ഭക്തിയും മിത്തും പ്രമേയമായ ചിത്രം; എട്ട് മാസത്തിനിപ്പുറം ‘പഞ്ചവത്സര പദ്ധതി’ ഒടിടിയിലേക്ക്; ഓൺലൈൻ സ്ട്രീമിംഗ് ആരംഭിച്ചു

കൊച്ചി: സിജു വിൽസൺ നായകനായെത്തിയ ആക്ഷേപഹാസ്യ ചിത്രമായിരുന്നു ‘പഞ്ചവത്സര പദ്ധതി’. സമകാലീന പ്രാധാന്യമുള്ള വിഷയത്തെ നർമത്തിൽ അവതരിപ്പിച്ച ചിത്രം പ്രേക്ഷക നിരൂപക ശ്രദ്ധ നേടിയിരുന്നു. ഭക്തിയും മിത്തുകളും ചർച്ചാവിഷയമാകുന്ന കേരളത്തിൽ ഏറെ പ്രസക്തമായ വിഷയം തന്നെയാണ് സിനിമയുടെ പ്രമേയം. കിച്ചാപ്പൂസ് എന്റർടെയ്ൻമെന്റ്സിന്റെ ബാനറിൽ കെ ജി അനിൽകുമാർ നിർമ്മിച്ച ചിത്രം സംവിധാനം ചെയ്തിരിക്കുന്നത് പി ജി പ്രേംലാലാണ്. ഇപ്പോഴിതാ ചിത്രം

ഒടിടിയിൽ സ്ട്രീമിം​ഗ് ആരംഭിച്ചിരിക്കുകയാണ്. ഈ വര്‍ഷം ഏപ്രില്‍ മാസത്തില്‍ തിയറ്ററുകളിലെത്തിയ ചിത്രമാണ് പഞ്ചവത്സര പദ്ധതി. എട്ട് മാസത്തിന് ഇപ്പുറമാണ് ചിത്രം ഒടിടിയില്‍ പ്രദര്‍ശനം ആരംഭിച്ചിരിക്കുന്നത്. ഒടിടി പ്ലാറ്റ്‌ഫോമായ മനോരമ മാക്സില്‍ ചിത്രം കാണാനാവും.

പുതുമുഖം കൃഷ്ണേന്ദു എ മേനോൻ ആണ് ചിത്രത്തിലെ നായിക. പി പി കുഞ്ഞികൃഷ്ണൻ, സുധീഷ്, ചെമ്പിൽ അശോകൻ, ബിനോയ് നമ്പാല, ഹരീഷ് പേങ്ങൻ, സിബി തോമസ്, ജിബിൻ ഗോപിനാഥ്, നിഷ സാരംഗ്, മുത്തുമണി, ആര്യ സലിം, ജോളി ചിറയത്ത്, ലാലി പി എം തുടങ്ങി വലിയ താരനിര തന്നെ ചിത്രത്തിലുണ്ട്. പഞ്ചവത്സര പദ്ധതിയുടെ തിരക്കഥ, സംഭാഷണം സജീവ് പാഴൂർ എഴുതിയിരിക്കുന്നു. ആൽബി ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റിംഗ് കിരൺ ദാസാണ്.

റഫീഖ് അഹമ്മദ്, ഏങ്ങണ്ടിയൂർ ചന്ദ്രശേഖരൻ എന്നിവർ എഴുതിയ വരികൾക്ക് ഷാൻ റഹ്‍മാന്‍ സംഗീതം പകരുന്നു. പ്രൊഡക്ഷൻ കൺട്രോളർ ജിനു പി കെ, കല ത്യാഗു തവനൂർ, മേക്കപ്പ് രഞ്ജിത് മണലിപ്പറമ്പിൽ, വസ്ത്രാലങ്കാരം വീണ സ്യമന്തക്, സ്റ്റിൽസ് ജെസ്റ്റിൻ ജെയിംസ്, പോസ്റ്റർ ഡിസൈൻ ആന്റണി സ്റ്റീഫൻ, ചീഫ് അസോസിയേറ്റ് ഡയറക്ടർ എ കെ രജിലേഷ്, ആക്ഷൻ മാഫിയ ശശി, സൗണ്ട് ഡിസൈൻ ജിതിൻ ജോസഫ്, സൗണ്ട് മിക്സിംഗ് സിനോയ് ജോസഫ്, വിഎഫ്എക്സ് അമൽ, ഷിമോൻ എൻ എക്സ്, ഫിനാൻസ് കൺട്രോളർ ധനേഷ് നടുവള്ളിയിൽ, പി ആർ ഒ- എ എസ് ദിനേശ്.