റാഞ്ചി:ഇന്ത്യക്കെതിരായ ആദ്യ ഏകദിനത്തില്‍ പൊരുതി തോറ്റ് ദക്ഷിണാഫ്രിക്ക. ത്രില്ലര്‍ പോരാട്ടത്തില്‍ ഇന്ത്യ 17 റണ്‍സിനാണ് വിജയിച്ചത്. വിരാട് കോലിയുടെ സെഞ്ച്വറിയാണ് ഇന്ത്യയെ വിജയത്തിലേക്ക് നയിച്ചത്. ആദ്യം ബാറ്റ് ചെയ്ത ആതിഥേയരൊക്കിയ 350 റണ്‍സ് ലക്ഷ്യത്തിലേക്ക് ഏറെക്കുറെ അടുത്തെത്തിയാണ് പ്രോട്ടീസ് കീഴടങ്ങിയത്. 50 ഓവറില്‍ എട്ട് വിക്കറ്റ് നഷ്ടത്തില്‍ 349 റണ്‍സ് നേടി ഇന്ത്യ. മറുപടി ബാറ്റിങ്ങില്‍ ദക്ഷിണാഫ്രിക്ക 49.2 ഓവറില്‍ 332ന് പുറത്തായി. ആദ്യ ഘട്ടത്തില്‍ തകര്‍ച്ച നേരിട്ട ദക്ഷിണാഫ്രിക്കയ്ക്ക് മാത്യു ബ്രീറ്റ്‌സ്‌കെ, മാര്‍കോ യാന്‍സന്‍, ഡെവാള്‍ഡ് ബ്രവിസ്, ടോണി ഡി സോര്‍സി, കോര്‍ബിന്‍ ബോഷ് എന്നിവരുടെ ഇന്നിങ്‌സുകളാണ് രക്ഷയായത്.

വിരാട് കോലിയുടെ സെഞ്ച്വറിയും രോഹിത് ശര്‍മയുടെയും ക്യാപ്റ്റന്‍ കെ.എല്‍.രാഹുലിന്റെയും അര്‍ധ ശതകങ്ങളുമാണ് ഇന്ത്യയെ 300 കടത്തിയത്. കിങ് കോഹ്‌ലി 11 ഫോറും ഏഴ് സിക്‌സുമടക്കം 120 പന്തില്‍ 135 റണ്‍സ് റണ്‍സ് നേടി. കോഹ്‌ലിക്കൊപ്പം നിലയുറപ്പിച്ച് ഇന്ത്യന്‍ ഇന്നിങ്‌സിന് തറക്കല്ലിട്ട രോഹിത് 51 പന്തില്‍ 57 റണ്‍സ് ചേര്‍ത്തു. രാഹുല്‍ മൂന്ന് സിക്‌സറുകളും രണ്ടുഫോറും അടക്കം 56 പന്തില്‍ 60 റണ്‍സ് നേടി.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യക്ക് തുടക്കത്തില്‍ തന്നെ 16 പന്തില്‍ 18 റണ്‍സെടുത്ത ഓപണര്‍ യശസ്വി ജയ്സ്വാളിനെ നഷ്ടമായി. നാന്ദ്രെ ബര്‍ഗറിനായിരുന്നു വിക്കറ്റ്. രണ്ടാം വിക്കറ്റില്‍ കോലിയും രോഹിത്തും ഇന്ത്യയെ മുന്നോട്ടു നയിച്ചു. തുടക്കത്തില്‍ ശ്രദ്ധയോ?ടെ കളിച്ച കോഹ്‌ലി പിന്നീട് അരങ്ങുവാഴുകയായിരുന്നു. ബപത്ത് ഓവര്‍ അവസാനിക്കുമ്പോള്‍ ഒരു വിക്കറ്റിന് 80 റണ്‍സെന്ന നിലയിലായിരുന്ന ഇന്ത്യ അടുത്ത പത്ത് ഓവറില്‍ രോകോ സഖ്യം ടീമിനെ 153 ലെത്തിച്ചു.

