സെഞ്ചുറിയ്ക്ക് പിന്നാലെ തകർത്തടിച്ച് വിരാട് കോഹ്ലി നാലാം നമ്പറിൽ നിരാശപ്പെടുത്തി ഋതുരാജ് ഗെയ്‌ക്‌വാദ്; ദക്ഷിണാഫ്രിക്കയ്‌ക്കെതിരായ ആദ്യ ഏകദിനത്തിൽ ഇന്ത്യ മികച്ച സ്കോറിലേക്ക്
റാഞ്ചി: ദക്ഷിണാഫ്രിക്കയ്‌ക്കെതിരായ മൂന്ന് മത്സര ഏകദിന പരമ്പരയിലെ ആദ്യ പോരാട്ടത്തിൽ ഇന്ത്യ മികച്ച സ്കോറിലേക്ക്. റാഞ്ചിയിൽ നടക്കുന്ന മത്സരത്തിൽ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ ഒടുവിൽ വിവരം കിട്ടുമ്പോൾ 40 ഓവറിൽ നാല് വിക്കറ്റ് നഷ്ടത്തിൽ 264 റൺസ് എന്ന നിലയിലാണ്. 132 റൺസുമായി കോഹ്‌ലിയും 18 റൺസുമായി ക്യാപ്റ്റൻ കെ.എൽ. രാഹുലുമാണ് ക്രീസിൽ. റാഞ്ചിയിൽ സെഞ്ചുറി പിന്നിട്ട കോഹ്ലി അതിവേഗം സ്കോർ ഉയർത്തുകയാണ്. ദക്ഷിണാഫ്രിക്കയ്ക്ക് വേണ്ടി ഒട്ട്‌നീല്‍ ബാര്‍ട്ട്മാന്‍ രണ്ട് വിക്കറ്റെടുത്തു.
നേരത്തെ, ടോസ് നേടിയ ദക്ഷിണാഫ്രിക്ക ഇന്ത്യയെ ബാറ്റിങ്ങിന് അയക്കുകയായിരുന്നു. സ്കോർ 25-ൽ നിൽക്കെ ഓപ്പണർ യശസ്വി ജയ്‌സ്വാളിന്റെ (18) വിക്കറ്റാണ് ഇന്ത്യക്ക് ആദ്യം നഷ്ടമായത്. തുടർന്ന് ക്രീസിൽ ഒരുമിച്ച രോഹിത്-കോലി സഖ്യം ക്രീസിൽ ഒത്തുചേർന്നതോടെ ഇന്ത്യൻ ഇന്നിംഗ്‌സിന് വേഗത കൈവന്നു. ഏകദിന ക്രിക്കറ്റിൽ ഏറ്റവും കൂടുതൽ സിക്സറുകൾ നേടുന്ന താരം എന്ന റെക്കോർഡ് ഈ ഇന്നിംഗ്‌സിൽ രോഹിത് ശർമ സ്വന്തമാക്കി. രോഹിത് ശർമ (57) പുറത്തായ ശേഷം ക്രീസിലെത്തിയ ഋതുരാജ് ഗെയ്‌ക്‌വാദ് (8), വാഷിങ്ടൺ സുന്ദർ (13) എന്നിവർക്ക് കാര്യമായി തിളങ്ങാനായില്ല.
കഴിഞ്ഞ കുറച്ചുകാലമായി പരിക്കുമൂലം 50 ഓവർ ഫോർമാറ്റിൽ നിന്ന് വിട്ടുനിന്ന റിഷഭ് പന്ത്, 2024 ഓഗസ്റ്റിൽ ഇന്ത്യയുടെ ശ്രീലങ്കൻ പര്യടനത്തിനുശേഷം ഏകദിനത്തിൽ കളിച്ചിട്ടില്ല. പരിക്കിൽ നിന്ന് മടങ്ങിയെത്തിയ പന്തിന്റെ തിരിച്ചുവരവ് ഏറെ ചർച്ചയായിരുന്നുവെങ്കിലും, ഈ നിർണായക മത്സരത്തിൽ താരത്തിന് പ്ലേയിംഗ് ഇലവനിൽ ഇടം ലഭിച്ചില്ല.
ഇന്ത്യൻ ടീം: രോഹിത് ശർമ, യശസ്വി ജയ്സ്വാൾ, വിരാട് കോലി, റുതുരാജ് ഗെയ്കവാദ്, വാഷിംഗ്ടൺ സുന്ദർ, കെ.എൽ. രാഹുൽ (ക്യാപ്റ്റൻ / വിക്കറ്റ് കീപ്പർ), രവീന്ദ്ര ജഡേജ, ഹർഷിത് റാണ, കുൽദീപ് യാദവ്, അർഷ്ദീപ് സിംഗ്, പ്രസിദ് കൃഷ്ണ.
ദക്ഷിണാഫ്രിക്കൻ ടീം: റയാൻ റിക്കൽടൺ, ക്വിന്റൺ ഡി കോക്ക് (വിക്കറ്റ് കീപ്പർ), എഡൻ മാർക്രം (ക്യാപ്റ്റൻ), മാത്യു ബ്രീറ്റ്സ്കെ, ടോണി ഡി സോർസി, ഡെവാൾഡ് ബ്രെവിസ്, മാർക്കോ ജാൻസെൻ, കോർബിൻ ബോഷ്, പ്രണേലൻ സുബ്രയൻ, നാന്ദ്രെ ബർഗർ, ഒട്ട്‌നീൽ ബാർട്ട്മാൻ.
