22 ദിവസം നീളുന്ന വിവിധ പരിപാടികള്‍; കടലാസ് കഷണങ്ങള്‍ കൊണ്ട് ആകാശത്ത് നിന്ന് പെയ്യിക്കുന്ന മഞ്ഞ്, ചുവട് വെച്ച് എത്തുന്ന ഹിമക്കരടികള്‍ നൃത്തസംഘത്തിനൊപ്പമെത്തുന്ന ക്രിസ്തുമസ് പാപ്പ; ഗ്ലോബല്‍ വില്ലേജില്‍ ക്രിസ്തുമസ് ആഘോഷങ്ങള്‍ക്ക് തുടക്കം
ദുബൈ: ദുബൈ ഗ്ലോബല്‍ വില്ലേജില്‍ ക്രിസ്തുമസ് ആഘോഷങ്ങള്‍ക്ക് തുടക്കമായി. 22 ദിവസം നീളുന്ന വിവിധ പരിപാടികള്‍ക്ക് ഇനി ഗ്ലോബല്‍ വില്ലേജ് സാക്ഷിയാവും. ലോകത്തിന്റെ വിവിധ ഭാഗങ്ങളില്‍ നിന്നുള്ളവര്‍ ക്രിസ്തുമസ് ആഘോഷിക്കാന്‍ ഗ്ലോബല്‍ വില്ലേജിലേക്ക് ഒഴുകിയെത്തും.
21 അടി ഉയരമുള്ള ക്രിസ്തുമസ് ട്രീയില്‍ ദീപങ്ങള്‍ തെളിയിച്ചായിരുന്നു ദുബൈ ഗ്ലോബല്‍ വില്ലേജിലെ ആഘോഷം. കടലാസ് കഷണങ്ങള്‍ കൊണ്ട് ആകാശത്ത് നിന്ന് പെയ്യിക്കുന്ന മഞ്ഞ്, ചുവട് വെച്ച് എത്തുന്ന ഹിമക്കരടികള്‍, കാഴ്ചക്കാരെ അഭിവാദ്യം ചെയ്യാന്‍ നൃത്തസംഘത്തിനൊപ്പമെത്തുന്ന ക്രിസ്തുമസ് പാപ്പ തുടങ്ങി നിരവധി കാഴ്ചകളൊരുക്കിയാണ് ദുബൈ ഗ്ലോബല്‍ വില്ലേജിലെ ക്രിസ്തുമസ് ആഘോഷം.
ഈ വേദിയില്‍ ഇനിയുള്ള ഓരോ രാത്രിയിലും അഞ്ച് തവണ ക്രിസ്തുമസ് പാപ്പയും സംഘവും ആഘോഷവുമായി എത്തും. ക്രിസ്തുമസിന്റെ ഭാഗമായി 22 ദിവസം നീളുന്ന ആഘോഷങ്ങളാണ് ദുബൈ ഗ്ലോബല്‍ വില്ലേജില്‍ ഒരുക്കിയിരിക്കുന്നത്. ജനുവരി അഞ്ച് വരെ മുടക്കമില്ലാതെ ഈ വേദിയില്‍ ക്രിസ്തുമസ് ആഘോഷങ്ങള്‍ തുടരും.
