കാൺപുർ: ഓസ്‌ട്രേലിയക്കെതിരായ ടി20 പരമ്പര തുടങ്ങാനിരിക്കെ രഞ്ജി ട്രോഫിയിൽ ഉജ്ജ്വല സെഞ്ച്വറിയുമായി റിങ്കു സിങ്. ആന്ധ്രയ്‌ക്കെതിരായ മത്സരത്തിൽ 273 പന്തുകളിൽ 13 ബൗണ്ടറികളും 2 സിക്സറുകളും ഉൾപ്പെടെ 165 റൺസെടുത്ത് പുറത്താകാതെ നിന്ന റിങ്കുവിന്റെ പ്രകടനം ഉത്തർപ്രദേശിന് സമനില നൽകി.

ആന്ധ്രയുടെ ഒന്നാം ഇന്നിങ്‌സ് സ്കോറായ 470 റൺസെന്ന നിലയിൽ ഉത്തർപ്രദേശിന് തിരിച്ചടി നേരിട്ട ഘട്ടത്തിലാണ് റിങ്കു ബാറ്റിങ്ങിന് ഇറങ്ങിയത്. എന്നാൽ, വാലറ്റക്കാരെ കൂട്ടുപിടിച്ച് നടത്തിയ പോരാട്ടത്തിലൂടെ ടീമിനെ 8 വിക്കറ്റ് നഷ്ടത്തിൽ 471 റൺസിലെത്തിക്കാൻ അദ്ദേഹത്തിന് സാധിച്ചു. മഴയെത്തുടർന്ന് മത്സരം സമനിലയിൽ കലാശിച്ചു. അഞ്ചാം നമ്പറിലെത്തിയാണ് റിങ്കുവിന്റെ ഈ പ്രകടനം. ഫസ്റ്റ് ക്ലാസ് ക്രിക്കറ്റിലെ താരത്തിന്റെ എട്ടാമത്തെ സെഞ്ച്വറിയാണ്.

ഈ സെഞ്ച്വറിയോടെ അദ്ദേഹം ഫസ്റ്റ് ക്ലാസ് ക്രിക്കറ്റിൽ 3,400 റൺസും റിങ്കു പിന്നിട്ടു. ഇന്ത്യയും ഓസ്‌ട്രേലിയയും തമ്മിൽ അഞ്ച് മത്സരങ്ങളടങ്ങിയ ടി20 പരമ്പര ആരംഭിക്കാനിരിക്കെയാണ് റിങ്കുവിന്റെ ശ്രദ്ധേയമായ പ്രകടനം. ഇന്ത്യൻ ടി20 ടീമിലെ സ്ഥിരം സാന്നിധ്യമായ റിങ്കുവിന് ഏഷ്യാ കപ്പ് ടീമിൽ ഇടമുണ്ടായിരുന്നെങ്കിലും പ്ലെയിങ് ഇലവനിൽ അവസരം ലഭിച്ചിരുന്നില്ല.

ഫൈനലിൽ പാക്കിസ്ഥാനെതിരെ വെറും ഒരു പന്ത് നേരിട്ട റിങ്കു, ആ പന്തിൽ ബൗണ്ടറിയടിച്ച് ടീമിന്റെ വിജയ റൺ കുറിച്ചിരുന്നു. മുൻനിര കളിക്കാരനായ ഹർദിക് പാണ്ഡ്യ പരിക്കേറ്റ് പുറത്തായ സാഹചര്യത്തിൽ, ടീമിന്റെ മികച്ച ഫിനിഷർ എന്ന നിലയിൽ റിങ്കുവിന് ഓസ്‌ട്രേലിയൻ പരമ്പരയിൽ പ്ലെയിങ് ഇലവനിൽ അവസരം ലഭിക്കുമെന്ന പ്രതീക്ഷയിലാണ് ആരാധകർ.

ഓസ്‌ട്രേലിയരഞ്ജി ട്രോഫിറിങ്കു സിങ്

സ്വന്തം ലേഖകൻ