ബാങ്കോക്ക്: തായ്‌ലൻഡിൽ നടക്കുന്ന എ.എഫ്.സി. അണ്ടർ 20 വനിതാ ഏഷ്യൻ കപ്പ് 2026-ൽ ഇന്ത്യൻ വനിതാ ഫുട്ബോൾ ടീമിന് കടുത്ത വെല്ലുവിളി. 'യങ് ടൈഗ്രസസ്' എന്നറിയപ്പെടുന്ന ഇന്ത്യൻ ടീം ടൂർണമെന്റിലെ ഏറ്റവും കഠിനമായ ഗ്രൂപ്പുകളിലൊന്നായ ഗ്രൂപ്പ് സിയിലാണ് ഇടം നേടിയിരിക്കുന്നത്. ഫുട്ബോൾ ശക്തികളായ ജപ്പാൻ, ഓസ്ട്രേലിയ, ചൈനീസ് തായ്‌പേയ് എന്നിവർക്കൊപ്പമാണ് ഇന്ത്യ മത്സരിക്കുന്നത്. ഏപ്രിൽ 1 മുതൽ 18 വരെയാണ് ടൂർണമെന്റ്.

2006-ന് ശേഷം ഇതാദ്യമായാണ് ഇന്ത്യ ഈ ടൂർണമെന്റിൽ പങ്കെടുക്കുന്നത്. ആറുതവണ ചാമ്പ്യൻമാരായ ജപ്പാൻ ഗ്രൂപ്പ് സിയിലെ പ്രധാന എതിരാളിയാണ്. ഓസ്ട്രേലിയയും ചൈനീസ് തായ്‌പേയും ശക്തമായ മറ്റ് ടീമുകളാണ്. യോഗ്യതാ റൗണ്ടിൽ ഒന്നാം സ്ഥാനം നേടി പോട്ട് 4-ൽ എത്തിയ ഇന്ത്യക്ക് മുന്നിൽ കടുത്ത മത്സരങ്ങളാണ് പ്രതീക്ഷിക്കുന്നത്. എങ്കിലും മികച്ച പ്രകടനം കാഴ്ചവെച്ച് ചരിത്രപരമായ മുന്നേറ്റം നടത്താമെന്ന പ്രതീക്ഷയിലാണ് ടീം.

ഓരോ ഗ്രൂപ്പിലെയും ആദ്യ രണ്ട് സ്ഥാനക്കാർക്കും, ഏറ്റവും മികച്ച രണ്ട് മൂന്നാം സ്ഥാനക്കാർക്കും ക്വാർട്ടർ ഫൈനലിലേക്ക് യോഗ്യത നേടാം. ടൂർണമെന്റിലെ സെമിഫൈനലിൽ എത്തുന്ന നാല് ടീമുകൾക്ക് പോളണ്ടിൽ നടക്കുന്ന ഫിഫ അണ്ടർ 20 വനിതാ ലോകകപ്പ് 2026-ൽ കളിക്കാൻ അവസരം ലഭിക്കും.

അണ്ടർ 20 വനിതാ ഏഷ്യൻ കപ്പ്ഇന്ത്യഗ്രൂപ്പ് സി

സ്വന്തം ലേഖകൻ