മുംബൈ: കളിക്കളത്തിലെ തകർപ്പൻ പ്രകടനത്തിന് പിന്നാലെ ജീവിതത്തിലെ 'ലേഡി ലക്കിന്' വിലപിടിപ്പുള്ള സമ്മാനം നൽകി ആരാധകരെ ഞെട്ടിച്ചിരിക്കുകയാണ് മുംബൈ ഇന്ത്യൻസ് നായകൻ ഹാർദിക് പാണ്ഡ്യ. തന്റെ പ്രണയിനിയും നടിയുമായ മഹിക ശർമയ്ക്ക് ഇന്ത്യയിലെ ആദ്യത്തെ മെഴ്സിഡസ് ബെൻസ് വി-ക്ലാസ് കാറാണ് ഹാർദിക് സമ്മാനിച്ചത്. ഏകദേശം 1.7 കോടി രൂപയോളമാണ് ഈ ലക്ഷ്വറി വാഹനത്തിന്റെ വിപണി വില.

നേരത്തെ 12 കോടി രൂപ വിലമതിക്കുന്ന ഫെരാരി കാർ ഹാർദിക് സ്വന്തമാക്കിയിരുന്നു. ഇതിന് തൊട്ടുപിന്നാലെയാണ് പ്രണയിനിക്ക് സർപ്രൈസ് സമ്മാനവുമായി താരം എത്തിയത്. ഇന്ത്യയിലെ തന്നെ ഏറ്റവും ആഡംബരമേറിയതും വിശാലവുമായ വാഹനങ്ങളിൽ ഒന്നായാണ് വി-ക്ലാസ് അറിയപ്പെടുന്നത്. പുതിയ കാറിനൊപ്പം ഇരുവരും നിൽക്കുന്ന ചിത്രങ്ങൾ ഇതിനോടകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു. തന്റെ വിജയങ്ങൾക്ക് പിന്നിലെ കരുത്ത് മഹികയാണെന്ന് ഹാർദിക് പലപ്പോഴും വെളിപ്പെടുത്തിയിട്ടുണ്ട്.

വ്യക്തിജീവിതത്തിലെ ആഘോഷങ്ങൾക്കിടയിലും ക്രിക്കറ്റ് മൈതാനത്ത് മുംബൈയെ വിജയവഴിയിൽ തിരിച്ചെത്തിക്കാൻ ഹാർദിക്കിനായി. ഐപിഎൽ 2026-ലെ ഉദ്ഘാടന മത്സരത്തിൽ കൊൽക്കത്ത നൈറ്റ് റൈഡേഴ്സിനെ ആറ് വിക്കറ്റിനാണ് മുംബൈ തകർത്തത്. 2012-ന് ശേഷം ആദ്യമായാണ് മുംബൈ ഇന്ത്യൻസ് തങ്ങളുടെ സീസണിലെ ആദ്യ മത്സരം ജയിക്കുന്നത്. 13 വർഷം നീണ്ട കാത്തിരിപ്പിനാണ് ഇതോടെ അന്ത്യമായത്.

വാങ്കഡെ സ്റ്റേഡിയത്തിൽ നടന്ന ആവേശപ്പോരാട്ടത്തിൽ കൊൽക്കത്ത ഉയർത്തിയ 221 റൺസെന്ന കൂറ്റൻ ലക്ഷ്യം 19.1 ഓവറിൽ മുംബൈ മറികടന്നു (224/4). മുൻ നായകൻ രോഹിത് ശർമയുടെയും (78) റയാൻ റിക്കൽട്ടണിന്റെയും (81) വെടിക്കെട്ട് അർധസെഞ്ചുറികളാണ് മുംബൈ ജയം അനായാസമാക്കിയത്.

"13 വർഷം എന്നത് വലിയൊരു കാത്തിരിപ്പാണ്. എല്ലാ സീസണിലും വിജയത്തോടെ തുടങ്ങണമെന്ന് ആഗ്രഹിക്കാറുണ്ടെങ്കിലും ഇപ്പോഴാണ് അതിന് സാധിച്ചത്. ഈ നേട്ടത്തിൽ ടീം ഒന്നടങ്കം ആവേശത്തിലാണ്." - ഹാർദിക് പാണ്ഡ്യ മത്സരത്തിന് ശേഷം പ്രതികരിച്ചു.

മുംബൈ ഇന്ത്യൻസ്ഹാർദിക് പാണ്ഡ്യമെഴ്സിഡസ് ബെൻസ് വി ക്ലാസ്

സ്വന്തം ലേഖകൻ