അഡ്മിറ്റ് കാർഡ് വാങ്ങി, പക്ഷേ പരീക്ഷയ്ക്ക് പോയില്ല; പത്താം ക്ലാസ് സിബിഎസ്ഇ പരീക്ഷ ഉപേക്ഷിച്ച് വൈഭവ്; 'ആബ്സെന്റ് രേഖപ്പെടുത്തി സ്കൂൾ പ്രിൻസിപ്പൽ

സമസ്തിപൂർ: അണ്ടർ 19 ലോകകപ്പിലെ വിസ്മയ പ്രകടനത്തിലൂടെ ഇന്ത്യയുടെ ലോകകപ്പ് വിജയത്തിൽ നിർണ്ണായക പങ്ക് വഹിച്ച യുവതാരം വൈഭവ് സൂര്യവംശി പത്താം ക്ലാസ് സിബിഎസ്ഇ പരീക്ഷയ്ക്ക് ഹാജരായില്ല. ബിഹാറിലെ സമസ്തിപൂരിലുള്ള പോഡാർ ഇന്റർനാഷണൽ സ്കൂളിലായിരുന്നു താരം പരീക്ഷ എഴുതേണ്ടിയിരുന്നത്. എന്നാൽ ക്രിക്കറ്റ് തിരക്കുകൾ കാരണം പരീക്ഷയ്ക്ക് എത്താൻ കഴിയില്ലെന്ന് സ്കൂൾ അധികൃതർ സ്ഥിരീകരിച്ചു.

പരീക്ഷാ ഹാളിലെത്താതെ വൈഭവ്

പരീക്ഷയ്ക്കുള്ള ഫോം പൂരിപ്പിക്കുകയും അഡ്മിറ്റ് കാർഡ് കൈപ്പറ്റുകയും ചെയ്തിരുന്നെങ്കിലും, അവസാന നിമിഷം താരം പരീക്ഷ എഴുതേണ്ടതില്ലെന്ന് തീരുമാനിക്കുകയായിരുന്നു. ചൊവ്വാഴ്ച ആരംഭിച്ച പരീക്ഷയിൽ വൈഭവിനെ 'ആബ്സെന്റ്' ആയി രേഖപ്പെടുത്തിയെന്ന് സ്കൂൾ പ്രിൻസിപ്പൽ എൻ.കെ സിൻഹ പറഞ്ഞു. ക്രിക്കറ്റ് മത്സരമോ പരിശീലനമോ ആയിരിക്കും അസാന്നിധ്യത്തിന് കാരണമെന്നും അടുത്ത തവണ താരം പരീക്ഷ എഴുതുമെന്ന് പ്രതീക്ഷിക്കുന്നതായും അദ്ദേഹം കൂട്ടിച്ചേർത്തു.

ലോകകപ്പിലെ 'യഥാർത്ഥ ഹീറോ'

സിംബാബ്‌വെയിലും നമീബിയയിലുമായി നടന്ന 2026-ലെ അണ്ടർ 19 ലോകകപ്പിൽ ഇന്ത്യയുടെ കുതിപ്പിന് പിന്നിലെ കരുത്ത് വൈഭവ് ആയിരുന്നു. ടൂർണമെന്റിലുടനീളം 439 റൺസ് അടിച്ചുകൂട്ടിയ വൈഭവ്, ഏറ്റവും കൂടുതൽ റൺസ് നേടിയ രണ്ടാമത്തെ താരമായി. ഫെബ്രുവരി 6-ന് ഇംഗ്ലണ്ടിനെതിരെ നടന്ന ഫൈനലിൽ വെറും 80 പന്തിൽ നിന്ന് താരം അടിച്ചുകൂട്ടിയ 175 റൺസാണ് ഇന്ത്യയ്ക്ക് ആറാം ലോകകപ്പ് കിരീടം നേടിക്കൊടുത്തത്.

കഴിഞ്ഞ ഐപിഎൽ സീസണിൽ രാജസ്ഥാൻ റോയൽസിനായി ഗുജറാത്ത് ടൈറ്റൻസിനെതിരെ സെഞ്ചുറി നേടിയതോടെയാണ് വൈഭവ് ക്രിക്കറ്റ് ലോകത്തിന്റെ ശ്രദ്ധാകേന്ദ്രമായി മാറിയത്. പരീക്ഷാ ഹാളിലെത്തിയില്ലെങ്കിലും വരും കാലങ്ങളിൽ ഇന്ത്യൻ സീനിയർ ടീമിലെ അവിഭാജ്യ ഘടകമായി ഈ ഇടങ്കയ്യൻ ബാറ്റർ മാറുമെന്നാണ് ആരാധകർ വിശ്വസിക്കുന്നത്.