'സഞ്ജു ആ പ്രകടനം കൊണ്ട് സൂര്യയെക്കൊണ്ട് അങ്ങനെ ചെയ്യിപ്പിച്ചു'; അവനൊരു ഒരു വേൾഡ് ക്ലാസ് താരം; മലയാളി താരത്തെ വാനോളം പുകഴ്ത്തി മുൻ താരം സദഗോപൻ രമേശ്

മുംബൈ: ടി20 ലോകകപ്പ് സെമി ഫൈനലിൽ ഇംഗ്ലണ്ടിനെതിരെ സഞ്ജു സാംസൺ പുറത്തെടുത്ത ബാറ്റിംഗ് പ്രകടനത്തെ പ്രശംസിച്ച് മുൻ ഇന്ത്യൻ താരം സദഗോപൻ രമേശ്. സഞ്ജുവിന്റെ പോരാട്ടവീര്യത്തിന് മുന്നിൽ ഇന്ത്യൻ ക്യാപ്റ്റൻ സൂര്യകുമാർ യാദവ് ആദരസൂചകമായി തലകുനിക്കേണ്ടി വന്ന സാഹചര്യത്തെക്കുറിച്ചാണ് രമേശ് വാചാലനായത്. വെസ്റ്റ് ഇൻഡീസിനെതിരായ മത്സരത്തിന് പിന്നാലെ സെമിയിലും സഞ്ജു ഫോം തുടർന്നതോടെയാണ് മുൻ താരത്തിന്റെ പ്രതികരണം.

മുംബൈ വാംഖഡെ സ്റ്റേഡിയത്തിൽ നടന്ന ആവേശകരമായ സെമി ഫൈനലിൽ ഇംഗ്ലീഷ് ബൗളർമാരെ സഞ്ജു നിഷ്പ്രഭരാക്കി. വെറും 42 പന്തിൽ നിന്ന് എട്ട് ഫോറുകളും സിക്സറുകളും ഉൾപ്പെടെ 89 റൺസാണ് താരം അടിച്ചുകൂട്ടിയത്. സഞ്ജുവിന്റെ ഈ ഇന്നിംഗ്‌സാണ് ഇന്ത്യയെ 253 എന്ന കൂറ്റൻ സ്കോറിലേക്ക് എത്തിച്ചത്. ഇതോടെ ടി20 ലോകകപ്പ് നോക്കൗട്ട് മത്സരങ്ങളിൽ ഒരു ഇന്ത്യൻ താരം നേടുന്ന ഏറ്റവും ഉയർന്ന സ്കോറെന്ന വിരാട് കോലിയുടെ റെക്കോർഡിനൊപ്പവും (89 റൺസ്) സഞ്ജു എത്തി.

വിൻഡീസിനെതിരായ മത്സരത്തിന് ശേഷം സഞ്ജു ഡഗ് ഔട്ടിലേക്ക് മടങ്ങവെ ക്യാപ്റ്റൻ സൂര്യകുമാർ യാദവ് തന്റെ തൊപ്പിയൂരി വണങ്ങിയ ദൃശ്യങ്ങൾ സമൂഹമാധ്യമങ്ങളിൽ തരംഗമായിരുന്നു. ഇതിനെ പരാമർശിച്ചാണ് സദഗോപൻ രമേശ് സംസാരിച്ചത്. "സഞ്ജു തന്റെ പ്രകടനം കൊണ്ട് സൂര്യയെക്കൊണ്ട് അങ്ങനെ ചെയ്യിപ്പിച്ചു. അദ്ദേഹം ഒരു വേൾഡ് ക്ലാസ് കളിക്കാരനാണ്. ടീം മാനേജ്‌മെന്റ് അദ്ദേഹത്തിൽ അർപ്പിച്ച വിശ്വാസത്തിന് ലഭിച്ച പ്രതിഫലമാണ് ഈ പ്രകടനം," രമേശ് കൂട്ടിച്ചേർത്തു.

താൻ മികച്ച ഫോമിലാണെന്ന് അറിയാമായിരുന്നുവെന്നും വാംഖഡെയിലെ സാഹചര്യം മുതലെടുത്ത് ടീമിന് വേണ്ടി വലിയ സ്കോർ കണ്ടെത്താനായതിൽ സന്തോഷമുണ്ടെന്നും വിജയത്തിന് ശേഷം സഞ്ജു പ്രതികരിച്ചിരുന്നു. സഞ്ജുവിന്റെ ഈ മാസ്മരിക ഫോം ഫൈനലിലും ഇന്ത്യക്ക് വലിയ പ്രതീക്ഷയാണ് നൽകുന്നത്.