'സീറോയില്‍ നിന്ന് ഹീറോയിലേക്ക്'; അരങ്ങേറ്റ ടെസ്റ്റില്‍ സെഞ്ചുറി നേടുന്ന മൂന്നാമത്തെ ഇന്ത്യന്‍ താരം, പെര്‍ത്തില്‍ തകര്‍ത്തത് കോഹ്‌ലിയുടെ റെക്കോഡും, 23 വയസിന് മുമ്പ് കൂടുതല്‍ ടെസ്റ്റ് സെഞ്ചുറികള്‍ നേടുന്ന മൂന്നാമത്തെ ഇന്ത്യന്‍ താരം; ഒറ്റ സെഞ്ചുറിയില്‍ പിറന്നത് ഒരുപിടി റെക്കോഡുകള്‍; ഇതിഹാസങ്ങള്‍ക്കൊപ്പം ഇനി യശസ്വി ജയ്‌സ്വാളും
പെര്‍ത്ത്: ഓസ്ട്രേലിയയിലെ എന്നല്ല ലോക ക്രിക്കറ്റിലെ തന്നെ ഏറ്റവും അപകടകാരിയായ ബോളര്‍മാര്‍മാരില്‍ ഒരാളായ മിച്ചല്‍ സ്റ്റാര്‍ക്കിനെ ഒന്ന് വെല്ലുവിളിക്കാനോ തുറിച്ചുനോക്കാനോ ലോകോത്തര ക്രിക്കറ്റ് താരങ്ങള്‍ ആരും തന്നെ ഇഷ്ടപെടുന്ന കാര്യമല്ല. കാരണം ഏത് സാഹചര്യത്തിലും പിച്ചില്‍ അത്ഭുതം കാണിക്കുന്ന സ്റ്റാര്‍ക്കിന്റെ വേഗതയേറിയ പന്തുകള്‍ അവരുടെ വിക്കറ്റ് എടുക്കുക മാത്രമല്ല ചിലപ്പോള്‍ വേദനയും നല്‍കാം. അങ്ങനെയുള്ള സ്റ്റാര്‍ക്കിന്റെ പന്തുകള്‍ക്ക് വേഗത പോരാ എന്ന് പറഞ്ഞ് അയാളെ അയാളുടെ മണ്ണില്‍ പോയി സ്ലെഡ്ജ് ചെയ്ത താരത്തിന്റെ പേരാണ് 'യശ്വസി ജയ്സ്വാള്''.
ഇപ്പോഴിതാ ബോര്‍ഡര്‍- ഗവാസ്‌ക്കര്‍ ട്രോഫിയിലെ ആദ്യ മത്സരത്തിലെ രണ്ടാം ഇന്നിങ്‌സില്‍ തകര്‍പ്പന്‍ സെഞ്ചക്കറി നേടി താന്‍ സ്റ്റാര്‍ക്കിനെതിരെ നടത്തിയ വെല്ലുവിളി വെറുതെ ഒരു മണ്ടത്തരം ആയില്ല എന്ന് താരം തെളിയിച്ചിരിക്കുകയാണ്. ഈ സെഞ്ചുറി നേട്ടത്തോടെ ഒരുപിടി റെക്കോഡുകളും താരം സ്വന്തമാക്കിയിരിക്കുകയാണ്. ഓസ്ട്രേലിയയിലെ തന്റെ അരങ്ങേറ്റ ടെസ്റ്റില്‍ സെഞ്ചുറി നേടിയതിലൂടെ ഈ നേട്ടം സ്വന്തമാക്കുന്ന മൂന്നാമത്തെ മാത്രം ഇന്ത്യന്‍ താരമെന്ന റെക്കോര്‍ഡ് യശസ്വി സ്വന്തമാക്കി.
1968ല്‍ ബ്രിസ്‌ബേനില്‍ മോടാഗാന്‍ഹള്ളി ജയ്സിംഹയും(101) 1977ല്‍ ബ്രിസ്‌ബേനില്‍ സുനില്‍ ഗവാസ്‌കറുമാണ്(113) ഓസ്‌ട്രേലിയയില്‍ അരങ്ങേറ്റ ടെസ്റ്റില്‍ ജയ്‌സ്വാളിന് മുമ്പ് സെഞ്ചുറി നേടിയിട്ടുള്ള ഇന്ത്യന്‍ താരങ്ങള്‍. പെര്‍ത്തില്‍ 2000നുശേഷം സെഞ്ചുറി നേടുന്ന രണ്ടാമത്തെ മാത്രം ഇന്ത്യന്‍ ബാറ്ററുമാണ് ജയ്സ്വാള്. 2018ല്‍ വിരാട് കോലിയാണ് ഈ നൂറ്റാണ്ടില്‍ പെര്‍ത്തില്‍ സെഞ്ചുറി നേടിയ മറ്റൊരു ഇന്ത്യന്‍ താരം.
