ക്രൈം ത്രില്ലർ ചിത്രം 'മാര്‍ജാര ഒരു കല്ലുവച്ച നുണ' ഒടിടിയിലേക്ക്; ഓൺലൈൻ സ്ട്രീമിംഗ് ആരംഭിക്കുന്നത് റിലീസ് ചെയ്ത് നാല് വർഷങ്ങൾക്ക് ശേഷം
ക്രൈം ത്രില്ലർ സിനിമകൾക്ക് ഏറെ പ്രേക്ഷകരുള്ള ഇൻഡസ്ട്രിയാണ് മോളിവുഡ്. മറ്റൊരു മലയാള ക്രൈം ത്രില്ലർ ചിത്രം കൂടി ഒടിടിയില്‍ പ്രദര്‍ശനമാരംഭിക്കാൻ ഒരുങ്ങുകയാണ്. 2020 ജനുവരിയില്‍ തിയറ്ററുകളിലെത്തിയ ചിത്രം പ്രമുഖ പ്ലാറ്റ്ഫോം ആയ സൈന പ്ലേയിലൂടെയാണ് പ്രേക്ഷകർക്ക് മുന്നിലെത്തുന്നത്. നവാഗതനായ രാകേഷ് ബാല രചനയും സംവിധാനവും നിര്‍വ്വഹിച്ച 'മാര്‍ജാര ഒരു കല്ലുവച്ച നുണ' എന്ന ചിത്രമാണ്നാല് വർഷങ്ങൾക്ക് ശേഷം ഒടിടിയിലെത്തുന്നത്.
ശന്തനു എന്ന കള്ളന്‍റെ കഥയാണ് ചിത്രം പറയുന്നത്. സ്ത്രീകളെ ആകര്‍ഷിക്കുന്നതിലൂടെയാണ് അയാള്‍ വീടുകളില്‍ മോഷണം നടത്തുന്നു. അത്തരത്തില്‍ ഒരു മോഷണശ്രമത്തിനിടെ ശന്തനുവിനുണ്ടാകുന്ന അപ്രതീക്ഷിത സംഭവങ്ങളാണ് ചിത്രത്തിന്റെ ഇതിവൃത്തം. ക്രൈം, ഫാന്‍റസി, കോമഡി, മിസ്റ്ററി ജോണറുകളുടെയാണ് 'മാര്‍ജാര ഒരു കല്ലുവച്ച നുണ' കഥ പറയുന്നത്.
വിഹാന്‍, ജെയ്സണ്‍, മാധുരി എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചത്. ഫിന്‍ഫി പ്രൊഡക്ഷന്‍സിന്റെ ബാനറില്‍ ഡോക്ടര്‍ സുനിരാജ് കാശ്യപ് ആണ് ചിത്രത്തിന്റെ നിർമാണം. സുധീര്‍ കരമന, ഹരീഷ് പേരടി, ടിനി ടോം, നോബി, കൊല്ലം സുധി, അഭിരാമി എന്നിവരാണ് മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്. ജെറി സൈമണ്‍ ഛായാഗ്രഹണവും എഡിറ്റിംഗ് ലിജോ പോളും നിര്‍വ്വഹിച്ചിരിക്കുന്നു.
റഫീഖ് അഹമ്മദ്, ഏങ്ങണ്ടിയൂര്‍ ചന്ദ്രശേഖരന്‍ എന്നിവരുടെ വരികള്‍ക്ക് കിരണ്‍ ജോസ് സംഗീതം പകര്‍ന്നിരിക്കുന്നു. പശ്ചാത്തല സംഗീതം ജിസണ്‍ ജോര്‍ജ്, കല മനു പെരുന്ന, മേക്കപ്പ് റഹിം കൊടുങ്ങല്ലൂര്‍, വസ്ത്രാലങ്കാരം ലേഖ മോഹന്‍, സ്റ്റില്‍സ് നവീന്‍, പരസ്യകല യെല്ലോ ടൂത്ത്, സ്റ്റണ്ട് റണ്‍ രവി, പ്രാെഡക്ഷന്‍ കണ്‍ട്രോളര്‍ സുനീഷ് വൈക്കം, വാര്‍ത്താ പ്രചരണം എ എസ് ദിനേശ്.