ധനുഷും മമിതയും ഒന്നിക്കുന്ന 'കര': രണ്ടാം ഗാനം ഏപ്രിൽ 8-ന്; റിലീസ് തീയതി പ്രഖ്യാപിച്ചു

ചെന്നൈ: തമിഴ് സിനിമാ ലോകം ഏറെ ആകാംക്ഷയോടെ കാത്തിരിക്കുന്ന ധനുഷ് ചിത്രം 'കര'യുടെ ഏറ്റവും പുതിയ വിശേഷങ്ങൾ പുറത്ത്. ചിത്രത്തിലെ രണ്ടാം ഗാനം ഏപ്രിൽ 8-ന് പുറത്തിറങ്ങുമെന്ന് അണിയറപ്രവർത്തകർ അറിയിച്ചു. 'പോർ തൊഴിൽ' എന്ന സൂപ്പർ ഹിറ്റ് ചിത്രത്തിന് ശേഷം വിഘ്‌നേഷ് രാജ സംവിധാനം ചെയ്യുന്ന ഈ ബിഗ് ബജറ്റ് ചിത്രം 2026 ഏപ്രിൽ 30-ന് തിയറ്ററുകളിലെത്തും.

പൊങ്കൽ പ്രമാണിച്ച് പുറത്തിറക്കിയ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇതിനോടകം തന്നെ സോഷ്യൽ മീഡിയയിൽ തരംഗമായിരുന്നു. തിയറ്റർ റിലീസിന് ശേഷമുള്ള ചിത്രത്തിന്റെ ഒടിടി അവകാശം പ്രമുഖ സ്ട്രീമിംഗ് പ്ലാറ്റ്‌ഫോമായ നെറ്റ്ഫ്ലിക്സ് സ്വന്തമാക്കിയതായാണ് റിപ്പോർട്ടുകൾ. ചിത്രത്തിലെ കഥാപാത്രങ്ങളെ പരിചയപ്പെടുത്തിയുള്ള വീഡിയോയിലൂടെയാണ് റിലീസ് തീയതി പ്രഖ്യാപിച്ചത്.

മലയാളത്തിൽ നിന്ന് സുരാജ് വെഞ്ഞാറമൂടും ജയറാമും ചിത്രത്തിൽ നിർണായക വേഷങ്ങളിൽ എത്തുന്നുണ്ട്. സുരാജിന്റെ ഞെട്ടിക്കുന്ന പ്രകടനമായിരിക്കും ചിത്രത്തിലേതെന്നാണ് പുറത്തുവന്ന വീഡിയോ നൽകുന്ന സൂചന. മലയാളത്തിന്റെ പ്രിയതാരം മമിത ബൈജുവാണ് ചിത്രത്തിൽ ധനുഷിന്റെ നായികയായി എത്തുന്നത്. തമിഴകത്ത് തിരക്കേറിയ താരമായി മാറുന്ന മമിത, വിജയ് ചിത്രം 'ജനനായകൻ' (വിജയ്‌യുടെ മകളായി), 'സൂര്യ 44', പ്രദീപ് രംഗനാഥന്റെ 'ഡ്യൂഡ്' എന്നീ ചിത്രങ്ങളിലും നായികയാകുന്നുണ്ട്.

ജി.വി. പ്രകാശ് കുമാറാണ് 'കര'യ്ക്ക് വേണ്ടി സംഗീതം ഒരുക്കുന്നത്. തേനി ഈശ്വർ ഛായാഗ്രഹണം നിർവ്വഹിക്കുന്നു. വേൽസ് ഫിലിം ഇന്റർനാഷണലിന്റെ ബാനറിൽ ഡോ. ഐഷാരി കെ. ഗണേഷാണ് ചിത്രം നിർമ്മിക്കുന്നത്.

ധനുഷ് തന്നെ രചനയും സംവിധാനവും നിർവ്വഹിച്ച് തിയറ്ററുകളിലെത്തിയ 'ഇഡ്‍ലി കടൈ' ആണ് താരത്തിന്റേതായി ഒടുവിൽ പുറത്തിറങ്ങിയ ചിത്രം. നിത്യ മേനൻ നായികയായ ഈ ചിത്രം മികച്ച പ്രതികരണമാണ് നേടിയത്. 'തിരുച്ചിദ്രമ്പലം' എന്ന ഹിറ്റ് ചിത്രത്തിന് ശേഷം ധനുഷും നിത്യയും ഒന്നിച്ച ചിത്രം കൂടിയായിരുന്നു അത്. വണ്ടർബാർ ഫിലിംസ്, ഡോൺ പിക്ചേഴ്സ് എന്നിവയുടെ ബാനറിൽ ധനുഷും ആകാശ് ഭാസ്കരനും ചേർന്നാണ് ഇഡ്‍ലി കടൈ നിർമ്മിച്ചത്. ശാലിനി പാണ്ഡെയും ചിത്രത്തിൽ പ്രധാന വേഷം കൈകാര്യം ചെയ്തിരുന്നു.