ദുലീപ് ട്രോഫിക്ക് യോഗ്യനെങ്കില്‍ എന്തുകൊണ്ട് ടി20 ടീമിലെടുത്തില്ല; ഏഷ്യാകപ്പ് ടീമില്‍ നിന്നും ഒഴിവാക്കിയതില്‍ നിരാശ പങ്കുവെച്ച് മുഹമ്മദ് ഷമി
ഏഷ്യാകപ്പ് ടീമില്‍ നിന്നും ഒഴിവാക്കിയതില്‍ നിരാശ പങ്കുവെച്ച് മുഹമ്മദ് ഷമി
ലക്‌നൗ: 2025-ലെ ഏഷ്യാകപ്പിനുള്ള ടീമില്‍ നിന്ന് ഒഴിവാക്കിയതിയതില്‍ പ്രതികരണവുമായി പേസര്‍ മുഹമ്മദ് ഷമി. വരാനിരിക്കുന്ന ടൂര്‍ണമെന്റിനായി ഇന്ത്യ അഞ്ച് സ്‌പെഷ്യലിസ്റ്റ് ബൗളര്‍മാരെയാണ് തിരഞ്ഞെടുത്തത്. അതില്‍ മൂന്ന് പേര്‍ ജസ്പ്രീത് ബുംറയുടെ നേതൃത്വത്തിലുള്ള ഫാസ്റ്റ് ബൗളര്‍മാരാണ്. എന്നാല്‍ ഷമിക്ക് 15 അംഗ ടീമിലോ റിസര്‍വ് ലിസ്റ്റിലോ ഇടം ലഭിച്ചില്ല. ഈ നിരാശ പങ്കുവെച്ചാണ് ഷമി രംഗത്തുവന്നത്.
സീനിയര്‍ ബൗളറായ ഇന്ത്യന്‍ താരം വ്യാഴാഴ്ച ആരംഭിക്കുന്ന ദുലീപ് ട്രോഫിയില്‍ കളിക്കുമെന്ന് വെളിപ്പെടുത്തിയിരുന്നു. 'തിരഞ്ഞെടുക്കാത്തതിന്റെ പേരില്‍ ഞാന്‍ ആരെയും കുറ്റപ്പെടുത്തുകയോ പരാതിപ്പെടുകയോ ചെയ്യുന്നില്ല. ഞാന്‍ ടീമിന് അനുയോജ്യനാണെങ്കില്‍, അവര്‍ എന്നെ തിരഞ്ഞെടുക്കട്ടെ. അല്ലെങ്കില്‍ എനിക്ക് ഒരു പ്രശ്‌നവുമില്ല. ടീം ഇന്ത്യക്ക് ഏറ്റവും മികച്ചത് എന്താണോ അത് ചെയ്യാനുള്ള ഉത്തരവാദിത്വം സെലക്ടര്‍മാര്‍ക്കുണ്ട്. എന്റെ കഴിവില്‍ എനിക്ക് വിശ്വാസമുണ്ട്. അവസരം ലഭിക്കുമ്പോള്‍ ഞാന്‍ എന്റെ മികച്ച പ്രകടനം പുറത്തെടുക്കും-ഒരു ഓണ്‍ലൈന്‍ ചാനലിന് നല്‍കിയ നടത്തിയ അഭിമുഖത്തില്‍ ഷമി പറഞ്ഞു.
ഫിറ്റ്‌നസ് പ്രശ്‌നങ്ങള്‍ കാരണം ഓസ്‌ട്രേലിയ, ഇംഗ്ലണ്ട് പര്യടനങ്ങള്‍ നഷ്ടമായെങ്കിലും, ദുലീപ് ട്രോഫിയില്‍ മികവ് പുലര്‍ത്തിയാല്‍ താരത്തിന് തിരിച്ചുവരാനാകും. പ്രത്യേകിച്ചും വെസ്റ്റ് ഇന്‍ഡീസിനെതിരായ ഹോം ടെസ്റ്റ് പരമ്പര അടുത്തിരിക്കുന്ന സാഹചര്യത്തില്‍ ഷമിയുടെ തിരിച്ചുവരവിന് സാധ്യതയേറുകയാണ്. ദുലീപ് ട്രോഫിക്ക് മുന്നോടിയായി ബംഗളൂരുവില്‍ നടന്ന ബ്രോങ്കോ ഫിറ്റ്‌നസ് ടെസ്റ്റ് വിജയിച്ചതായി താരം തന്നെ വ്യക്തമാക്കി.
ഈ വര്‍ഷമാദ്യം ഇംഗ്ലണ്ടിനെതിരായ ഹോം പരമ്പരയിലാണ് ഷമി ടി20 ടീമിലേക്ക് മടങ്ങിയെത്തിയത്. മൂന്ന് വര്‍ഷത്തിന് ശേഷമായിരുന്നു അന്ന് ഈ ഫോര്‍മാറ്റില്‍ കളിച്ചത്. മുപ്പത്തഞ്ചുകാരനായ ഷമിക്ക് സണ്‍റൈസേഴ്‌സ് ഹൈദരാബാദിനൊപ്പം 2025-ലെ ഐപിഎല്‍ സീസണ്‍ അത്ര മികച്ചതായിരുന്നില്ല. ഒമ്പത് മത്സരങ്ങളില്‍ നിന്ന് ആറ് വിക്കറ്റുകള്‍ മാത്രമാണ് അദ്ദേഹത്തിന് നേടാനായത്. 11.23 ആയിരുന്നു അദ്ദേഹത്തിന്റെ എക്കോണമി റേറ്റ്. സീസണില്‍ ചില മത്സരങ്ങളില്‍ അദ്ദേഹത്തെ ടീമില്‍ നിന്ന് ഒഴിവാക്കിയിരുന്നു.
ഫിറ്റ്‌നസ് പ്രശ്‌നങ്ങള്‍ കാരണം ഇംഗ്ലണ്ടിനെതിരായ ടെസ്റ്റ് പരമ്പരയിലും ഷമിയെ പരിഗണിച്ചിരുന്നില്ല. കൂടാതെ ഏഷ്യാകപ്പിനുള്ള ടീമില്‍ നിന്ന് താരത്തെ ഒഴിവാക്കി. ഫിറ്റ്‌നസ് കാരണങ്ങളാലാണ് ഷമിയെ ഒഴിവാക്കിയതെന്നാണ് റിപ്പോര്‍ട്ടുകള്‍.
