ഒരു നടന്‍ എന്ന നിലയില്‍ ജനങ്ങള്‍ അദ്ദേഹത്തെ വലിയ സ്നേഹത്തോടെ സ്വീകരിച്ചിരുന്നു; എന്നാല്‍ എന്തിനാണ് രാഷ്ട്രീയത്തിലേക്ക് എത്തിയതെന്ന് ഇന്നും മനസ്സിലാകുന്നില്ല; നിരപരാധികളുടെ മരണം അദ്ദേഹം എങ്ങനെ സഹിക്കും; പ്രതികരണവുമായി നടി വിനോദിനി
ചെന്നൈ: കരൂരില്‍ നടനും രാഷ്ട്രീയ നേതാവുമായ വിജയിന്റെ റാലിക്കിടെ ഉണ്ടായ തിരക്കിലും തിക്കിലും പെട്ട് നിരവധി പേര്‍ മരിച്ച സംഭവത്തില്‍ തമിഴ് പ്രതികരണവുമായി നടി വിനോദിനി. തന്റെ വ്യക്തിപരമായ ഓര്‍മ്മകള്‍ പങ്കുവെച്ചുകൊണ്ടാണ് അവര്‍ ഈ വിഷയം ഉന്നയിച്ചത്. വിജയ് എന്തിനാണ് സിനിമ വിട്ട് രാഷ്ട്രീയത്തില്‍ പ്രവേശിച്ചത്. വിജയിയെ വെറുക്കരുത് എന്നും അവര്‍ പറഞ്ഞു.
''ഒരു നടനെന്ന നിലയില്‍ വിജയ് എപ്പോഴും എനിക്ക് അദ്ദേഹം പ്രിയങ്കരനാണ്. ഒരിക്കല്‍ അദ്ദേഹത്തോടൊപ്പം അഭിനയിക്കാന്‍ അവസരം ലഭിച്ചിരുന്നു. സിനിമയില്‍ മാത്രം സജീവമായിരുന്നപ്പോള്‍ തമിഴ് ജനങ്ങള്‍ അദ്ദേഹത്തെ വലിയ സ്നേഹത്തോടെ സ്വീകരിച്ചിരുന്നു. ചലച്ചിത്രലോകത്ത് അദ്ദേഹം ഒരിക്കലും മാറ്റാനാവാത്ത സ്ഥാനം നേടിയിരുന്നു. എന്നാല്‍ എന്തിനാണ് രാഷ്ട്രീയത്തിലേക്ക് എത്തിയതെന്ന് ഇന്നും മനസ്സിലാകുന്നില്ല,'' വിനോദിനി പറഞ്ഞു.
വിജയിയെ 'സഹോദരന്‍' എന്ന് വിളിച്ച വിനോദിനി, നിരപരാധികളുടെ മരണത്തില്‍ അദ്ദേഹത്തിന് ഉണ്ടാകുന്ന വേദനയും കുറ്റബോധവും കുറിച്ച് ആശങ്ക പ്രകടിപ്പിച്ചു. ''ഹൃദയത്തില്‍ നല്ല മനുഷ്യനാണ് വിജയ്. ഇപ്പോഴത്തെ സംഭവത്തില്‍ അദ്ദേഹം തകര്‍ന്നിരിക്കുമെന്ന് ഉറപ്പാണ്. ദയവായി ഈ ദുരന്തത്തെ വെറുപ്പോ രാഷ്ട്രീയവല്‍ക്കരണമോ ആക്കാതിരിക്കണം. നിരപരാധികളുടെ ആത്മാവിനായി നമ്മള്‍ ദുഃഖിക്കുകയും പ്രാര്‍ഥിക്കുകയും ചെയ്യുക മാത്രമേ വേണ്ടൂ,'' എന്നാണ് വിനോദിനിയുടെ അഭ്യര്‍ത്ഥന.
പാര്‍ട്ടിയുടെ പല ആശയങ്ങളോടും എനിക്ക് യോജിപ്പില്ലാത്തതിനാല്‍ അദ്ദേഹത്തിന്റെ രാഷ്ട്രീയ ജീവിതത്തെക്കുറിച്ചോ അഭിപ്രായങ്ങളെക്കുറിച്ചോ ഞാന്‍ ഒന്നും പറയുന്നില്ല. എന്നാല്‍ സൗമ്യനും മൃദുവായി സംസാരിക്കുന്നവനും ദയയുള്ളവനുമായ ഒരു വ്യക്തി എന്ന നിലയില്‍, നിരവധി നിരപരാധികളുടെ മരണത്തില്‍ അദ്ദേഹം ശരിക്കും തകര്‍ന്നിട്ടുണ്ടാകും എന്നും അവര്‍ പറഞ്ഞു.