അര്‍ധസെഞ്ചറി നേട്ടം ആഘോഷിക്കാന്‍ ഡീപ് മിഡ്വിക്കറ്റിനു മുകളിലൂടെ പറത്തിയ പന്ത് വീണത് ഗാലറിയിലെ യുവതിയുടെ മുഖത്ത്; ഐസ് പായ്ക്ക് ചേര്‍ത്തുവച്ച് കരഞ്ഞ യുവതിയെ നേരിട്ടെത്തി ആശ്വസിപ്പിച്ച് സഞ്ജു സാംസണ്‍; കളത്തിനു പുറത്തും മലയാളി താരത്തിന് നിറകയ്യടി
സിക്സര് കൊണ്ട് മുറിവേറ്റ ആരാധികയെ നേരിട്ടെത്തി ആശ്വസിപ്പിച്ച് സഞ്ജു
ജൊഹാനസ്ബര്‍ഗ്: ദക്ഷിണാഫ്രിക്കയ്‌ക്കെതിരായ നാലാം ട്വന്റി20 മത്സരത്തിനിടെ സിക്‌സറിന് പറത്തിയ പന്ത് മുഖത്തുപതിച്ച് പരുക്കേറ്റ ആരാധികയെ നേരില്‍ക്കണ്ട് ആശ്വസിപ്പിച്ച് മലയാളി താരം സഞ്ജു സാംസണ്‍. സഞ്ജുവിന്റെ സിക്സര് മുഖത്തുപതിച്ച് പരുക്കേറ്റതിനെ തുടര്‍ന്ന് ഐസ്പായ്ക്കും മുഖത്തുവച്ച് കണ്ണീരണിഞ്ഞ് നില്‍ക്കുന്ന ആരാധികയുടെ ദൃശ്യങ്ങള്‍ മത്സരത്തിനിടെ ക്യാമറാമാന്മാര്‍ പങ്കുവച്ചിരുന്നു. ഈ ദൃശ്യങ്ങള്‍ സമൂഹമാധ്യമങ്ങളില്‍ വൈറലായിരുന്നു. ഇതിനു പിന്നാലെയാണ്, സഞ്ജു ഈ ആരാധികയെ നേരില്‍ക്കണ്ട് സംസാരിക്കുന്ന വിഡിയോ സമൂഹമാധ്യമങ്ങളില്‍ പ്രചരിക്കുന്നത്.
മത്സരത്തില്‍ ട്രിസ്റ്റന്‍ സ്റ്റബ്‌സ് എറിഞ്ഞ 10ാം ഓവറിലെ രണ്ടാം പന്തിലാണ് സഞ്ജുവിന്റെ സിക്സര് യുവതിയുടെ കവിളില്‍ കൊണ്ടത്. അര്‍ധ സെഞ്ചുറി പൂര്‍ത്തിയാക്കിയതിന് പിന്നാലെ അടുത്ത പന്തില്‍ സഞ്ജു വീണ്ടും സിക്സര് അടിക്കുകയായിരുന്നു. ഡീപ് മിഡ്വിക്കറ്റിന് മുകളിലൂടെ പന്ത് ബൗണ്ടറിക്ക് അപ്പുറത്തേക്ക് പറന്നു.
ഗാലറിയുടെ കൈവരിയില്‍ തട്ടിയ പന്ത് സുരക്ഷാ ജീവനക്കാരന്റെ മുകളിലൂടെ യുവതിയുടെ മുഖത്ത് ഇടിക്കുകയായിരുന്നു. സ്‌ട്രൈക്ക് എന്‍ഡില്‍ നില്‍ക്കുകയായിരുന്ന സഞ്ജു ഇത് കാണുകയും ആംഗ്യത്തിലൂടെ എന്തെങ്കിലും പറ്റിയോ എന്ന് സഞ്ജു ചോദിക്കുന്നതും വീഡിയോയില്‍ കാണാം. പിന്നാലെ മറ്റൊരാള്‍ ഐസ് വെച്ചുകൊടുക്കുന്നതും വിഡിയോയിലുണ്ട്.
ഈ ഐസ് പായ്ക്കും മുഖത്തുചേര്‍ത്തുവച്ച് യുവതി കണ്ണീരോടെ നില്‍ക്കുന്ന ദൃശ്യം മത്സരം സംപ്രേക്ഷണം ചെയ്ത ചാനലും കാണിക്കുന്നുണ്ടായിരുന്നു. ഈ ദൃശ്യങ്ങള്‍ സമൂഹമാധ്യമങ്ങളില്‍ ഉടന്‍ വൈറലാവുകയും ചെയ്തു. യുവതിയുടെ ദേഹത്തു പന്തു തട്ടിയെന്ന് തിരിച്ചറിഞ്ഞ സഞ്ജു, ക്ഷമാപണ രൂപത്തില്‍ കയ്യുയര്‍ത്തുന്നതും ദൃശ്യങ്ങളിലുണ്ട്.
സിക്സര് വന്ന് പതിച്ചതിനിടെ തുടര്‍ന്ന് വേദനകൊണ്ട കരയുന്ന യുവതിയുടെ ദൃശ്യങ്ങള്‍ മത്സരത്തിന് പിന്നാലെ വാര്‍ത്തകളില്‍ നിറഞ്ഞിരുന്നെങ്കിലും സഞ്ജു മത്സരശേഷം നേരിട്ട് ആശ്വസിപ്പിക്കുന്ന ദൃശ്യങ്ങള്‍ ഇപ്പോഴാണ് സാമൂഹ്യമാധ്യമങ്ങളില്‍ വ്യാപകമായി പുറത്തുവരുന്നത്. സഞ്ജുവിന്റെ പ്രവര്‍ത്തിക്ക് നിറഞ്ഞ കൈയടിയാണ് സമൂഹ്യമാധ്യമങ്ങളിലെങ്ങും.
