തലൈവർ 173-ൽ വമ്പൻ ട്വിസ്റ്റ്; സിനിമാ പദ്ധതിയിൽ നിന്ന് താൻ പിന്മാറിയെന്ന് സംവിധായകൻ സുന്ദർ സി; പ്രയാസകരമായ തീരുമാനമെന്ന് മറുപടി; ഇതെന്ത് പറ്റിയെന്ന് ഫാൻസ്‌
കമൽഹാസൻ നിർമ്മിക്കുന്നതും രജനികാന്ത് നായകനാകുന്നതുമായ 'തലൈവർ 173' എന്ന ചിത്രത്തിന്റെ സംവിധാനത്തിൽ നിന്ന് പ്രമുഖ സംവിധായകൻ സുന്ദർ സി പിന്മാറി. വ്യാഴാഴ്ച അദ്ദേഹത്തിന്റെ പബ്ലിസിസ്റ്റ് വഴിയാണ് ഈ പ്രഖ്യാപനമുണ്ടായത്. സിനിമാ ലോകത്ത് വലിയ ശ്രദ്ധ നേടിയ ഈ നീക്കം ആരാധകരെയും സിനിമാ പ്രവർത്തകരെയും ഒരുപോലെ അമ്പരപ്പിച്ചിരിക്കുകയാണ്.
ഒഴിവാക്കാനാവാത്തതും അപ്രതീക്ഷിതവുമായ കാരണങ്ങളാണ് ഈ പ്രയാസകരമായ തീരുമാനത്തിലേക്ക് തന്നെ നയിച്ചതെന്ന് സുന്ദർ സി ആരാധകർക്കും അഭ്യുദയകാംക്ഷികൾക്കുമായി പുറത്തിറക്കിയ വാർത്താക്കുറിപ്പിൽ അറിയിച്ചു. "അപ്രതീക്ഷിതവും ഒഴിവാക്കാനാകാത്തതുമായ സാഹചര്യങ്ങൾ കാരണം, #തലൈവർ173 എന്ന ഈ വലിയ പദ്ധതിയിൽ നിന്ന് പിന്മാറാനുള്ള പ്രയാസകരമായ തീരുമാനം ഞാൻ എടുത്തിരിക്കുന്നു," അദ്ദേഹം കൂട്ടിച്ചേർത്തു.
രജനികാന്തിനും കമൽഹാസനുമൊപ്പം പ്രവർത്തിക്കുന്നത് തന്റെ കരിയറിലെ ഒരു സുപ്രധാന നിമിഷമായിരുന്നെന്നും, ഇതിനെ ഒരു 'സ്വപ്ന സാക്ഷാത്കാരം' എന്നും അദ്ദേഹം വിശേഷിപ്പിച്ചു. ഇരു താരങ്ങളോടുമുള്ള അഗാധമായ ബഹുമാനം അദ്ദേഹം പ്രകടിപ്പിച്ചു. "ഈ രണ്ട് ഇതിഹാസങ്ങളുമായുള്ള എന്റെ ബന്ധം ഒരുപാട് കാലം മുൻപേ തുടങ്ങിയതാണ്, അവരെ ഞാൻ എപ്പോഴും ഏറ്റവും ഉയർന്ന സ്ഥാനത്ത് കാണും," സുന്ദർ സി പറഞ്ഞു.