ഏറെ സന്തോഷമുണ്ട്..; ഇനിയും വ്യത്യസ്തതയുള്ള കഥാപാത്രങ്ങളിലൂടെ പ്രേക്ഷകരെ ആകർഷിക്കട്ടെ; നടൻ മോഹൻലാലിന്റെ പുരസ്‌കാരനേട്ടത്തിൽ പ്രതികരിച്ച് ആന്ധ്ര ഉപമുഖ്യമന്ത്രി
ഹൈദരാബാദ്: പ്രശസ്ത നടൻ മോഹൻലാലിന് സമഗ്ര സംഭാവനയ്ക്കുള്ള 2023ലെ ദാദാസാഹിബ് ഫാൽക്കേ പുരസ്കാരം ലഭിച്ചതിനെ അഭിനന്ദിച്ച് ആന്ധ്രാപ്രദേശ് ഉപമുഖ്യമന്ത്രി പവൻ കല്യാൺ രംഗത്തെത്തി. അദ്ദേഹത്തിൻ്റെ അഭിനയ ജീവിതത്തിലെ നാഴികക്കല്ലായ ഈ നേട്ടത്തിൽ ഏറെ സന്തോഷമുണ്ടെന്നും, ഇനിയും വ്യത്യസ്തമായ കഥാപാത്രങ്ങളിലൂടെ പ്രേക്ഷകരെ ആകർഷിക്കാൻ അദ്ദേഹത്തിന് സാധിക്കട്ടെയെന്നും പവൻ കല്യാൺ ആശംസിച്ചു.
സ്വതസിദ്ധമായ അഭിനയത്തികവിലൂടെ വൈവിധ്യമാർന്ന കഥാപാത്രങ്ങളെ അവതരിപ്പിച്ച നടനാണ് മോഹൻലാൽ. അഞ്ചു തവണ ദേശീയ അവാർഡുകൾ നേടിയത് അദ്ദേഹത്തിൻ്റെ അഭിനയ പ്രതിഭക്കുള്ള അംഗീകാരമാണെന്ന് പവൻ കല്യാൺ ചൂണ്ടിക്കാട്ടി. മലയാളത്തിലും മറ്റ് ഇന്ത്യൻ ഭാഷകളിലും അദ്ദേഹം നൽകിയ സംഭാവനകൾ വിലപ്പെട്ടതാണെന്നും അദ്ദേഹം കൂട്ടിച്ചേർത്തു.
ഇൻഫർമേഷൻ ആൻഡ് ബ്രോഡ്കാസ്റ്റിംഗ് മന്ത്രാലയം, തലമുറകളെ പ്രചോദിപ്പിക്കുന്ന സിനിമായാത്രയാണ് മോഹൻലാലിൻ്റേതെന്ന് വിശേഷിപ്പിച്ചു. 2025 സെപ്തംബർ 23ന് നടക്കുന്ന 71-ാമത് ദേശീയ ചലച്ചിത്ര അവാർഡ് ദാന ചടങ്ങിൽ വെച്ചാണ് പുരസ്കാരം സമ്മാനിക്കുക. മലയാളത്തിന് ലഭിക്കുന്ന രണ്ടാമത്തെ ദാദാസാഹിബ് ഫാൽക്കേ പുരസ്കാരമാണിത്.