രാജ്‌കോട്ട്: ഇന്ത്യ 'എ'യും ദക്ഷിണാഫ്രിക്ക 'എ'യും തമ്മിൽ നടന്ന ഏകദിന പരമ്പരയിലെ മൂന്നാമത്തെയും അവസാനത്തെയും മത്സരത്തിൽ സന്ദർശകരായ ദക്ഷിണാഫ്രിക്ക 'എ'ക്ക് 73 റൺസിന്റെ ആശ്വാസ വിജയം. യുവ ബാറ്റിംഗ് സെൻസേഷനായ ലുവാൻ-ഡ്രെ പ്രിട്ടോറിയസിന്റെയും റിവാൾഡോ മൂൺസാമിയുടെയും തകർപ്പൻ സെഞ്ച്വറികളാണ് ദക്ഷിണാഫ്രിക്ക 'എ'യുടെ വിജയത്തിന് അടിത്തറയിട്ടത്. എന്നാൽ, ആദ്യ രണ്ട് മത്സരങ്ങളും സ്വന്തമാക്കിയ ഇന്ത്യ 'എ' നേരത്തെ തന്നെ പരമ്പര ഉറപ്പാക്കിയിരുന്നു. 2-1 എന്ന നിലയിൽ ഇന്ത്യ 'എ' പരമ്പര സ്വന്തമാക്കി. ദക്ഷിണാഫ്രിക്കയ്ക്കായി നക്ബയോംസി പീറ്റർ 4 വിക്കറ്റുകൾ വീഴ്ത്തി.

ടോസ് നേടിയ ഇന്ത്യ 'എ' നായകൻ തിലക് വർമ്മ, ദക്ഷിണാഫ്രിക്ക 'എ'യെ ആദ്യം ബാറ്റിംഗിന് അയക്കുകയായിരുന്നു. എന്നാൽ, ഇന്ത്യൻ നായകന്റെ കണക്കുകൂട്ടലുകൾ പൂർണ്ണമായും തെറ്റിച്ചുകൊണ്ട് ഓപ്പണർമാരായ ലുവാൻ-ഡ്രെ പ്രിട്ടോറിയസും റിവാൾഡോ മൂൺസാമിയും ചേർന്ന് ഇന്ത്യൻ ബൗളർമാരെ കണക്കറ്റ് പ്രഹരിച്ചു. ഇരുവരും ഒന്നാം വിക്കറ്റിൽ 241 റൺസിന്റെ വമ്പൻ കൂട്ടുകെട്ടാണ് പടുത്തുയർത്തിയത്. വെറും 99 പന്തിൽ 123 റൺസ് നേടിയ പ്രിട്ടോറിയസ്, ബാറ്റിംഗ് ശൈലിയിലൂടെ ക്രിക്കറ്റ് ലോകത്തിന്റെ ശ്രദ്ധ ആകർഷിച്ചു. മറുവശത്ത്, കൂടുതൽ ക്ഷമയോടെ ബാറ്റ് വീശിയ റിവാൾഡോ മൂൺസാമി 130 പന്തിൽ 107 റൺസ് നേടി പ്രിട്ടോറിയസിന് മികച്ച പിന്തുണ നൽകി.

37.2 ഓവറിൽ പ്രിട്ടോറിയസിനെ പുറത്താക്കി പ്രസിദ്ധ് കൃഷ്ണയാണ് ഈ കൂട്ടുകെട്ട് പൊളിച്ചത്. ഈ തകർപ്പൻ പ്രകടനത്തിന്റെ ബലത്തിൽ ദക്ഷിണാഫ്രിക്ക 'എ'യുടെ സ്കോർ 50 ഓവറിൽ 6 വിക്കറ്റ് നഷ്ടത്തിൽ 325 എന്ന ശക്തമായ നിലയിൽ എത്തി. അവസാന ഓവറുകളിൽ ഡെലാനോ പൊട്ടീറ്റർ, ഡീൻ ഫോറെസ്റ്റർ എന്നിവരുടെ ചില നിർണ്ണായക പ്രകടനങ്ങളും ടീമിന് തുണയായി. ഇന്ത്യൻ ബൗളർമാരിൽ ഹർഷിത് റാണ, പ്രസിദ്ധ് കൃഷ്ണ, ഖലീൽ അഹമ്മദ് എന്നിവർക്ക് രണ്ട് വിക്കറ്റ് വീതം ലഭിച്ചു. 326 റൺസ് എന്ന വലിയ വിജയലക്ഷ്യം പിന്തുടർന്ന ഇന്ത്യ 'എ'ക്ക് ബാറ്റിംഗിൽ ഒരു മികച്ച തുടക്കം ലഭിച്ചില്ല.

ഓപ്പണർമാരും മധ്യനിരയിലെ പ്രധാന താരങ്ങളും പെട്ടെന്ന് പുറത്തായത് ഇന്ത്യയുടെ റൺ ചെയ്‌സിനെ പ്രതികൂലമായി ബാധിച്ചു. ഒരു ഘട്ടത്തിൽ ഇന്ത്യ 'എ' പരാജയത്തിലേക്ക് നീങ്ങുമെന്ന് ഉറപ്പായെങ്കിലും, വിക്കറ്റ് കീപ്പർ ബാറ്റ്സ്മാനായ ഇഷാൻ കിഷനും ഓൾറൗണ്ടർ ആയുഷ് ബദോനിയും നടത്തിയ ചെറുത്തുനിൽപ്പ് ടീമിന് ആശ്വാസമായി. കിഷൻ 53 റൺസ് നേടിയപ്പോൾ, ആയുഷ് ബദോനി 66 റൺസുമായി മികച്ച പിന്തുണ നൽകി. ഇരുവരും അർദ്ധസെഞ്ച്വറികൾ നേടിയെങ്കിലും, മറ്റ് ബാറ്റ്സ്മാൻമാർക്ക് ക്രീസിൽ നിലയുറപ്പിക്കാൻ കഴിയാതെ വന്നത് ഇന്ത്യക്ക് തിരിച്ചടിയായി. ദക്ഷിണാഫ്രിക്കൻ ബൗളർമാരുടെ മികച്ച പ്രകടനത്തിന് മുന്നിൽ ഇന്ത്യൻ ബാറ്റിംഗ് നിരയ്ക്ക് പിടിച്ചുനിൽക്കാനായില്ല. 49.1 ഓവറിൽ 252 റൺസിന് ഇന്ത്യ 'എ'യുടെ എല്ലാ വിക്കറ്റുകളും നഷ്ടമായി. ഇതോടെ ദക്ഷിണാഫ്രിക്ക 'എ' 73 റൺസിന് വിജയം നേടി.

ഇന്ത്യദക്ഷിണാഫ്രിക്കഏകദിന പരമ്പര

സ്വന്തം ലേഖകൻ