ഇതിന് പുറമെ 23 വയസിന് മുമ്പ് കൂടുതല്‍ ടെസ്റ്റ് സെഞ്ചുറികള്‍ നേടുന്ന ഇന്ത്യന്‍ താരങ്ങളില്‍ ജയ്സ്വാള് മൂന്നാം സ്ഥാനത്തേക്ക് കയറി. സച്ചിന്‍ ടെന്‍ഡുല്‍ക്കര്‍(8), രവി ശാസ്ത്രി(5) എന്നിവരാണ് 23 വയസാകും മുമ്പ് ഏറ്റവും കൂടുതല്‍ ടെസ്റ്റ് സെഞ്ചുറി നേടിയ ഇന്ത്യന്‍ താരങ്ങളില്‍ മുന്നിലുള്ളവര്‍.
നാലു സെഞ്ചുറികള്‍ നേടിയ വിനോദ് കാംബ്ലിക്കൊപ്പമാണ് ജയ്‌സ്വാളിപ്പോള്‍. ഒരു വര്‍ഷം ഏറ്റവും കൂടുതല്‍ ടെസ്റ്റ് സെഞ്ചുറികള്‍ നേടുന്ന ഇന്ത്യന്‍ താരങ്ങളിലും ജയ്സ്വാള് മൂന്നാം സ്ഥാനത്തെത്തി. 1971ല്‍ സുനില്‍ ഗവാസ്‌കര്‍(4), 1993ല്‍ വിനോദ് കാംബ്ലി(4) എന്നിവരാണ് ജയ്‌സ്വാളിന് മുന്നിലുള്ളത്. 1984ല്‍ രവി ശാസ്ത്രിയും 1992ല്‍ സച്ചിന്‍ ടെന്‍ഡുല്‍ക്കറും മൂന്ന് സെഞ്ചുറികള്‍ വീതം നേടിയിട്ടുണ്ട്.
ഒരു കലണ്ടര്‍ വര്‍ഷത്തില്‍ ടെസ്റ്റില്‍ ഏറ്റവും കൂടുതല്‍ സിക്‌സ് നേടുന്ന താരമെന്ന റെക്കോര്‍ഡും ജയസ്വാളിന് സ്വന്തമായി. 34 സിക്‌സുകളാണ് താരം ഈ വര്‍ഷം സ്വന്തമാക്കിയത്. 33 സിക്‌സുകള്‍ നേടിയ കിവീസ് താരം ബ്രണ്ടന്‍ മക്കല്ലത്തിന്റെയും, 26 സിക്‌സുകള്‍ സ്വന്തമാക്കിയ ഇംഗ്‌ളണ്ട് ടെസ്റ്റ് ടീം ക്യാപ്റ്റന്‍ ബെന്‍ സ്റ്റോക്‌സിന്റെയും റെക്കോഡാണ് യശ്വസി തകര്‍ത്തത്.
ഓസ്‌ട്രേലിയക്കെതിരായ പെര്‍ത്ത് ടെസ്റ്റില്‍ 297 പന്തുകളില്‍ 15 ഫോറും മൂന്ന് സിക്‌സും പറത്തി 161 റണ്‍സെടുത്താണ് യശസ്വി പുറത്തായത്. കരിയറില്‍ ഇതുവരെ 15 ടെസ്റ്റുകള്‍ കളിച്ച ജയ്സ്വാള് 58.07 ശരാശരിയില്‍ രണ്ട് ഡബിള്‍ സെഞ്ചുറികളടക്കം നാലു സെഞ്ചുറികളും എട്ട് അര്‍ധസെഞ്ചുറികളും ഉള്‍പ്പെടെ 1568 റണ്‍സാണ് ഇതുവരെ നേടിയത്.
ആദ്യ 15 ടെസ്റ്റുകള്‍ക്ക് ശേഷം ഏറ്റവും കൂടുതല്‍ റണ്‍സടിച്ച താരങ്ങളില്‍ ഡോണ്‍ ബ്രാഡ്മാന്‍(2115), മാര്‍ക് ടെയ്ലര്‍(1618), എവര്‍ട്ടണ്‍ വീക്‌സ്(1576) എന്നിവര്‍ മാത്രമാണ് ഇനി ജയ്‌സ്വാളിന് മുന്നിലുള്ളത്. ഇന്ത്യന്‍ താരങ്ങളില്‍ വിജയ് ഹസാരെയെ(1420) ജയ്സ്വാള് നേരത്തെ മറികടന്നിരുന്നു.
