ടോക്കിയോ: ഒരേ മത്സരവേദിയിൽ രണ്ട് ബോക്സർമാർ മരിച്ചതിനെ തുടർന്ന് ജപ്പാനിലെ ബോക്സിംഗ് ലോകം കടുത്ത പ്രതിസന്ധിയിലെന്ന് വിവരങ്ങൾ. സംഭവത്തെ തുടർന്ന് രാജ്യത്തെ ബോക്സിംഗ് കമ്മീഷൻ ചൊവ്വാഴ്ച അടിയന്തര യോഗം വിളിച്ചുചേർത്തു. സൂപ്പർ ഫെതർവെയ്റ്റ് താരം ഷിഗെതോഷി കൊട്ടാരി, ലൈറ്റ് വെയിറ്റ് താരം ഹിരോമാസ ഉറക്കാവ എന്നിവരാണ് മത്സരത്തിനിടെ തലച്ചോറിനേറ്റ പരിക്കിനെ തുടർന്ന് മരണപ്പെട്ടത്.

ഓഗസ്റ്റ് 2-ന് ടോക്കിയോയിലെ പ്രശസ്തമായ കൊറാക്വെൻ ഹാളിൽ നടന്ന മത്സരങ്ങൾക്ക് ദിവസങ്ങൾക്ക് ശേഷമാണ് ഇരുവരും മരണത്തിന് കീഴടങ്ങിയത്. തലച്ചോറിൽ നടത്തിയ ശസ്ത്രക്രിയക്ക് ശേഷമായിരുന്നു അന്ത്യം. ഈ ദാരുണ സംഭവങ്ങൾ ജപ്പാനിലെ ബോക്സിംഗ് രംഗത്ത് വലിയ കോളിളക്കം സൃഷ്ടിക്കുകയും കായികരംഗത്തെ സുരക്ഷയെക്കുറിച്ച് ആശങ്കകൾ ഉയർത്തുകയും ചെയ്തിട്ടുണ്ട്.

ജിം ഉടമകളും മറ്റ് ബോക്സിംഗ് ഭാരവാഹികളും ഉൾപ്പെടുന്ന അടിയന്തര യോഗത്തിൽ കടുത്ത തീരുമാനങ്ങൾ ഉണ്ടാകുമെന്നാണ് സൂചന. "ഈ കായിക വിനോദത്തിൻ്റെ നടത്തിപ്പുകാർ എന്ന നിലയിൽ ഞങ്ങൾ ഞങ്ങളുടെ ഉത്തരവാദിത്തത്തെക്കുറിച്ച് പൂർണമായി ബോധവാന്മാരാണ്," ജപ്പാൻ ബോക്സിംഗ് കമ്മീഷൻ (ജെബിസി) സെക്രട്ടറി ജനറൽ സുയോഷി യാസുകോച്ചി മാധ്യമങ്ങളോട് പറഞ്ഞു. "കഴിയുന്ന എല്ലാ നടപടികളും ഞങ്ങൾ സ്വീകരിക്കും," അദ്ദേഹം കൂട്ടിച്ചേർത്തു.

മത്സരത്തിന് മുൻപ് ഭാരം കുറയ്ക്കുന്നതിനായി ബോക്സർമാർ നടത്തുന്ന തീവ്രമായ നിർജലീകരണം തലച്ചോറിൽ രക്തസ്രാവത്തിനുള്ള സാധ്യത വർധിപ്പിക്കുമെന്ന് ജാപ്പനീസ് മാധ്യമങ്ങൾ റിപ്പോർട്ട് ചെയ്യുന്നു. ഈ വിഷയം പരിശീലകരുമായി ചർച്ച ചെയ്യുമെന്ന് കമ്മീഷൻ അറിയിച്ചിട്ടുണ്ട്.

അടിയന്തര നടപടിയെന്ന നിലയിൽ, ഓറിയന്റൽ ആൻഡ് പസഫിക് ബോക്സിംഗ് ഫെഡറേഷൻ ടൈറ്റിൽ മത്സരങ്ങൾ 12 റൗണ്ടിൽ നിന്ന് 10 ആയി കുറയ്ക്കാൻ കമ്മീഷൻ തീരുമാനിച്ചു. "ഇന്നത്തെ ജപ്പാനീസ് ബോക്സിംഗിലെ ആക്രമണ ശേഷി വളരെ വലുതാണ്. ആദ്യ റൗണ്ട് മുതൽ തന്നെ ശക്തമായ പ്രഹരങ്ങൾ ഏൽപ്പിക്കാൻ കഴിവുള്ള ബോക്സർമാർ നമുക്കുണ്ട്. 12 റൗണ്ടുകൾ അപകടകരമായേക്കാം," യാസുകോച്ചി വ്യക്തമാക്കി.

ഈ ഇരട്ടമരണങ്ങൾ ജപ്പാനിലെ ബോക്സിംഗ് രംഗത്ത് സുരക്ഷാ നടപടികളെക്കുറിച്ചുള്ള വലിയ ചർച്ചകൾക്ക് തുടക്കമിട്ടിരിക്കുകയാണ്. വരും ദിവസങ്ങളിൽ ചേരുന്ന യോഗങ്ങൾ കൂടുതൽ കർശനമായ നിയന്ത്രണങ്ങൾ കൊണ്ടുവരുമെന്നാണ് കായികലോകം പ്രതീക്ഷിക്കുന്നത്.

ടോക്കിയോബോക്സർമാർമരണം

സ്വന്തം ലേഖകൻ