സിംഗപ്പൂരിനോട് തോൽവി ഏറ്റുവാങ്ങിയത് ലീഡ് നേടിയശേഷം; ഫറ്റോർഡയിലെ നിർണായക മത്സരത്തിൽ പരാജയപ്പെട്ടത് ഒന്നിനെതിരെ രണ്ടു ഗോളുകൾ; ഏഷ്യന്‍ കപ്പ് ഫുട്‌ബോളില്‍ ഇന്ത്യ പുറത്ത്
മഡ്ഗാവ്: എഎഫ്‌സി ഏഷ്യൻ കപ്പ് ഫുട്‌ബോൾ യോഗ്യതാ റൗണ്ടിൽ ഇന്ത്യ സിംഗപ്പൂരിനോട് തോറ്റതോടെ ഇന്ത്യ ഫൈനൽ റൗണ്ട് കാണാതെ പുറത്തായി. മഡ്ഗാവിലെ ഫറ്റോർഡ സ്റ്റേഡിയത്തിൽ നടന്ന നിർണായക മത്സരത്തിൽ ഒന്നിനെതിരെ രണ്ടു ഗോളുകൾക്കാണ് ആതിഥേയരായ ഇന്ത്യ പരാജയപ്പെട്ടത്. ഈ തോൽവിയോടെ അടുത്ത വർഷം നടക്കുന്ന ഏഷ്യൻ കപ്പിനുള്ള ഇന്ത്യയുടെ സാധ്യതകൾ അവസാനിച്ചു.
മത്സരത്തിന്റെ 14-ാം മിനിറ്റിൽ ലാലിയൻസുവാല ചാങ്‌തെ നേടിയ ഗോളിലൂടെ ഇന്ത്യ മുന്നിലെത്തിയിരുന്നു. 35 വാര അകലെ നിന്ന് ചാങ്‌തെ തൊടുത്ത ലോങ് റേഞ്ചർ ഗോൾ സിംഗപ്പൂർ ഗോളിക്ക് യാതൊരു അവസരവും നൽകിയില്ല. എന്നാൽ, ആദ്യ പകുതി അവസാനിക്കാൻ നിമിഷങ്ങൾ മാത്രം ബാക്കി നിൽക്കെ, സിംഗപ്പൂരിന്റെ സോങ് യൂയി യങ് നേടിയ ഗോളിലൂടെ അവർ സമനില പിടിച്ചു.
58-ാം മിനിറ്റിൽ യൂയി യങ് തന്റെ രണ്ടാം ഗോളും കണ്ടെത്തി സിംഗപ്പൂരിനെ മുന്നിലെത്തിച്ചു. പിന്നീട് സമനില ഗോളിനായി ഇന്ത്യ ആഞ്ഞു ശ്രമിച്ചെങ്കിലും വിജയിച്ചില്ല. നാല് കളികളിൽ നിന്ന് വെറും രണ്ട് പോയിന്റ് മാത്രമുള്ള ഇന്ത്യ ഗ്രൂപ്പിൽ അവസാന സ്ഥാനത്താണ്. അതേസമയം, നാല് കളികളിൽ നിന്ന് എട്ട് പോയിന്റോടെ സിംഗപ്പൂർ രണ്ടാം സ്ഥാനത്ത് ഇടം നേടി.
ഗ്രൂപ്പിൽ ഹോങ്കോങ്ങും സിംഗപ്പൂരും നാല് മത്സരങ്ങളിൽ നിന്ന് എട്ട് പോയിന്റ് വീതം നേടി മുന്നിലാണ്. ഗ്രൂപ്പ് ജേതാക്കൾക്ക് ഏഷ്യൻ കപ്പിലേക്ക് നേരിട്ട് യോഗ്യത ലഭിക്കും. പുതിയ പരിശീലകൻ ഖാലിദ് ജമീലിന് കീഴിൽ കാഫ നാഷൻസ് കപ്പിൽ മികച്ച പ്രകടനം കാഴ്ചവെച്ചെങ്കിലും ഏഷ്യൻ കപ്പ് യോഗ്യതാ റൗണ്ടിൽ ടീമിന് തിളങ്ങാനായില്ല. സുനിൽ ഛേത്രി, ലിസ്റ്റൻ കൊളാസോ, അൻവർ അലി തുടങ്ങിയ പ്രമുഖ താരങ്ങളെല്ലാം ടീമിലുണ്ടായിരുന്നു.
