മാക്‌സ്വെലിന് പകരക്കാരനായി മിച്ചല്‍ ഓവന്; ഓസീസ് താരം ഐപിഎല്ലില്‍ എത്തുന്നത് പാക്കിസ്ഥാന്‍ സൂപ്പര്‍ ലീഗില്‍ നിന്നും
മാക്‌സ്വെലിന് പകരക്കാരനായി മിച്ചല്‍ ഓവന്
ന്യൂഡല്‍ഹി: വിരലിന് പൊട്ടലേറ്റ് ഐപിഎല്ലില്‍ നിന്ന് പുറത്തായ ഓസ്ട്രേലിയന്‍ ഓള്‍റൗണ്ടര്‍ ഗ്ലെന്‍ മാകസ്വെല്ലിന് പകരം മിച്ചല്‍ ഓവനെ ടീമിലെത്തിച്ച് പഞ്ചാബ് കിംഗ്‌സ്. മൂന്ന് കോടി രൂപക്കാണ് ഓസീസ് താരത്തെ പഞ്ചാബ് കിംഗ്‌സ് ടീമിലെത്തിച്ചത്. നിലവില്‍ പാകിസ്ഥാന്‍ സൂപ്പര്‍ ലീഗിലെ (പിഎസ്എല്‍) പെഷാവര്‍ സാല്‍മിയുടെ താരമാണ് ഓവന്.
പിഎസ്എല്‍ കാരണം ഐപിഎല്ലിന് താരങ്ങളെ കിട്ടുന്നില്ലെന്നു പഞ്ചാബ് കിങ്‌സ് പരിശീലകന്‍ റിക്കി പോണ്ടിങ് നേരത്തെ പരാതി പറഞ്ഞിരുന്നു. ഇതിന് പിന്നാലെയാണ് പിഎസ്എല്‍ താരത്തെ പഞ്ചാബ് ടീമിലെത്തിച്ചത്. മെയ് ഒമ്പത് വരെ ഓവന് പിഎസ്എല്ലില്‍ കളിയുണ്ട്. ഇതിന് ശേഷമാകും താരം പഞ്ചാബിനൊപ്പം ചേരുക. കരിയറില്‍ ഇതുവരെ 34 ടി20 മത്സരങ്ങളില്‍ കളിച്ച ഓവന് രണ്ട് സെഞ്ചുറി അടക്കം 646 റണ്‍സും 10 വിക്കറ്റും നേടിയിട്ടുണ്ട്.
അതേസമയം കൊല്‍ക്കത്ത നൈറ്റ് റൈഡേഴ്സുമായുള്ള മത്സരത്തിനാണ് മാക്സ്വെല്ലിന് പരിക്കേറ്റത്. സീസണില്‍ 4.2 കോടി മുടക്കിയാണ് പഞ്ചാബ് മാക്സ്വെല്ലിനെ തട്ടകത്തിലെത്തിച്ചത്. എന്നാല്‍ ഫോ കണ്ടെത്താനാവാതെ താരം കളികളില്‍ നിരാശപ്പെടുത്തി. ഇതിന് പിന്നാലെയാണ് പരിക്ക്. ഏഴ് മത്സരങ്ങളില്‍ നിന്ന് ആകെ 48 റണ്‍സാണ് താരത്തിന്റെ സമ്പാദ്യം. നാല് വിക്കറ്റും നേടി.
