അനശ്വര രാജന്റെ തെലുങ്കിലെ അരങ്ങേറ്റ ചിത്രം; സ്പോർട്സ് ആക്ഷൻ ഡ്രാമ 'ചാമ്പ്യൻ' ഒടിടിയിലേക്ക്

കൊച്ചി: അനശ്വര രാജൻ നായികയായി അരങ്ങേറ്റം കുറിച്ച തെലുങ്ക് ചിത്രം 'ചാമ്പ്യൻ' ഒടിടി റിലീസിനൊരുങ്ങുന്നു. ക്രിസ്മസ് റിലീസായി ഡിസംബർ 25-ന് തിയറ്ററുകളിലെത്തിയ ചിത്രത്തിൻ്റെ ഡിജിറ്റൽ സംപ്രേക്ഷണാവകാശങ്ങൾ പ്രമുഖ സ്ട്രീമിംഗ് പ്ലാറ്റ്‌ഫോമായ നെറ്റ്ഫ്ലിക്സ് സ്വന്തമാക്കി. ആഗോളതലത്തിൽ 17 കോടി രൂപയും ഇന്ത്യയിൽ നിന്ന് മാത്രം 14.6 കോടി രൂപയും ഗ്രോസ് കളക്ഷൻ നേടിയ സ്പോർട്സ് ആക്ഷൻ ഡ്രാമ വിഭാഗത്തിൽപ്പെട്ട ചിത്രമാണിത്.

ദേശീയ അവാർഡ് ജേതാവായ പ്രദീപ് അദ്വൈതം സംവിധാനം ചെയ്ത ഈ ചിത്രത്തിൽ റോഷനാണ് അനശ്വര രാജന്റെ നായകനായി എത്തിയത്. ശക്തമായ ഇച്ഛാശക്തിയുള്ള ഒരു തീവ്ര ഫുട്ബോൾ കളിക്കാരനായാണ് റോഷൻ ചിത്രത്തിൽ വേഷമിട്ടത്. അനശ്വരയുടെ പ്രകടനത്തിനും ചിത്രത്തിലെ ഗാനങ്ങൾക്കും മികച്ച സ്വീകാര്യത ലഭിച്ചിരുന്നു. സ്വപ്ന സിനിമാസ്, ആനന്ദി ആർട്ട് ക്രിയേഷൻസ്, കൺസെപ്റ്റ് ഫിലിംസ്, സീ സ്റ്റുഡിയോസ് എന്നിവർ സംയുക്തമായാണ് 'ചാമ്പ്യൻ' നിർമ്മിച്ചത്.

റോഷൻ മേക്ക അവതരിപ്പിക്കുന്ന മൈക്കൽ സി. വില്യംസ് എന്ന കഥാപാത്രത്തെ കേന്ദ്രീകരിച്ചാണ് ഈ സിനിമ വികസിക്കുന്നത്. ഇംഗ്ലണ്ടിലെ മാഞ്ചസ്റ്ററിന് വേണ്ടി കളിക്കാൻ ആഗ്രഹിക്കുന്ന സെക്കന്തരാബാദിൽ നിന്നുള്ള കഴിവുറ്റ ഒരു ഫുട്ബോൾ താരമാണ് അദ്ദേഹം. എന്നാൽ, അപ്രതീക്ഷിതമായി ആയുധക്കടത്തിൽ അകപ്പെടുന്ന അദ്ദേഹം ഭൈരൻപള്ളി ഗ്രാമത്തിൽ എത്തിച്ചേരുകയും അവിടെ റസാക്കർമാരുടെ ക്രൂരതകൾക്കെതിരെ പോരാടുകയും ചെയ്യുന്നു.

അവിടെ വെച്ച് അനശ്വര രാജൻ അവതരിപ്പിക്കുന്ന ചന്ദ്രകല എന്ന കഥാപാത്രവുമായി അദ്ദേഹം പ്രണയത്തിലാകുന്നു. നാല് വർഷത്തെ ഇടവേളയ്ക്ക് ശേഷമുള്ള റോഷൻ മേക്കയുടെ തിരിച്ചുവരവ് എന്നതിലുപരി, മലയാളി നടി അനശ്വര രാജന്റെ തെലുങ്ക് അരങ്ങേറ്റ ചിത്രം കൂടിയാണിത് എന്ന പ്രത്യേകതയും ഈ സിനിമയ്ക്കുണ്ട്.