രണ്ട് പെൺമക്കളെ തൂക്കിക്കൊന്ന ശേഷം യുവതി ജീവനൊടുക്കി; ഇളയ മകൾ രക്ഷപെട്ടു; കടുംകൈയ്ക്ക് പ്രേരിപ്പിച്ചത് സാമ്പത്തിക പ്രയാസങ്ങളെന്ന് റിപ്പോർട്ട്
ഹൈദരാബാദ്: തെലങ്കാനയിൽ രണ്ട് പെൺമക്കളെ കൊലപ്പെടുത്തിയ ശേഷം യുവതി ജീവനൊടുക്കി. യദാദ്രി ഭോംഗിർ ജില്ലയിൽ വ്യാഴാഴ്ചയാണ് ദാരുണ സംഭവം. ഇളയ മകൾ രക്ഷപെട്ടതായി പൊലീസ് പറഞ്ഞു. ഉമാറാണി (30) മക്കളായ ഹരിനി (12), ലസ്യ (8) എന്നിവരാണ് മരിച്ചത്. ഇളയമകൾ ഷൈനിയാണ് (3) രക്ഷപെട്ടത്. ഭർത്താവ് വെങ്കിടേനൊപ്പം ഉമയും കുടുംബവും രാംനഗറിലായിരുന്നു താമസം. 14 വർഷം മുമ്പായിരുന്നു വെങ്കിടേഷിന്റെയും ഉമാറാണിയുടെയും വിവാഹം.
സംഭവദിവസം വെങ്കിടേഷ് വീടിന് പുറത്തായിരുന്നു കിടന്നുറങ്ങിയത്. ഉമയും മക്കളും വീടിനകത്ത് കിടന്നു. വ്യാഴാഴ്ച പുലർച്ചെ ഇളയ മകൾ ഷൈനിയുടെ നിലവിളി കേട്ടാണ് വെങ്കിടേഷ് ഉണർന്നത്. വാതിൽ തുറക്കാൻ നോക്കിയെങ്കിലും അകത്ത് നിന്ന് പൂട്ടിയിരുന്നു. അയൽക്കാരുടെ സഹായത്തോടെ വാതിൽ പൊളിച്ച് അകത്ത് കടന്നപ്പോൾ ഉമയും മക്കളും തൂങ്ങിമരിച്ച നിലയിൽ കാണപ്പെടുകയായിരുന്നു.
ഉമ, ഹരിനി, ലസ്യ എന്നിവർ മരിച്ചപ്പോൾ ജീവന് വേണ്ടി പിടയുകയായിരുന്ന ഷൈനിയെ രക്ഷിക്കുകയായിരുന്നു. തൂക്കിയ തുണി കീറിപ്പോയതിനാലാണ് ഷൈനി രക്ഷപെട്ടത്. ആത്മഹത്യ കുറിപ്പ് കണ്ടെത്തിയിട്ടില്ലെന്ന് പൊലീസ് പറഞ്ഞു.
സാമ്പത്തിക പരാധീനതകൾ മൂലമാണ് യുവതി മക്കളെ കൂട്ടി മരിക്കാൻ തീരുമാനിച്ചതെന്നാണ് പുറത്തുവരുന്ന റിപ്പോർട്ട്. മദ്യപാനിയായ വെങ്കിടേഷ് ഉമാറാണിയെ നിരന്തരം മർദിക്കാറുണ്ടായിരുന്നുവെന്നും ഇതേത്തുടർന്നാണ് അവർ കടുംകൈ ചെയ്തതെന്നും പൊലീസ് പറഞ്ഞതായുമാണ് പുറത്തുവരുന്ന റിപ്പോർട്ട്.
