റ്റ്, മാനസികാരോഗ്യ വിദഗ്ധരുടെ സഹായം തേടിയ ശേഷം

മുണ്ടക്കയം: മുണ്ടക്കയം സെന്റ് ജോസഫ്‌സ് സെൻട്രൽ സ്‌കൂളിലെ ഏഴാം ക്ലാസ് വിദ്യാർത്ഥിനി ഷംന കഴുത്തു ഞെരിച്ചു ശ്വാസംമുട്ടിയാണ് മരിച്ചതെന്നു പോസ്റ്റ്‌മോർട്ടത്തിലെ പ്രാഥമിക റിപ്പോർട്ട്. കിണറ്റിൽ ചാടി ആത്മഹത്യയ്ക്കു ശ്രമിച്ച മാതാവ് ലൈജീനയെ ഇന്ന് അറസ്റ്റ് ചെയ്യും.

ഷംനയെ കൊലപ്പെടുത്തിയ ശേഷം അമ്മ ജീവനൊടുക്കാൻ ശ്രമിച്ചതാണെന്ന സൂചനകൾ ശരിവയ്ക്കുകയാണു പൊലീസ്. വിദേശത്ത് ജോലി ചെയ്യുന്ന പിതാവ് കണ്ടത്തിൽ ഷെമീർ എത്തിയതോടെ ഷംനയുടെ കബറടക്കം നടത്തി.

ആത്മഹത്യയ്ക്കു ശ്രമിച്ച ലൈജീന ചികിത്സയിൽ കഴിയുന്ന മെഡിക്കൽ കോളജിൽ തന്നെയാണ് ഷംനയുടെ പോസ്റ്റ്‌മോർട്ടം നടത്തിയത്. മകളെ കാണണം എന്നാവശ്യപ്പെട്ടു ലൈജീന ബഹളം വച്ചതായി പൊലീസ് പറയുന്നു. മാനസികാരോഗ്യ വിദഗ്ധരുടെ സഹായം തേടിയ ശേഷം ഇന്ന് അറസ്റ്റ് രേഖപ്പെടുത്തി മൊഴിയെടുക്കുമെന്നു കാഞ്ഞിരപ്പള്ളി ഡിവൈഎസ്‌പി എൻ.സി.രാജ്‌മോഹൻ പറഞ്ഞു.

ഭാര്യയും മകളും ആത്മഹത്യയ്ക്ക് ശ്രമിച്ചു എന്നു മാത്രമാണ് വിദേശത്തുള്ള ഷെമീറിനെ അറിയിച്ചത്. പുലർച്ചെ വീട്ടിൽ എത്തിയ ശേഷമാണ് സംഭവങ്ങൾ അറിയുന്നത്. വീട് പൊലീസ് സീൽ ചെയ്തിരിക്കുന്നതിനാൽ വീട്ടിലേക്ക് കയറുന്ന വഴിയരികിൽ ആംബുലൻസ് നിർത്തിയിട്ടാണ് മൃതദേഹം ബന്ധുക്കൾക്കും നാട്ടുകാർക്കും കാണാൻ അവസരം ഒരുക്കിയത്.

'മകൾക്കു മരിക്കാൻ പേടി ആയിരുന്നു, എങ്കിലും ഞങ്ങൾ മരിക്കുകയാണ് ' എന്ന് നാല് പുറത്തിൽ ലൈജീന എഴുതിയതെന്നു കരുതുന്ന ആത്മഹത്യാ കുറിപ്പ് വീട്ടിൽ നിന്നു ലഭിച്ചിരുന്നു. കബറടക്കം ഉൾപ്പെടെ നന്നായി നടത്തണം എന്ന് എഴുതിയിരുന്ന കുറിപ്പിൽ പക്ഷേ, മരണ കാരണം വിശദീകരിച്ചിട്ടില്ല.

ഷെമീർ വിദേശത്തായതിനാൽ അമ്മയും മകളും തനിച്ചാണു താമസിച്ചിരുന്നത്. ലൈജീനയുടെ നിലവിളി കേട്ട് അയൽവാസികളും ബന്ധുക്കളും ഓടി എത്തിയപ്പോഴാണു കിണറ്റിൽ വീണു കിടക്കുന്നതായി കണ്ടത്. മകൾ എവിടെ എന്ന ചോദ്യത്തിന് 'ഞാൻ കൊലപ്പെടുത്തി' എന്നു ലൈജീന പറഞ്ഞതായും വീടിനുള്ളിൽ കയറി നോക്കിയപ്പോൾ കിടപ്പുമുറിയിൽ കട്ടിലിന്റെ താഴെ ഷാൾ കഴുത്തിൽ കുരുങ്ങി ഷംന കിടക്കുന്നതായി കണ്ടെന്നും രക്ഷാപ്രവർത്തനത്തിന് എത്തിയവർ പറഞ്ഞു. ആശുപത്രിയിൽ എത്തിച്ചെങ്കിലും ഷംനയെ രക്ഷിക്കാനായില്ല.

വീടിനു മുൻ ഭാഗത്തുള്ള കിണറ്റിൽ കഴുത്തറ്റം വെള്ളത്തിൽ നിന്നിരുന്ന ലൈജീനയെ അഗ്‌നിരക്ഷാസേന എത്തിയാണ് പുറത്തെടുത്തത്. തുടർന്നു കോട്ടയം മെഡിക്കൽ കോളജിലേക്കു മാറ്റുകയായിരുന്നു.വീട്ടിൽനിന്ന് ഗുളികകളുടെ സ്ട്രിപ്പുകൾ കണ്ടെത്തിയിരുന്നു. നാട്ടുകാർ പറഞ്ഞതനുസരിച്ച് ലൈജീനയ്ക്ക് മാനസിക പ്രശ്‌നങ്ങൾ ഉണ്ടോ എന്നും അന്വേഷിക്കുന്നുണ്ട്.