മത്സരം അവസാനിച്ചതിനു പിന്നാലെതന്നെ സഞ്ജു ആരാധികയെ കാണാനെത്തിയെങ്കിലും, അതിന്റെ വിഡിയോ ഇപ്പോഴാണ് സമൂഹമാധ്യമങ്ങളില്‍ വ്യാപകമായി പ്രചരിക്കുന്നത്. സെഞ്ചറി നേട്ടത്തിന്റെ തിളക്കത്തില്‍ ഗാലറിയില്‍ യുവതിയെ കാണാനെത്തിയ സഞ്ജുവിനെ, ആരാധകര്‍ പൊതിയുന്നത് ദൃശ്യങ്ങളില്‍ കാണാം. ഒട്ടേറെ ആരാധകര്‍ സഞ്ജുവിനൊപ്പം സെല്‍ഫിയെടുക്കുന്നുമുണ്ട്. ഇതിനിടെയാണ്, തന്റെ സിക്സര് പതിച്ച് പരുക്കേറ്റ യുവതിയുമായി സഞ്ജു സംസാരിക്കുന്നത്.
പരുക്കേറ്റ ആരാധികയെ മത്സരത്തിനു പിന്നാലെ തന്നെ നേരിട്ടെത്തി ആശ്വസിപ്പിച്ച സഞ്ജുവിന്റെ പ്രവൃത്തിയെ പുകഴ്ത്തി ഒട്ടേറെ ആരാധകരാണ് ദൃശ്യങ്ങള്‍ പങ്കുവച്ചത്. മത്സരത്തില്‍ സെഞ്ചറി നേടിയ സഞ്ജു, രാജ്യാന്തര ട്വന്റി20യില്‍ ഒരു കലണ്ടര്‍ വര്‍ഷം മൂന്ന് സെഞ്ചറി നേടുന്ന ആദ്യ താരമെന്ന റെക്കോര്‍ഡ് ഉള്‍പ്പെടെ സ്വന്തമാക്കിയിരുന്നു. തിലക് വര്‍മയ്ക്കൊപ്പം പിരിയാത്ത രണ്ടാം വിക്കറ്റില്‍ ഇരട്ടസെഞ്ചറി കൂട്ടുകെട്ടു തീര്‍ത്തും സഞ്ജു റെക്കോര്‍ഡ് ബുക്കില്‍ ഇടംപിടിച്ചു. മത്സരത്തില്‍ കൂറ്റന്‍ വിജയം നേടിയ ഇന്ത്യ, 31ന് പരമ്പരയും സ്വന്തമാക്കിയിരുന്നു.
പരമ്പരയില്‍ തുടര്‍ച്ചയായ രണ്ടു ഡക്കുകള്‍ക്കു ശേഷം ഫോമിലേക്കു തിരിച്ചെത്തിയ സഞ്ജു, അര്‍ധസെഞ്ചറി പിന്നിട്ട് മുന്നേറുന്നതിനിടെയാണ് സംഭവം. ട്രിസ്റ്റന്‍ സ്റ്റബ്‌സ് എറിഞ്ഞ 10ാം ഓവറിലെ രണ്ടാം പന്തിലാണ്, സഞ്ജുവിന്റെ സിക്സര് യുവതിയുടെ ദേഹത്തു പതിച്ചത്. സ്റ്റബ്‌സിന്റെ ഓവര്‍ ആരംഭിക്കുമ്പോള്‍ 27 പന്തില്‍ 46 റണ്‍സുമായി സഞ്ജുവായിരുന്നു ക്രീസില്‍. ആദ്യ പന്തില്‍ ലോങ് ഓണിനു മുകളിലൂടെ തകര്‍പ്പന്‍ സിക്‌സറിനു പറത്തി സഞ്ജു രാജകീയമായി അര്‍ധസെഞ്ചറി പൂര്‍ത്തിയാക്കി. ആദ്യ മത്സരത്തിലെ സെഞ്ചറിയുടെ തിളക്കം കുറച്ച രണ്ട് തുടര്‍ ഡക്കുകള്‍ക്കു ശേഷം മലയാളി താരത്തിന് വീണ്ടുമൊരു അര്‍ധസെഞ്ചറി.
അര്‍ധസെഞ്ചറി നേട്ടം ആഘോഷിക്കാന്‍ അടുത്ത പന്തില്‍ സഞ്ജുവിന്റെ വക വീണ്ടും സിക്സര്. ഇത്തവണ ഡീപ് മിഡ്വിക്കറ്റിനു മുകളിലൂടെ പന്ത് ഗാലറിയിലേക്ക്. ഇതിനിടെ ഗാലറിയിലെ ആള്‍ക്കൂട്ടത്തിലേക്ക് വീണ പന്ത് സുരക്ഷാ ജീവനക്കാരന്റെ ദേഹത്തു തട്ടി യുവതിയുടെ മുഖത്തു പതിച്ചു.പന്തു മുഖത്തു പതിച്ചതിന്റെ വേദനയില്‍ കണ്ണീരോടെ നിന്ന യുവതിക്ക് സമീപത്തുനിന്നും ആരോ ഐസ് പായ്ക്ക് എത്തിച്ചുകൊടുത്തു.
