പകരം വീട്ടാൻ റയൽ മാഡ്രിഡ്; എംബാപ്പെ മടങ്ങിയെത്തും?; പരിക്കിന്റെ പിടിയില് ബാഴ്സലോണ; സ്പാനിഷ് സൂപ്പർ കപ്പ് ഫൈനലിൽ 'എൽ ക്ലാസിക്കോ' പോരാട്ടം
ജിദ്ദ: സ്പാനിഷ് സൂപ്പർ കപ്പ് ഫൈനലിൽ ഇന്ന് 'എൽ ക്ലാസിക്കോ' പോരാട്ടം. നിലവിലെ ചാമ്പ്യൻമാരായ ബാഴ്സലോണയും ചിരവൈരികളായ റയൽ മഡ്രിഡുമാണ് ജിദ്ദയിലെ കിങ് അബ്ദുല്ല സ്പോർട്സ് സിറ്റിയിൽ കിരീടപ്പോരാട്ടത്തിനായി മുഖാമുഖം വരുന്നത്. സൗദി അറേബ്യയിലെ കിംഗ് അബ്ദുള്ള സ്പോർട്സ് സിറ്റി സ്റ്റേഡിയത്തിൽ പ്രാദേശിക സമയം രാത്രി 10 മണിക്കാണ് മത്സരം.
സെമി ഫൈനലിൽ അത്ലറ്റിക് ബിൽബാവോയെ എതിരില്ലാത്ത അഞ്ച് ഗോളിന് തകർത്തെറിഞ്ഞാണ് ബാഴ്സലോണ ഫൈനലിൽ പ്രവേശിച്ചത്. അതേസമയം, അത്ലറ്റികോ മഡ്രിഡിനെ രണ്ടിനെതിരെ ഒരു ഗോളിന് കീഴടക്കിയാണ് റയൽ മഡ്രിഡിന്റെ ഫൈനൽ പ്രവേശം. കഴിഞ്ഞ വർഷത്തെ ഫൈനലിൽ റയലിനെ 5-2ന് തകർത്ത് കിരീടം നേടിയ ബാഴ്സലോണയെ കീഴടക്കി പകരം വീട്ടാനാണ് ഇത്തവണ റയൽ മഡ്രിഡ് ലക്ഷ്യമിടുന്നത്.
ബാഴ്സലോണയ്ക്ക് അവരുടെ മധ്യനിര താരം ഗാവി, പ്രതിരോധനിര താരം ആന്ദ്രിയാസ് ക്രിസ്റ്റൻസെൻ എന്നിവരെ നഷ്ടമാകും. ഗാവിക്ക് കാൽമുട്ടിന് ശസ്ത്രക്രിയയും ക്രിസ്റ്റൻസെന് എസിഎൽ പരിക്കും കാരണം കളിക്കാനാകില്ല. റയൽ മാഡ്രിഡ് പ്രതിരോധനിര താരം അന്റോണിയോ റൂഡിഗറിന് കാൽമുട്ടിന് പരിക്കുള്ളതിനാൽ സംശയത്തിലാണ്.
കാൽമുട്ടിനേറ്റ പരിക്ക് മാറി എംബാപ്പെ ടീമിനൊപ്പം സൗദി അറേബ്യയിൽ എത്തിയിട്ടുണ്ടെങ്കിലും, ഫൈനലിൽ കളിക്കുന്നതിനെക്കുറിച്ചുള്ള അന്തിമ തീരുമാനം പുറത്ത് വന്നിട്ടില്ല. കാൽമുട്ടിനേറ്റ ഉളുക്കിനെ തുടർന്നാണ് എംബാപ്പെ വിശ്രമത്തിലായിരുന്നത്. മൂന്നാഴ്ചത്തെ വിശ്രമമാണ് പരിക്ക് ഭേദമാകാൻ വേണ്ടിയിരുന്നത്. വ്യാഴാഴ്ച നടന്ന സെമി ഫൈനലിൽ അത്ലറ്റിക്കോ മാഡ്രിഡിനെതിരെയും ലാ ലിഗയിൽ റയൽ ബെറ്റിസിനെതിരെയും എംബാപ്പെക്ക് കളിക്കാനായിരുന്നില്ല. ഈ സീസണിൽ എല്ലാ മത്സരങ്ങളിലുമായി 29 ഗോളുകളുമായി റയലിന്റെ ടോപ് ഗോൾ സ്കോററാണ് ഫ്രഞ്ച് സൂപ്പർ താരം.
ബാഴ്സലോണയെ തോൽപ്പിക്കാൻ കഴിഞ്ഞാൽ റയൽ മാഡ്രിഡിനൊപ്പമുള്ള അലോൺസോയുടെ ആദ്യ ട്രോഫിയായിരിക്കും ഇത്. ബാഴ്സലോണയെ തോൽപ്പിക്കുന്നത് അലോൺസോക്ക് റയൽ മാഡ്രിഡിന്റെ പരിശീലകനായി തുടരാൻ കൂടുതൽ സമയം നൽകും. എന്നാൽ, ഹാൻസി ഫ്ലിക്കിന്റെ ബാഴ്സലോണയോട് തോൽക്കുകയാണെങ്കിൽ, ജൂണിൽ അലോൺസോയെ നിയമിച്ച റയൽ പ്രസിഡന്റ് ഫ്ലോറന്റിനോ പെരസിന് അദ്ദേഹത്തെ പുറത്താക്കാൻ പുതിയൊരു കാരണം ലഭിച്ചേക്കാം.
