'കാര്യമുള്ള കാര്യം പറയുന്നവരെ വലിയ ഇഷ്ടമാണ്'; ശിവപ്രസാദ് ചേട്ടനെ കേള്ക്കാളുണ്ട്; പാർട്ടിയേക്കാളുപരിയായി ചില നേതാക്കൾ പറയുന്നതിൽ കാര്യമുണ്ടാകുമെന്നും മീനാക്ഷി
കൊച്ചി: സ്ക്രീനിലെ പ്രകടനത്തിലും ഉപരിയായി സോഷ്യല് മീഡിയ ഇടപെടലുകളിലൂടെ വാര്ത്തകളില് ഇടം നേടിയ യുവ താരമാണ് മീനാക്ഷി അനൂപ്. ഇപ്പോഴിതാ താരം എസ്എഫ്ഐ സംസ്ഥാന പ്രസിഡന്റ് എം ശിവപ്രസാദിനെക്കുറിച്ച് നടത്തിയ പരാമർശം സമൂഹമാധ്യമങ്ങളിൽ വൈറലായിരിക്കുകയാണ്. കക്ഷിരാഷ്ട്രീയത്തിനപ്പുറം കാര്യങ്ങൾ കൃത്യമായി അവതരിപ്പിക്കുന്ന നേതാവെന്ന നിലയിൽ ശിവപ്രസാദിനെ കേൾക്കാൻ തനിക്ക് ഇഷ്ടമാണെന്നാണ് മീനാക്ഷി ഒരു അഭിമുഖത്തിൽ വെളിപ്പെടുത്തിയത്.
'എം ശിവപ്രസാദ് എന്നൊരു ചേട്ടനില്ലേ. ആളെ എനിക്ക് ഇഷ്ടമാണ്. ഞാൻ എപ്പോഴും കേൾക്കുന്ന ആളാണ്. കക്ഷി രാഷ്ട്രീയമല്ല ഞാൻ പറയുന്നത്. പാർട്ടിയേക്കാളുപരിയായി ചില നേതാക്കൾ പറയുന്നതിൽ കാര്യമുണ്ടാകുമല്ലോ. അങ്ങനൊരാളാണ്. കാര്യമുള്ള കാര്യം പറയുന്നവരെ എനിക്ക് വലിയ ഇഷ്ടമാണ്'' എന്നാണ് മീനാക്ഷി പറഞ്ഞത്. ഈ വീഡിയോയാണ് ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നത്.
ബാലതാരമായി സിനിമയിലെത്തി പിന്നീട് ജനപ്രിയ അവതാരകയായി മാറിയ മീനാക്ഷി അനൂപ്, സ്ക്രീനിലെ പ്രകടനങ്ങളേക്കാൾ സാമൂഹിക മാധ്യമങ്ങളിലെ ഇടപെടലുകളിലൂടെയാണ് നിലവിൽ വാർത്തകളിൽ നിറഞ്ഞുനിൽക്കുന്നത്. ഗൗരവമുള്ള വിഷയങ്ങളെക്കുറിച്ചുള്ള ചർച്ചകൾ, ചിരി പടർത്തുന്ന കമന്റുകളും ക്യാപ്ഷനുകളും എന്നിവയിലൂടെ മീനാക്ഷിക്ക് വലിയ ശ്രദ്ധ ലഭിക്കാറുണ്ട്.
അതേസമയം, മീനാക്ഷിയുടെ നിലപാടുകളും കാഴ്ചപ്പാടുകളും പലപ്പോഴും ചർച്ചയാവാറുണ്ട്. അനുകൂലിച്ചും വിമർശിച്ചും ആളുകൾ രംഗത്തെത്താറുണ്ടെങ്കിലും, ട്രോളുകളെ അതേ നാണയത്തിൽ നേരിട്ടാണ് മീനാക്ഷി ഇതിനെല്ലാം മറുപടി നൽകാറുള്ളത്. ഈ സാഹചര്യത്തിലാണ് ശിവപ്രസാദിനെക്കുറിച്ചുള്ള അവരുടെ വാക്കുകളും വൈറലായി മാറിയതും അനുകൂലിച്ചും പ്രതികൂലിച്ചും നിരവധി പേർ പ്രതികരണങ്ങളുമായി എത്തുന്നത്.