'ആര്‍ത്തവം എത്ര ദിവസമായി?, അത് ഇന്നലെ അവസാനിക്കേണ്ടതല്ലേ'; വനിതാ കളിക്കാരുമായി അമിതമായി അടുക്കുന്ന ശീലം; പെണ്‍കുട്ടികളെ നെഞ്ചോട് ചേര്‍ത്ത് അമര്‍ത്തിപ്പിടിക്കും; ചെവിക്ക് സമീപം നിന്ന് സംസാരിക്കും; മുൻ സെലക്ടർക്കെതിരേ ബംഗ്ലാദേശ് വനിതാ ക്രിക്കറ്റ് താരം ജഹനാര ആലം
ധാക്ക: ബംഗ്ലാദേശ് വനിതാ ക്രിക്കറ്റ് ടീമിന്റെ മുൻ സെലക്ടർ മഞ്ജുറുൾ ഇസ്ലാം ഉൾപ്പെടെയുള്ള ടീം മാനേജ്‌മെന്റിലെ ചില അംഗങ്ങൾക്കെതിരെ ലൈംഗിക പീഡനാരോപണവുമായി ദേശീയ ടീം താരം ജഹനാര ആലം. 2022-ലെ വനിതാ ലോകകപ്പ് സമയത്തും അതിനുശേഷവുമുള്ള കാലഘട്ടങ്ങളിൽ ടീം മാനേജ്‌മെന്റിൽ നിന്ന് മോശം സമീപനമുണ്ടായതായി അവർ വെളിപ്പെടുത്തി. നിലവിൽ ബംഗ്ലാദേശ് വനിതാ ടീമിന്റെ ഭാഗമല്ലാത്ത ജഹനാര, മാനസികാരോഗ്യം ക്രിക്കറ്റിൽ നിന്ന് ഇടവേളയെടുത്തിരിക്കുകയാണ്. ഒരു പ്രമുഖ യൂട്യൂബ് ചാനലിന് നൽകിയ അഭിമുഖത്തിലാണ് താരത്തിന്റെ ഞെട്ടിക്കുന്ന വെളിപ്പെടുത്തലുകൾ പുറത്തുവന്നത്.
'പലതവണ എന്നോട് അപമര്യാദയായി പെരുമാറിയിട്ടുണ്ട്. അറിയപ്പെടുന്ന താരമായതുകൊണ്ട് പല കാര്യങ്ങളെക്കുറിച്ചും തുറന്നു സംസാരിക്കാനോ പ്രതിഷേധിക്കാനോ എനിക്ക് കഴിഞ്ഞിരുന്നില്ല. എന്നാൽ ഇനി ഞാൻ സംസാരിക്കും. ഞാൻ അതിജീവിച്ചു തിരിച്ചെത്തിയതുപോലെ, കൂടുതൽ പെൺകുട്ടികൾ സുരക്ഷിതമായി തിരിച്ചെത്തണം,' ജഹനാര പറഞ്ഞു. മഞ്ജുറുൾ ഇസ്‌ലാമിൻ്റെ താൽപര്യങ്ങൾക്ക് വഴങ്ങാത്തതിനാലാണ് തൻ്റെ കരിയറിൽ തിരിച്ചടികൾ നേരിട്ടതെന്നും താരം കൂട്ടിച്ചേർത്തു.
മുൻ ബംഗ്ലാദേശ് ക്രിക്കറ്റ് താരം കൂടിയായ മഞ്ജുറുൾ ഇസ്ലാം, തൻ്റെ ഇഷ്ട്ടാനിഷ്ടങ്ങൾ അംഗീകരിക്കാത്തതിനാൽ ജഹനാരയുടെ കരിയറിന് തടസ്സമുണ്ടാക്കാൻ ശ്രമിച്ചതായി നേരത്തേയും ആരോപണങ്ങളുണ്ടായിരുന്നു. ഈ വിഷയത്തിൽ ബംഗ്ലാദേശ് ക്രിക്കറ്റ് ബോർഡിലെ (ബിസിബി) മുതിർന്ന ഉദ്യോഗസ്ഥരിൽ നിന്ന് പിന്തുണ തേടാൻ ശ്രമിച്ചെങ്കിലും ഫലമുണ്ടായില്ലെന്ന് ജഹനാര പറഞ്ഞു. വനിതാ കമ്മിറ്റി മേധാവി നാദേൽ ചൗധരി പോലും താൻ നേരിട്ട പീഡനം തടയുന്നതിൽ പരാജയപ്പെട്ടെന്നും, ബിസിബി ചീഫ് എക്സിക്യൂട്ടീവ് നിസാമുദ്ദീൻ ചൗധരി പലതവണ തൻ്റെ പരാതികൾ അവഗണിച്ചുവെന്നും താരം കൂട്ടിച്ചേർത്തു.
