സാമൂഹ്യ മാധ്യമങ്ങളുടെ ഉപയോഗവും ചില സൗഹൃദങ്ങളും ഭർതൃവീട്ടുകാർ ചോദ്യം ചെയ്തു; വീട്ടുകാരെ വിളിച്ചുവരുത്തി ഇതേ ചൊല്ലി കൂട്ടായ ചർച്ചയും; ദൃശ്യയുടെ ആത്മഹത്യയിലേക്ക് നയിച്ചത് സോഷ്യൽ മീഡിയാ ഉപയോഗത്തെ ചൊല്ലിയുള്ള കുടുംബ പ്രശ്‌നങ്ങൾ
പാലാ: ഭർത്തൃമതിയായ യുവതിയെ വീടിന് സമീപത്തെ ഉപയോഗശൂന്യമായ കിണറ്റിൽ മരിച്ചനിലയിൽ കണ്ടെത്തി. തോടനാൽ ഇലവനാംതൊടുകയിൽ രാജേഷിന്റെ ഭാര്യ ദൃശ്യ(26) ആണ് മരിച്ചത്. ചൊവ്വാഴ്ച പുലർച്ചെയാണ് സംഭവമുണ്ടാ്യത്. ഏലപ്പാറ ചിന്നാർ സ്വദേശിനിയാണ് യുവതി.
സാമൂഹ്യ മാധ്യമങ്ങളിൽ അടക്കം സജീവമായിരുന്നു യുവതി. ഇവരുടെ സോഷ്യൽ മീഡിയാ ഉപയോഗത്തെ ഭർതൃവീട്ടുകാർ എതിർത്തിരുന്നു. സോഷ്യൽ മീഡിയ വഴിയുള്ള ചില സൗഹൃദങ്ങളെ ചൊല്ലി വീട്ടിൽ വഴക്കുമുണ്ടായിരുന്നു. ഇതിന് പിന്നാലെയാണ് യുവതിയുടെ മൃതദേഹം കണ്ടെത്തിയത്. സാമൂഹ്യ മാധ്യമങ്ങൾ അമിതമായി ഉപയോഗിക്കുന്നതും അതിലൂടെയുള്ള ചില സൗഹൃദങ്ങളും ഭർത്താവിന്റെ വീട്ടുകാർ ചോദ്യം ചെയ്തിരുന്നതായി പൊലീസും വ്യക്തമാക്കി.
കഴിഞ്ഞയാഴ്ച ചിന്നാറിലെ വീട്ടിലേയ്ക്കുപോയ ദൃശ്യയോട് വീട്ടിൽനിന്നും ആരെയെങ്കിലും കൂട്ടി തിരികെ വരണമെന്ന് ഭർത്തൃവീട്ടുകാർ ആവശ്യപ്പെട്ടിരുന്നു. തിങ്കളാഴ്ച തിരികെയെത്തിയ ദൃശ്യയ്ക്കൊപ്പം വീട്ടുകാർ ആരും ഉണ്ടായിരുന്നില്ല. ഇതേത്തുടർന്ന് ഭർത്തൃ വീട്ടുകാർ തന്നെ കുടുംബാംഗങ്ങളെ വിളിച്ചു വരുത്തി. യുവതിയുടെ സാമൂഹ്യമാധ്യമ ഇടപെടലുകൾ സംബന്ധിച്ചായിരുന്നു ഇരുവീട്ടുകാരും തമ്മിലുണ്ടായിരുന്ന ചർച്ച.
അന്നേ ദിവസം പുലർച്ചെ ഒരുമണിയോടെയാണ് വീട്ടുകാർ മടങ്ങിയത്. ഇതിന് ശേഷം തൊട്ടടുത്ത വീട്ടിലെ ഗൃഹനാഥന് ശാരീരിക അസ്വസ്ഥതയുണ്ടായതിനെത്തുടർന്ന് രാജേഷിന്റെ പിതാവ് പുലർച്ചെ രണ്ടരയോടെ അയൽ വീട്ടിൽ പോയി തിരികെ വരുമ്പോഴാണ് ദൃശ്യയെ കാണാതായത് അറിയുന്നത്. അന്വേഷിച്ചെങ്കിലും കണ്ടെത്താനായില്ല. ചൊവ്വാഴ്ച രാവിലെ കുടുംബാംഗങ്ങൾ പാലാ പൊലീസിൽ പരാതി നൽകി.
ഇതിനിടയിൽ നടത്തിയ അന്വേഷണത്തിൽ വീടിന് 200 മീറ്റർ അകലെ അയൽവാസിയുടെ പുരയിടത്തിലെ ഉപയോഗശൂന്യമായ കിണറ്റിൽ മൃതദേഹം കണ്ടെത്തുകയായിരുന്നു. കിണറിന് സമീപത്ത് നിന്നും ടോർച്ചും കണ്ടെത്തി. പാലാ പൊലീസും അഗ്നിരക്ഷാസേനയും സ്ഥലത്തെത്തി മൃതദേഹം പുറത്തെടുത്തു. തഹസിൽദാർ എസ്.ശ്രീജിത്തും സ്ഥലത്തെത്തി പരിശോധിച്ചു.
മൃതദേഹം പുറത്തെടുത്തപ്പോൾ പൊള്ളലേറ്റതായി കണ്ടിരുന്നു. തീ കൊളുത്തി ജീവനൊടുക്കുവാൻ ശ്രമിച്ചശേഷം കിണറ്റിൽ ചാടുകയായിരുന്നുവെന്ന് കരുതുന്നതായി പൊലീസ് പറഞ്ഞു. നാലുവർഷം മുമ്പാണ് വിവാഹിതരായത്. കുട്ടികളില്ല.
