പെനാൽട്ടി പാഴാക്കിയത് പകരക്കാരനായി ഇറങ്ങിയ ലൂക്കാസ് പാക്വെറ്റ; ഡെക്കാത്‌ലോൺ അരീനയിൽ സമനില പിടിച്ച് ബ്രസീലിനെ ഞെട്ടിച്ച് തുനീഷ്യ; സൗഹൃദ മത്സരത്തിൽ തലകുനിച്ച് മടങ്ങി കാനറികൾ
പാരീസ്: 2025-ലെ തങ്ങളുടെ അവസാന അന്താരാഷ്ട്ര സൗഹൃദ മത്സരത്തിലും വിജയമില്ലാതെ മടങ്ങി കാനറികൾ. ലോക ഫുട്ബോളിലെ അതികായരായ ബ്രസീൽ ഫ്രാൻസിലെ ഡെക്കാത്‌ലോൺ അരീനയിൽ നടന്ന പോരാട്ടത്തിൽ ആഫ്രിക്കൻ കരുത്തരായ തുനീഷ്യയോട് 1-1 സമനില വഴങ്ങുകയായിരുന്നു. നിരവധി മികച്ച മുന്നേറ്റങ്ങൾ നടത്തിയെങ്കിലും, ലഭിച്ച അവസരങ്ങൾ മുതലെടുക്കാൻ സാധിക്കാത്തതും, നിർണായകമായ പെനാൽറ്റി പാഴാക്കിയതുമാണ് ബ്രസീലിന് തിരിച്ചടിയായത്.
മത്സരത്തിൽ ആരാധകരെ ഞെട്ടിച്ച് ആദ്യം ലീഡ് നേടിയത് തുനീഷ്യയായിരുന്നു. കളി തുടങ്ങി 23-ാം മിനിറ്റിൽ തന്നെ ഹസീം മസ്തൂരിയുടെ തകർപ്പൻ ഗോളിലൂടെ തുനീഷ്യ ബ്രസീലിനെതിരെ മുന്നിലെത്തി (1-0). ഗോൾ വഴങ്ങിയതോടെ ഉണർന്നു കളിച്ച ബ്രസീൽ സമനില ഗോളിനായി നിരന്തരം ശ്രമിക്കുകയും തുനീഷ്യൻ ബോക്സിനെ സമ്മർദ്ദത്തിലാക്കുകയും ചെയ്തു. ഇതിന്റെ ഫലമായി ആദ്യ പകുതി അവസാനിക്കുന്നതിന് തൊട്ടുമുമ്പ്, 44-ാം മിനിറ്റിൽ ബ്രസീലിന് അനുകൂലമായി ഒരു പെനാൽറ്റി ലഭിച്ചു. യുവതാരം എസ്റ്റാവായോ ആത്മവിശ്വാസത്തോടെ കിക്കെടുത്ത് വലയിലാക്കി ബ്രസീലിനെ ഒപ്പമെത്തിച്ചു (1-1). സമനിലയിൽ പിരിഞ്ഞ ആദ്യ പകുതി ഇരു ടീമുകൾക്കും പ്രതീക്ഷ നൽകുന്നതായിരുന്നു.
രണ്ടാം പകുതിയിൽ വിജയത്തിനായി ബ്രസീൽ ആക്രമണം ശക്തമാക്കി. പരിശീലകൻ മാത്യൂസ് കുഞ്ഞക്ക് പകരം വിറ്റർ റോക്കിനെ കളത്തിലിറക്കിയതുൾപ്പെടെ നിരവധി മാറ്റങ്ങളിലൂടെ കളിക്ക് വേഗം കൂട്ടാൻ ശ്രമിച്ചു. ഈ ശ്രമങ്ങൾക്കിടെയാണ് കളിയിലെ നാടകീയ നിമിഷം പിറന്നത്. 78-ാം മിനിറ്റിൽ പകരക്കാരനായെത്തിയ വിറ്റർ റോക്കിനെ തുനീഷ്യൻ താരം ഫൗൾ ചെയ്തതിന് റഫറി വീണ്ടും ബ്രസീലിന് അനുകൂലമായി പെനാൽറ്റി വിധിച്ചു.
എന്നാൽ, ഇത്തവണ കിക്കെടുക്കാൻ വന്ന ബ്രൂണോ ഗുയ്മെറസിന് പകരമിറങ്ങിയ ലൂക്കാസ് പാക്വെറ്റയുടെ ഷോട്ട് എല്ലാവരെയും നിരാശരാക്കി. പോസ്റ്റിന്റെ വലത് മൂല ലക്ഷ്യമാക്കിയെടുത്ത പാക്വെറ്റയുടെ ഇടങ്കാലൻ ഷോട്ട് ബാറിന് മുകളിലൂടെ കുതിച്ച് ഗാലറിയിലേക്ക് പറന്നുയർന്നു. വിജയം ഉറപ്പിക്കാനുള്ള സുവർണ്ണാവസരമാണ് പാക്വെറ്റ പാഴാക്കിയത്. തുടർന്ന് വീണ്ടും ആക്രമണം കടുപ്പിച്ച ബ്രസീൽ 88-ാം മിനിറ്റിൽ വീണ്ടും ഒരു പെനാൽറ്റിക്കായി വാദിച്ചെങ്കിലും റഫറി അനുവദിച്ചില്ല.
ഇതോടെ തുനീഷ്യയുടെ പ്രതിരോധം ഭേദിക്കാൻ സാധിക്കാതെ കാനറികൾക്ക് സമനില സമ്മതിക്കേണ്ടി വന്നു. മികച്ച താരനിരയുണ്ടായിട്ടും, അവസരങ്ങൾ മുതലെടുക്കാനാകാത്തതും പാക്വെറ്റയുടെ പിഴവും ബ്രസീൽ ടീമിന്റെ പ്രകടനത്തെ ചോദ്യം ചെയ്യുന്നതായി. തുനീഷ്യയ്‌ക്കെതിരെ നേടാൻ സാധിക്കാത്തത് ബ്രസീലിയൻ ആരാധകരെ നിരാശരാക്കിയിട്ടുണ്ട്.
