ദോഹ: ഫിഫ അണ്ടർ-17 ഫുട്ബോൾ ലോകകപ്പിന്റെ ആവേശകരമായ രണ്ടാം സെമിഫൈനലിൽ ലാറ്റിൻ അമേരിക്കൻ കരുത്തരായ ബ്രസീലിനെ തകർത്ത് പോർച്ചുഗൽ ഫൈനലിൽ. നിശ്ചിത സമയത്തും അധിക സമയത്തും ഗോൾരഹിത സമനില പാലിച്ചതിനെ തുടർന്ന് മത്സരം പെനാൽറ്റി ഷൂട്ടൗട്ടിലേക്ക് നീങ്ങുകയായിരുന്നു. ഷൂട്ടൗട്ടിൽ 6-5നാണ് പോർച്ചുഗൽ വിജയിച്ച് കലാശപ്പോരിന് ടിക്കറ്റെടുത്തത്.

മത്സരത്തിലുടനീളം ഇരു ടീമുകളും മികച്ച പ്രതിരോധം കാഴ്ചവെച്ചു. ഇരു ടീമുകൾക്കും നിരവധി അവസരങ്ങൾ ലഭിച്ചെങ്കിലും ഗോളാക്കി മാറ്റാൻ സാധിക്കാതെ വന്നതോടെയാണ് കളി ഷൂട്ടൗട്ടിലേക്ക് കടന്നത്. ഷൂട്ടൗട്ടിൽ ആദ്യ അഞ്ച് കിക്കുകളിൽ ഇരു ടീമുകളും 4 ഗോളുകൾ വീതം നേടി സമനില പാലിച്ചതോടെ മത്സരം 'സഡൻ ഡെത്തി'ലേക്ക് നീങ്ങി. നിർണ്ണായകമായ അവസരങ്ങളിൽ ബ്രസീലിയൻ താരങ്ങൾക്ക് പിഴച്ചപ്പോൾ കൃത്യതയോടെ ലക്ഷ്യം കണ്ട പോർച്ചുഗൽ വിജയമുറപ്പിച്ചു.

ബ്രസീലിന്റെ ഗോൾകീപ്പർ റൊമാരിയോ കുഞ്ഞ ഒരു കിക്ക് രക്ഷപ്പെടുത്തിയെങ്കിലും, അത് വിജയത്തിലേക്ക് ടീമിനെ എത്തിക്കാൻ മതിയായില്ല. ഫൈനലിൽ ഓസ്ട്രിയയാണ് പോർച്ചുഗലിന്റെ എതിരാളികൾ. ആദ്യ സെമിയിൽ ഇറ്റലിയെ എതിരില്ലാത്ത രണ്ട് ഗോളിന് തോൽപ്പിച്ചാണ് ഓസ്ട്രിയ ഫൈനലിൽ പ്രവേശിച്ചത്. ലോകകപ്പ് കിരീടത്തിനായി പോർച്ചുഗലും ഓസ്ട്രിയയും വ്യാഴാഴ്ച ഏറ്റുമുട്ടും. നാല് തവണ ചാമ്പ്യന്മാരായ ബ്രസീലിന് മൂന്നാം സ്ഥാനത്തിനായി ഇറ്റലിയെ നേരിടേണ്ടിവരും.

ഫിഫ അണ്ടർ-17ബ്രസീൽപോർച്ചുഗൽ

സ്വന്തം ലേഖകൻ