ടീം മാനേജ്‌മെന്റിലെ 'തൗഹീദ് ഭായ്' എന്ന് വിളിക്കപ്പെടുന്ന ഒരാളാണ് തന്നെ ആദ്യം മോശമായി സമീപിച്ചതെന്ന് ജഹനാര വെളിപ്പെടുത്തി. ടീം കോർഡിനേറ്റർ സർഫറാസ് ബാബു വഴിയാണ് ഇയാൾ തന്നെ സമീപിച്ചതെന്നും, താൻ എന്തിന് വേണ്ടിയാണ് മോശമായി പെരുമാറുന്നതെന്ന് മനസ്സിലായില്ലെന്നും അവർ പറഞ്ഞു. ഈ ശ്രമങ്ങളെ തന്ത്രപരമായി ഒഴിവാക്കാൻ ശ്രമിച്ചതോടെ പിറ്റേ ദിവസം മുതൽ മഞ്ജു ഭായ് (മഞ്ജുറുൾ ഇസ്ലാം) തന്നെ അപമാനിക്കാൻ തുടങ്ങിയതായും ജഹനാര അഭിമുഖത്തിൽ വിശദീകരിച്ചു.
'ഒരു തവണയല്ല, പല തവണ എനിക്ക് മോശം അനുഭവങ്ങളും സമീപനവും നേരിടേണ്ടി വന്നിട്ടുണ്ട്. ടീമുമായി ഇടപഴകുമ്പോൾ പല കാര്യങ്ങളെക്കുറിച്ചും, ഞങ്ങൾക്ക് ആഗ്രഹമുണ്ടെങ്കിൽ പോലും, സംസാരിക്കാൻ കഴിയില്ല. പ്രത്യേകിച്ചും അത് നിങ്ങളുടെ വരുമാന മാർഗം കൂടിയാകുമ്പോൾ,' ജഹനാര പറഞ്ഞു. 2022 ലോകകപ്പിനിടെ മഞ്ജു ഭായി വീണ്ടും മോശമായി സമീപിച്ചതോടെ, കഴിഞ്ഞ ഒന്നര വർഷത്തിനിടെ സംഭവിച്ച എല്ലാ കാര്യങ്ങളെയും കുറിച്ച് ബിസിബിയെ അറിയിക്കാൻ താൻ തീരുമാനിക്കുകയായിരുന്നുവെന്നും താരം വ്യക്തമാക്കി.
'ഒരിക്കല്‍ അയാള്‍ എന്റെ അടുത്തുവന്ന്, എന്റെ കൈ പിടിച്ചു, എന്റെ തോളില്‍ കൈവെച്ചു, എന്റെ ചെവിയോട് ചേര്‍ന്ന്, നിങ്ങളുടെ ആര്‍ത്തവം എത്ര ദിവസമായി എന്ന് ചോദിച്ചു. ഇന്ന് ആർത്തവത്തിന്റെ എത്രാം ദിവസമാണ്?’. എനിക്ക് ആർത്തവമാണെന്ന് അറിഞ്ഞിട്ടു തന്നെയാണ് അദ്ദേഹം ഇക്കാര്യം നേരിട്ടു ചോദിക്കുന്നത്. കാരണം സാധാരണയായി, ഐസിസി മാർഗനിർദേശങ്ങൾ അനുസരിച്ച്, ഞങ്ങൾക്ക് ക്ലാസുകൾ നൽകുന്ന ഡോക്ടർ, ഫിസിയോതെറാപ്പിസ്റ്റ് അല്ലെങ്കിൽ ഡോക്ടറാണ് എല്ലാ താരങ്ങളിൽനിന്നും ആർത്തവ തീയതികൾ ശേഖരിക്കുന്നത്. എല്ലാ രാജ്യാന്തര വനിതാ ടീമുകളും ഇതിനായി ഒരു ആപ് ഉപയോഗിക്കുന്നുണ്ട്.
എന്നാല്‍, ജഹനാര ആലത്തിന്റെ ആരോപണങ്ങൾ മഞ്ജുറുള്‍ ഇസ്ലാം തള്ളിക്കളഞ്ഞു. ജഹനാര പറഞ്ഞതെല്ലാം കെട്ടിച്ചമച്ച കഥകളാണ്. അടിസ്ഥാനരഹിതമായ ആരോപണങ്ങള്‍ ഉന്നയിക്കുന്നതിന് പകരം തെളിവുകള്‍ കൊണ്ടുവരാനുമാണ് മഞ്ജുറുള്‍ ആവശ്യപ്പെടുന്നത്. താന്‍ നല്ലവനാണോ മോശക്കാരനാണോ എന്ന് നിങ്ങള്‍ക്ക് മറ്റ് ക്രിക്കറ്റ് കളിക്കാരോട് ചോദിക്കാമെന്നും മഞ്ജുറുള്‍ പറഞ്ഞു. മുഴുൻ കാര്യങ്ങളും കെട്ടിച്ചമച്ചതാണെന്ന് സർഫറാസ് ബാബുവും പറഞ്ഞു. മരിച്ചയാളെ പോലും ഇതിലേക്കു വലിച്ചിഴയ്ക്കുന്നത് നിർഭാഗ്യകരമാണെന്നും അടിസ്ഥാനരഹിതമായ ആരോപണങ്ങൾ ഉന്നയിക്കുന്നതിന് പകരം തെളിവുകൾ കൊണ്ടുവരണമെന്നും സർഫറാസ് ബാബു പറഞ്ഞു.