രണ്ടാം വിക്കറ്റില്‍ ഇവര്‍ 136 റണ്‍സ് ചേര്‍ത്തു. സ്‌കോര്‍ 161 ല്‍ നില്‍ക്കെ രോഹിത്തിനെ എല്‍.ബി.ഡബ്ല്യുവില്‍ കുരുക്കി മാര്‍കോ യാന്‍സന്‍ ഇന്ത്യയുടെ രണ്ടാം വിക്കറ്റ് വീഴ്ത്തി. അഞ്ച് ഫോറും മൂന്ന് സിക്സറുമടങ്ങിയതായിരുന്നു രോഹിത്തിന്റെ ഇന്നിങ്സ്. നാലാമനായി ഇറങ്ങിയ ഋതുരാജ് ഗെയ്ക്‌വാദ് എട്ട് റണ്‍സെടുത്ത് ഒട്ട്‌നീല്‍ ബാര്‍ട്ട്മാന് വിക്കറ്റ്‌നല്‍കി മടങ്ങി. തുടര്‍ന്നെത്തിയ വാഷിങ്ടണ്‍ സുന്ദര്‍ 13 റണ്‍സെടുത്ത് ബാര്‍ട്ട്മാന്റെ രണ്ടാമത്തെ ഇരയായി കൂടാരം കയറി. സെഞ്ച്വറിക്കുശേഷവും കോഹ്‌ലി പ്രോട്ടീസ് ?ബൗളര്‍മാരെ പൊതിരെ തല്ലി. സ്‌കോര്‍ 276ല്‍ നി?ല്‍ക്കെ ബര്‍ഗറിനെതിരെ കൂറ്റനടിക്ക് ശ്രമിച്ച കോഹ്‌ലി റയാന്‍ റിക്കിള്‍ടെണിന്റെ ക്യാച്ചില്‍ പവിലിയനിലേക്ക് മങ്ങി.

രാഹുല്‍ റിവേഴ്‌സ് സ്വീപ്പിനുള്ള ശ്രമത്തിനിടെ വിക്കറ്റ് കീപ്പര്‍ ക്വിന്റണ്‍ ഡികോക്കിന് ക്യാച്ച് നല്‍കി പുറത്താവുകയായിരുന്നു. ഏഴാമനായെത്തിയ രവീന്ദ്ര ജദേജ 20 പന്തില്‍ 32 റണ്‍സടിച്ചു. അര്‍ഷ്ദീപ് സിങ് പൂജ്യത്തിന് പുറത്താവുകയായിരുന്നു. രണ്ടുപന്തില്‍ മൂന്ന് റണ്‍സെടുത്ത ഹര്‍ഷിത് റാണയും കുല്‍ദീപ് യാദവുമാണ് (0) 50 ഓവര്‍ പൂര്‍ത്തിയാവുമ്പോള്‍ ക്രീസിലുണ്ടായിരുന്നത്. ദക്ഷിണാഫ്രിക്കക്കായി ബൗളര്‍മാരായ യാന്‍സനും ബര്‍ഗറും കോര്‍ബിന്‍ ബോഷും ബാര്‍ട്ട്മാനും രണ്ട് വിക്കറ്റ് വീതം വീഴ്ത്തി.

മറുപടി ബാറ്റിംഗിന് ഇറങ്ങിയ ദക്ഷിണാഫ്രിക്കയെ രണ്ടാം ഓവര്‍ എറിയാനെത്തിയ ഹര്‍ഷിത് റാണ വിറപ്പിച്ചാണ് തുടങ്ങിയത്. ഓവറിലെ ആദ്യ പന്തിലും രണ്ടാം പന്തിലും താരം വിക്കറ്റെടുത്തു. റിക്കല്‍ട്ടെണും ഡികോക്കും ഡക്കായി മടങ്ങി. എയ്ഡന്‍ മാര്‍ക്രമിനെ(7) അര്‍ഷ്ദീപ് സിങ്ങും കൂടാരം കയറ്റിയതോടെ ദക്ഷിണാഫ്രിക്ക 11-3 എന്ന നിലയിലായി. പിന്നീട് ടോണി ഡി സോര്‍സിയും മാത്യു ബ്രീറ്റ്സ്‌കെയും ചേര്‍ന്ന് രക്ഷാപ്രവര്‍ത്തനം ആരംഭിച്ചു.

