'നമ്മളെല്ലാം ഇന്ത്യക്കാരല്ലേ, എന്തിനാണ് പരസ്പരം കളിയാക്കുന്നത് ?'; ബോളിവുഡിൽ തെന്നിന്ത്യക്കാരെ പരിഹസിച്ചിരുന്നു; വെളിപ്പെടുത്തലുമായി നടി മധുബാല

മുംബൈ: തെന്നിന്ത്യയിൽ നിന്ന് ബോളിവുഡിലേക്ക് വന്ന അഭിനേതാക്കൾക്ക് ഒരു കാലത്ത് കടുത്ത പരിഹാസങ്ങളും വിവേചനങ്ങളും നേരിടേണ്ടി വന്നിട്ടുണ്ടെന്ന് നടി മധുബാല. 'യോദ്ധ' ഉൾപ്പെടെയുള്ള നിരവധി ദക്ഷിണേന്ത്യൻ ചിത്രങ്ങളിലൂടെ പ്രേക്ഷകരുടെ ഇഷ്ടം നേടിയ മധുബാല, ബോളിവുഡിൽ തന്റെ അനുഭവങ്ങൾ ഒരു അഭിമുഖത്തിൽ തുറന്നുപറയുകയായിരുന്നു.

സംസാരത്തിലെ തെന്നിന്ത്യൻ ശൈലി കാരണം കളിയാക്കലുകൾ നേരിടേണ്ടി വന്നിരുന്നെന്നും, ഇത് മറികടക്കാൻ ഹിന്ദി വളരെ ഒഴുക്കോടെ സംസാരിക്കാൻ ശ്രമിച്ചിരുന്നെന്നും മധുബാല ഓർത്തെടുത്തു. 'നമ്മളെല്ലാം ഇന്ത്യക്കാരല്ലേ, എന്തിനാണ് പരസ്പരം ഇങ്ങനെ കളിയാക്കുന്നത്? അന്നത്തെ കാലത്ത് ഇത്തരം കാര്യങ്ങൾക്ക് വലിയ സ്വീകാര്യതയുണ്ടായിരുന്നു. അതുകൊണ്ട് ഞങ്ങൾക്ക് പ്രതികരിക്കാൻ കഴിഞ്ഞിരുന്നില്ല. എങ്ങനെ ഇതിനെ നേരിടണമെന്ന് എനിക്ക് അന്ന് അറിയില്ലായിരുന്നു' മധുബാല പറഞ്ഞു.

തൊണ്ണൂറുകളിൽ ബോളിവുഡിൽ സജീവമായിരുന്ന മധുബാല, കുട്ടിക്കാലത്തും സമാനമായ അനുഭവങ്ങൾ നേരിട്ടിട്ടുണ്ടെന്ന് വെളിപ്പെടുത്തി. 'ചെറുപ്പമായിരുന്നപ്പോൾ ഞാൻ ഈ 'തെന്നിന്ത്യൻ' ടാഗിനെ ഭയന്നിരുന്നു. ആ പേടി കാരണം ഞാൻ ഉർദു പഠിക്കാൻ പോലും ശ്രമിച്ചു' മധുബാല കൂട്ടിച്ചേർത്തു.

എന്നാൽ, ഇന്ന് ഈ സാഹചര്യം മാറിയെന്നും, താൻ ഒരു തെന്നിന്ത്യക്കാരിയായതിൽ അഭിമാനമുണ്ടെന്നും മധുബാല വ്യക്തമാക്കി. 'ഇന്ന് എനിക്ക് നാണക്കേട് തോന്നുന്നില്ല. എന്റെ സംസാരത്തിൽ എന്തെങ്കിലും തെറ്റുവന്നാലോ തെന്നിന്ത്യൻ ചുവ വന്നാലോ ഞാൻ അതിൽ അഭിമാനിക്കും. ഞാൻ തെന്നിന്ത്യക്കാരിയാണ്, ഹിന്ദി സംസാരിക്കും. എന്റെ ഹിന്ദി കേൾക്കുമ്പോൾ ആർക്കെങ്കിലും എന്തെങ്കിലും പ്രശ്നമുണ്ടെങ്കിൽ അത് എന്നെ ബാധിക്കില്ല' എന്നും മധുബാല പറയുന്നു.