ഇവന് ആള് കുഞ്ഞാണ് 17 വയസേയുള്ളൂ; എനിക്ക് 21 വയസുണ്ട്; ശരിക്കും..നിങ്ങൾ കല്യാണം കഴിഞ്ഞോ എന്നും പലരും ചോദിച്ചു; നല്ല ചേർച്ച ഉണ്ടെന്നും പറഞ്ഞു; അനുഭവം പങ്കിട്ട് പ്രിയതാരം കേശുവും അനീനയും
കൊച്ചി: മലയാളം ടെലിവിഷന്‍ പ്രേക്ഷകരുടെ ഇടയിൽ ഏറെ ജനപ്രീതി ഉള്ള പരമ്പരകളിലൊന്നാണ് ഉപ്പും മുളകും എന്ന പരിപാടി. പരമ്പരയിൽ 'കേശു' എന്ന പ്രധാന കഥാപാത്രത്തെ അവതരിപ്പിക്കുന്നത് അൽസാബിത്ത് ആണ്. പരമ്പരയിൽ ഇപ്പോൾ സ്കൂൾ കാലഘട്ടമൊക്കെ കഴിഞ്ഞ് കേശു എന്ന കഥാപാത്രം വളര്‍ന്നു വലുതായി. ഇപ്പോൾ കേശു വിവാഹം കഴിച്ചിരിക്കുന്നതാണ് ഏറ്റവും പുതിയ ട്വിസ്റ്റ്. കേശുവിന്റെ സഹോദരിയായ പാറു സ്വപ്നം കാണുന്നതായാണ് ഈ വിവാഹസീൻ അവതരിപ്പിച്ചിരിക്കുന്നത്.
'അനീന' എന്ന കഥാപാത്രത്തെയാണ് കേശു വിവാഹം ചെയ്തത്. വലന്റൈൻസ് ദിനത്തോട് അനുബന്ധിച്ചായിരുന്നു കേശുവിന്റെ വിവാഹ എപ്പിസോഡ്. മെർലിൻ എന്ന നടിയാണ് സീരിയലിൽ അനീനയായി എത്തിയത്.
ഇപ്പോഴിതാ, ഈ എപ്പിസോഡ് പുറത്തു വന്നതിനു പിന്നാലെ, തങ്ങൾ യഥാർത്ഥത്തിൽ വിവാഹം കഴിച്ചോ എന്ന് പലരും ചോദിച്ചു എന്ന് മെർലിനും അൽസാബിത്തും മനസ് തുറന്നുപറയുകയാണ്. എപ്പിസോഡ് കണ്ട് ചില അമ്മാമമാർ കല്യാണം കഴിഞ്ഞോ മോളേ എന്നൊക്കെ ചോദിച്ചിട്ടുണ്ടെന്ന് മെർലിൻ പറയുന്നു. ''ഇവന് കുഞ്ഞാണ്. ഇവന് 17 വയസേയുള്ളൂ. എനിക്ക് 21 വയസുണ്ട്. എനിക്കിവന്‍ കുഞ്ഞ് വാവയാണ്'', മെർലിൻ വ്യക്തമാക്കി.
സമാനമായ അനുഭവമാണ് അൽസാബിത്തും പങ്കുവെച്ചത്. ''ഞാന്‍ വീടിന്റെ മുന്നില്‍ നില്‍ക്കുകയായിരുന്നു. അപ്പോൾ ഒരു അപ്പച്ചന്‍ മുന്നിലൂടെ പോയ ശേഷം വേഗത്തില്‍ തിരികെ വന്നിട്ട് ഡേയ് നിന്റെ കല്യാണം കഴിഞ്ഞോ? നിനക്ക് അതിന് 18 ആയോ? എന്ന് ചോദിച്ചു. കല്യാണം കഴിഞ്ഞിട്ടില്ല. 17 ആയതേയുള്ളൂവെന്ന് ഞാന്‍ പറഞ്ഞു.
എന്റെ കല്യാണം കഴിഞ്ഞോ എന്നു ചോദിച്ച് ഉമ്മക്കും ധാരാളം കോളുകള്‍ വന്നിരുന്നു. എന്നെ വിളിക്കുന്നവരോട്, കല്യാണം കഴിഞ്ഞു. അടുത്തതിന് വിളിക്കാമെന്ന് പറയും'', താരം കൂട്ടിച്ചേർത്തു. ഇവരുടെ കല്യാണ എപ്പിസോഡ് ഇപ്പോൾ സോഷ്യൽ മീഡിയയിൽ അടക്കം വൈറലായിരിക്കുകയാണ്.