യുഎസ് ടി യമ്മി എയ്ഡ് 2025 പാചക ഉത്സവം സമാഹരിച്ചത് 3.21 ലക്ഷം രൂപ; തുക സ്ത്രീ ശാക്തീകരണ പ്രവര്ത്തനങ്ങള്ക്കായി നല്കും
തിരുവനന്തപുരം, 09 ജനുവരി 2026: ഭക്ഷണ വൈവിധ്യമൊരുക്കി യു എസ് ടി തിരുവനന്തപുരം കേന്ദ്രത്തിലെ ജീവനക്കാര് യമ്മി എയ്ഡ് 2025 ആവേശത്തോടെ ആഘോഷിച്ചു. യമ്മി എയ്ഡ് എന്ന പാചക ഉത്സവവും മത്സരവും അടങ്ങുന്ന വാര്ഷിക പരിപാടിയുടെ പന്ത്രണ്ടാം പതിപ്പാണ് സംഘടിപ്പിച്ചത്. യു എസ് ടി യിലെ വനിതാ ജീവനക്കാരുടെ വികസനത്തിനും എക്സിക്യൂട്ടീവ് മെന്ററിങ്ങിനും സൗകര്യമൊരുക്കുന്ന സന്നദ്ധ സംഘടനയായ നൗ യു (നെറ്റ്വര്ക്ക് ഓഫ് വിമന് യുഎസ് അസോസിയേറ്റ്സ്) ആണ് ഈ വാര്ഷിക പാചക ഉത്സവ-ഫണ്ട് റൈസിംഗ് പരിപാടി സംഘടിപ്പിച്ചത്.
യു എസ് ടി തിരുവനന്തപുരം ക്യാമ്പസിലെ ജീവനക്കാരുടെ വലിയ പങ്കാളിത്തമാണ് രേഖപ്പെടുത്തിയത്. വീട്ടില് പാകം ചെയ്ത ഭക്ഷണം കാമ്പസില് ഒരുക്കിയ സ്റ്റാളുകളില് പ്രദര്ശനത്തിനും വില്പ്പനയ്ക്കും വച്ചത് 18 ടീമുകളാണ്. 6000-ലധികം യുഎസ് ടി ജീവനക്കാര് സ്റ്റാളുകള് സന്ദര്ശിച്ചു. ഇത്തവണത്തെ യമ്മി എയ്ഡില് ഭക്ഷണ വില്പ്പനയിലൂടെ 321,464 രൂപ സമാഹരിച്ചു. സാമൂഹിക-സാമ്പത്തിക വെല്ലുവിളികള് നേരിടുന്ന സ്ത്രീകളുടെയും കുട്ടികളുടെയും ക്ഷേമത്തിനായി ഈ ഫണ്ടുകള് വിനിയോഗിക്കും. ഈ സംരംഭത്തില് നൗ യു, യു എസ് ടിയിലെ തന്നെ മറ്റൊരു കൂട്ടായ്മയായ കളര് റോസ് ടീമുമായും സി എസ് ആര് വിഭാഗവുമായും സഹകരിച്ചു പ്രവര്ത്തിക്കും.
ഇതിനു പുറമേ, യു എസ് ടിയിലെ സപ്പോര്ട്ട് സ്റ്റാഫില് ഉള്പ്പെടുന്ന, ചെറിയ കുട്ടികളുള്ള സിംഗിള് അമ്മമാരുടെ ശാക്തീകരണത്തിനും പിന്തുണയ്ക്കും വേണ്ടി നൗ യു, വര്ക്ക്പ്ലേസ് മാനേജ്മെന്റ് ടീമുമായും സഹകരിക്കുന്നുണ്ട്. ജി എ മേനോന് സ്കോളര്ഷിപ്പ് പ്രോഗ്രാമിന്റെ ഭാഗമായി 2020 മുതല് യു എസ് ടി യിലെ സപ്പോര്ട്ട് സ്റ്റാഫിന്റെ മികവു കാട്ടുന്ന കുട്ടികളുടെ വിദ്യാഭ്യാസത്തിനു ആവശ്യമായ പിന്തുണ നല്കി വരുന്നുണ്ട്.
ഹയാത്ത് റീജന്സി എക്സിക്യൂട്ടീവ് ഷെഫ് സെന്തില് കുമാര്; നടന്, 92.7 ബിഗ് എഫ് എം പ്രോഗ്രാംസ് ഹെഡ്, സനാഥാലയം കാന്സര് കെയര് സെന്റര് സ്ഥാപകന്, ബോധി ഹീലിംഗ് എംഡി എന്നീ നിലകളില് പ്രശസ്തനായ ഫിറോസ് എ അസീസ്; ന്യൂട്രീഷനിസ്റ്റ് ലക്ഷ്മി മനീഷ്; എന്നിവരടങ്ങുന്ന പാനലാണ് യമ്മി എയ്ഡ് 2025 ന്റെ വിധികര്ത്താക്കളായി എത്തിയത്.