സ്‌കോറുയര്‍ത്തിയ ഇരുവരും ടീമിനെ 70 കടത്തി. പിന്നാലെ 39 റണ്‍സെടുത്ത സോര്‍സി പുറത്തായി. അഞ്ചാം വിക്കറ്റില്‍ ബ്രവിസുമായി ചേര്‍ന്നും ബ്രീറ്റ്സ്‌കെ കൂട്ടുകെട്ട് പടുത്തുയര്‍ത്തി. അര്‍ധസെഞ്ചുറി കൂട്ടുകെട്ടുയര്‍ത്തിയതോടെ ദക്ഷിണാഫ്രിക്ക 130 ലെത്തി. 37 റണ്‍സെടുത്ത ബ്രവിസിനെ റാണ മടക്കിയതോടെ പ്രോട്ടീസ് പ്രതിരോധത്തിലായി. എന്നാല്‍ പിന്നീടിറങ്ങിയ മാര്‍കോ യാന്‍സന്‍ വെടിക്കെട്ട് കാഴ്ചവെക്കുന്നതാണ് റാഞ്ചിയില്‍ കണ്ടത്.

22 ഓവറില്‍ 134-5 എന്ന നിലയില്‍ നിന്ന് ദക്ഷിണാഫ്രിക്ക 30 ഓവറില്‍ 206 ലെത്തി. ഇന്ത്യന്‍ ബൗളര്‍മാരെ തകര്‍ത്തടിച്ച യാന്‍സന്‍ 26 പന്തില്‍ നിന്ന് അര്‍ധസെഞ്ചുറി തികച്ചു. അര്‍ധസെഞ്ചുറിയുമായി ബ്രീറ്റ്സ്‌കെയും ക്രീസില്‍ നിലയുറപ്പിച്ചതോടെ ഇന്ത്യ പരുങ്ങലിലായി. എന്നാല്‍ കുല്‍ദീപ് യാദവ് എറിഞ്ഞ 34-ാം ഓവറില്‍ കളിയുടെ ഗതി മാറി. യാന്‍സനെയും ബ്രീറ്റ്‌സ്‌കെയെയും പുറത്താക്കി കുല്‍ദീപ് ഇന്ത്യക്ക് ജയപ്രതീക്ഷ സമ്മാനിച്ചു. യാന്‍സന്‍ 39 പന്തില്‍ നിന്ന് 70 റണ്‍സെടുത്താണ് മടങ്ങിയത്. ബ്രീറ്റ്‌സ്‌കെ 72 റണ്‍സെടുത്ത് പുറത്തായി. അതോടെ ദക്ഷിണാഫ്രിക്ക പ്രതിരോധത്തിലായി.

എട്ടാം വിക്കറ്റില്‍ കോര്‍ബിന്‍ ബോഷും പ്രിനലന്‍ സുബ്രയാനും ചേര്‍ന്ന് നിര്‍ണായക കൂട്ടുകെട്ട് പടുത്തുയര്‍ത്തിയത് ഇന്ത്യയെ കുഴക്കി. ഇരുവരും ടീമിനെ 270 ലെത്തിച്ചു. 17 റണ്‍സെടുത്ത സുബ്രയാനെ കൂടാരം കയറ്റി കുല്‍ദീപ് വീണ്ടും പ്രതീക്ഷ നല്‍കി. എന്നാല്‍ കോര്‍ബിന്‍ നാന്ദ്രെ ബര്‍ഗറുമായി ചേര്‍ന്നും കൂട്ടുകെട്ടുണ്ടാക്കിയതോടെ ടീം 300 കടന്നു. കോര്‍ബിന്‍ അര്‍ധസെഞ്ചുറിയുമായി പ്രോട്ടീസിന് പ്രതീക്ഷ നല്‍കി. എന്നാല്‍ 332 ല്‍ നില്‍ക്കേ കോര്‍ബിന്‍ പുറത്തായതോടെ ടീം തോല്‍വിയോടെ മടങ്ങി. കോര്‍ബിന്‍ 67 റണ്‍സെടുത്തു. കളില്‍ പ്ലെയര്‍ഓഫ് ദി മാച്ച്പുരസ്‌ക്കാര നേടിയത് വിരാട് കോലിയാണ്. ടെസ്റ്റ് ക്രിക്കറ്റിലേക്ക് ഇനി മടക്കമില്ലെന്ന് പ്ലെയര്‍ ഓഫ് ദി മാച്ച് പുരസ്‌ക്കാരം ഏറ്റുവാങ്ങിയ ശേഷം കോലി പ്രതികരിച്ചു.