ചെന്നൈ സൂപ്പർ കിങ്സിന്റെ വജ്രായുധമാകാൻ ഓസീസ് കരുത്ത്; പരിക്കേറ്റ എല്ലിസിന് പകരമെത്തുന്നത് ഓസ്ട്രേലിയൻ പേസർ; സ്പെൻസർ ജോൺസൺ ഇനി മഞ്ഞക്കുപ്പായത്തിൽ
ചെന്നൈ: ഐപിഎൽ ആരംഭിക്കാൻ ദിവസങ്ങൾ മാത്രം ബാക്കി നിൽക്കെ ചെന്നൈ സൂപ്പർ കിങ്സ് നിരയിൽ നിർണ്ണായക മാറ്റം. പരിക്കേറ്റ് പുറത്തായ ഓസ്ട്രേലിയൻ പേസർ നേഥൻ എല്ലിസിന് പകരക്കാരനായി സ്പെൻസർ ജോൺസണെ ചെന്നൈ ടീമിലെത്തിച്ചു. മാർച്ച് 11-ന് നടന്ന ഏകദിന മത്സരത്തിനിടെയേറ്റ പരിക്ക് ഭേദമാകാൻ കൂടുതൽ സമയം വേണ്ടിവരുമെന്ന മെഡിക്കൽ റിപ്പോർട്ടുകളെത്തുടർന്നാണ് സിഎസ്കെ മാനേജ്മെന്റ് പകരക്കാരനെ തേടിയത്.
ഐപിഎൽ മൈതാനങ്ങളിൽ മുൻപും പന്തെറിഞ്ഞ് പരിചയമുള്ള താരമാണ് സ്പെൻസർ ജോൺസൺ. 2024-ലെ ലേലത്തിൽ 10 കോടി രൂപയുടെ വൻതുകയ്ക്ക് ഗുജറാത്ത് ടൈറ്റൻസ് സ്വന്തമാക്കിയ താരം, പിന്നീട് കൊൽക്കത്ത നൈറ്റ് റൈഡേഴ്സിന് വേണ്ടിയും കളത്തിലിറങ്ങിയിട്ടുണ്ട്. എന്നാൽ പ്രതീക്ഷിച്ച പ്രകടനം പുറത്തെടുക്കാൻ താരത്തിന് കഴിഞ്ഞിരുന്നില്ല. ഐപിഎല്ലിൽ ഇതുവരെ കളിച്ച 9 മത്സരങ്ങളിൽ നിന്നായി 27.2 ഓവർ ബൗൾ ചെയ്ത ജോൺസൺ 284 റൺസ് വഴങ്ങി 5 വിക്കറ്റുകൾ മാത്രമാണ് വീഴ്ത്തിയത്.
സീസണിലെ മോശം പ്രകടനത്തെത്തുടർന്ന് വിപണി മൂല്യം ഇടിഞ്ഞ ജോൺസണെ അടിസ്ഥാന വിലയായ 1.5 കോടി രൂപയ്ക്കാണ് ഇത്തവണ ചെന്നൈ സ്വന്തമാക്കിയത്. എം.എസ്. ധോണിയുടെയും സംഘത്തിന്റെയും തന്ത്രങ്ങൾക്കനുസരിച്ച് സ്പെൻസറിലെ പ്രതിഭയെ മിനുക്കിയെടുക്കാമെന്ന വിശ്വാസത്തിലാണ് ചെന്നൈ ക്യാമ്പ്.
മാർച്ച് 30-ന് ഗുവാഹത്തിയിൽ രാജസ്ഥാൻ റോയൽസിനെതിരെയാണ് ചെന്നൈയുടെ സീസണിലെ ആദ്യ പോരാട്ടം. ശക്തരായ രാജസ്ഥാനെതിരായ മത്സരത്തിൽ സ്പെൻസർ ജോൺസൺ ചെന്നൈയുടെ ബൗളിംഗ് നിരയെ നയിക്കാൻ ഇറങ്ങുമെന്നാണ് ആരാധകർ പ്രതീക്ഷിക്കുന്നത്.