മികച്ച സ്റ്റാളിനുള്ള സമ്മാനം മദ്രാസും മലബാറും നേടി. മിമി ഓണ് വീല്സിന് പ്രത്യേക പരാമര്ശം ലഭിച്ചു. മിമി ഓണ് വീല്സിന്റെ മില്ലറ്റ് കേക്ക് മികച്ച സ്വീറ്റ് സിഗ്നേച്ചര് ഡിഷായി തിരഞ്ഞെടുക്കപ്പെട്ടു. മിമി ഓണ് വീല്സിന്റെ തന്നെ മില്ലറ്റ് പാപ്ഡി ഛാട്ടിനാണ് ബെസ്റ്റ് ഹെല്ത്തി സിഗ്നേച്ചര് വിഭവത്തിനുള്ള സമ്മാനം. ബ്ലോക്ക്ബസ്റ്റര് ടീമിനുള്ള സമ്മാനം ഹൗസ് ഓഫ് ടേസ്റ്റിന് ലഭിച്ചു. 'ഞെട്ടിക്കല് കലവറ', 'മെനുഫാക്ചറിംഗ്' എന്നെ ടീമുകള് യഥാക്രമം രണ്ടും മൂന്നും സ്ഥാനങ്ങള് നേടി.
ഈ വര്ഷത്തെ യമ്മി എയ്ഡിന്റെ തീം ''ഉത്തമ ലക്ഷ്യത്തിനായി ഒരുമിച്ച് പാചകം ചെയ്യുക'' എന്നതിനെക്കൂടാതെ, ''ആരോഗ്യകരമായ ജീവിതശൈലി കാക്കുക, ഫിറ്റ്നസ് യാത്ര തുടരുക'' എന്നതുമായിരുന്നു. ഇതിന്റെ മുന്നോടിയായി, 2025 നവംബറില് ഒരു പ്രീ-ഇവന്റ് പ്രോഗ്രാം സംഘടിപ്പിച്ചിരുന്നു. 'ഫിറ്റ്നസ് ചലഞ്ച്' എന്ന പേരില് യുഎസ് ടി യിലെ എല്ലാ ഫിറ്റ്നസ് പ്രേമികള്ക്കും വേണ്ടിയുള്ളതായിരുന്നു പരിപാടി. പ്രാഥമിക റൗണ്ടില് തിരഞ്ഞെടുക്കപ്പെട്ട മികച്ച 5 ടീമുകള് ''ഫിറ്റ്നസ് ചാമ്പ്യന്സ് 2025'' എന്ന പുരസ്കാരത്തിനായി മത്സരിച്ചു. 'കണ്ട്രോള് പ്ലസ് ഫിറ്റ്' ടീം ഫിറ്റ്നസ് 2025 ലെ ചാമ്പ്യന്മാര്ക്കുള്ള കിരീടം നേടിയപ്പോള്, 'ഫിറ്റ് കോം' ടീം റണ്ണര് അപ്പ് ആയി. ഫിറ്റ്നസ് ചലഞ്ചിന്റെ ഭാഗമായി പുഷ് അപ്പ്, പുള് അപ്പ്, ഗോബ്ലറ്റ് സ്ക്വാറ്റ്, ബര്പ്പി, സ്കിപ്പിംഗ്, വെയ്റ്റ് ഹോള്ഡിംഗ്, പ്ലാങ്ക് തുടങ്ങിയ വിവിധ മത്സരങ്ങള് സംഘടിപ്പിച്ചു.
'രുചികരമായ വിഭവങ്ങളുടെയും, കടുത്ത മത്സരത്തിന്റെയും, ജീവകാരുണ്യ പ്രവര്ത്തനങ്ങളുടെയും സംഗമമായി മാറുകയായിരുന്നു യമ്മി എയ്ഡ് 2025. പങ്കെടുത്തവരുടെ ആവേശവും, വില്പ്പനയ്ക്കായി ഒരുക്കിയ വിഭവങ്ങളും ഏറെ മികവ് കാട്ടി. പന്ത്രണ്ടാം വര്ഷത്തിലേക്ക് കടന്നിരിക്കുന്ന യമ്മി എയ്ഡ്, ആദ്യ വര്ഷത്തെപ്പോലെ തന്നെ ആവേശത്തോടെ തുടരുന്നു എന്നതില് ഞങ്ങള്ക്ക് സന്തോഷമുണ്ട്,' യുഎസ് ടി നൗ യു വിന്റെ കോര് ടീം അംഗങ്ങള് പറഞ്ഞു.