മിഥുൻ മൻഹാസ് ബിസിസിഐയുടെ തലപ്പത്ത്; സ്ഥാനമേൽക്കുന്നത് രോജർ ബിന്നിയുടെ പിൻഗാമിയായി; രാജീവ് ശുക്ല വൈസ് പ്രസിഡന്റ്; ഭരണസമിതിയിൽ പുതിയ അംഗങ്ങളും
മുംബൈ: ബോർഡ് ഓഫ് കൺട്രോൾ ഫോർ ക്രിക്കറ്റ് ഇൻ ഇന്ത്യയുടെ (ബിസിസിഐ) പുതിയ പ്രസിഡൻ്റായി മുൻ ഡൽഹി ക്രിക്കറ്റ് താരവും ബിസിസിഐയുടെ വൈസ് പ്രസിഡൻ്റുമായിരുന്ന മിഥുൻ മൻഹാസ് തിരഞ്ഞെടുക്കപ്പെട്ടു. സെപ്തംബർ 28-ന് മുംബൈയിൽ നടന്ന വാർഷിക ജനറൽ ബോഡി യോഗത്തിലാണ് അദ്ദേഹത്തെ എതിരില്ലാതെ തിരഞ്ഞെടുത്തത്. രോജർ ബിന്നിയുടെ പിൻഗാമിയായാണ് മിഥുൻ മൻഹാസ് സ്ഥാനമേൽക്കുന്നത്.
ജമ്മു കശ്മീർ ക്രിക്കറ്റ് അസോസിയേഷന്റെ ഡയറക്ടർ ഓഫ് ക്രിക്കറ്റ് സ്ഥാനവും വഹിച്ചിട്ടുണ്ട്. മുൻ രഞ്ജി ട്രോഫി താരമായ മൻഹാസ്, ഇന്ത്യൻ ക്രിക്കറ്റിൽ തൻ്റേതായ വ്യക്തിമുദ്ര പതിപ്പിച്ച താരമാണ്. പുതിയ ചുമതലയോടെ അദ്ദേഹം ബിസിസിഐയുടെ പ്രവർത്തനങ്ങൾക്ക് പുതിയ ദിശാബോധം നൽകുമെന്ന് പ്രതീക്ഷിക്കുന്നു. യോഗത്തിൽ വെച്ച് രാജീവ് ശുക്ലയെ വൈസ് പ്രസിഡൻ്റായും, ദേവജിത് സായ്കിയയെ ഹോണററി സെക്രട്ടറിയായും, പ്രഭ്തേജ് സിംഗ് ഭാട്ടിയയെ ജോയിൻ്റ് സെക്രട്ടറിയായും, എ. രഘുറാം ഭട്ടിനെ ട്രെഷററായും തിരഞ്ഞെടുത്തിട്ടുണ്ട്.
അപ്പെക്സ് കൗൺസിലിൽ ജയദേവ് നിരഞ്ജൻ ഷായാണ് ഏക അംഗം. ഭരണസമിതിയിലേക്ക് പുതിയ അംഗങ്ങളായി വരുൺ സിംഗ് ധുമൽ, എം. ഖൈറുൾ ജമാൽ മജ്‌ദർ എന്നിവരെയും ഉൾപ്പെടുത്തി. 45-കാരനായ മിഥുൻ മൻഹാസ് ആഭ്യന്തര ക്രിക്കറ്റിലെ മികച്ച താരങ്ങളിൽ ഒരാളായിരുന്നു. 157 ഫസ്റ്റ് ക്ലാസ് മത്സരങ്ങളിലും 130 ലിസ്റ്റ് എ മത്സരങ്ങളിലും 91 ടി20 മത്സരങ്ങളിലും മിഥുൻ മൻഹാസ് കളിച്ചിട്ടുണ്ട്.
ഫസ്റ്റ് ക്ലാസ് ക്രിക്കറ്റിൽ 9,714 റൺസും ലിസ്റ്റ് എ യിൽ 4,126 റൺസും ടി20യിൽ 1,170 റൺസും അദ്ദേഹം നേടിയിട്ടുണ്ട്. കൂടാതെ, ഫസ്റ്റ് ക്ലാസ് ക്രിക്കറ്റിൽ 40 വിക്കറ്റുകളും ലിസ്റ്റ് എ യിൽ 25 വിക്കറ്റുകളും ടി20യിൽ അഞ്ച് വിക്കറ്റുകളും വീഴ്ത്തിയിട്ടുണ്ട്. ഡൽഹി ഡെയർഡെവിൾസ്, പൂനെ വാരിയേഴ്സ് ഇന്ത്യ, ചെന്നൈ സൂപ്പർ കിംഗ്സ് എന്നീ ടീമുകൾക്കായി ഐപിഎല്ലിലും അദ്ദേഹം കളിച്ചിട്ടുണ്ട്.
