'ലാലേട്ടാ, കയ്യിലുള്ള പൈസ മുഴുവൻ ഇട്ടിട്ടാണ് ഈ സിനിമ ചെയ്തത്, രാവണപ്രഭുവിൻ്റെ റിലീസ് തീയതി മാറ്റാമോ?'; ഇത് ഞാൻ ജയിക്കാൻ വേണ്ടി കളിക്കുന്ന കളിയാണ് മോനെയെന്ന് മോഹൻലാൽ; വൈറലായി ഷറഫുദ്ദീന്റെ ഫോൺ കോൾ

കൊച്ചി: ഷറഫുദ്ദീൻ നായകനാകുന്ന പുതിയ ചിത്രം 'പെറ്റ് ഡിറ്റക്ടീവ്' എന്ന ചിത്രത്തിന്റെ പ്രൊമോഷന്റെ ഭാഗമായി സമൂഹ മാധ്യമങ്ങളിലൂടെ പങ്കുവെച്ച വീഡിയോ വൈറാലാകുന്നു. ‘രാവണപ്രഭു’ സിനിമയുടെ റീറിലീസ് തീയതി മാറ്റാമോ എന്ന് ‘മോഹൻലാലി’നെ ഫോണിൽ വിളിച്ചു ചോദിക്കുന്ന വീഡിയോ ആണ് താരം പങ്കുവെച്ചിരിക്കുന്നത്. മോഹൻലാലിന്റെ ശബ്ദം മറ്റാരോ ആണ് അനുകരിക്കുന്നത്.

'ലാലേട്ടാ, രാവണപ്രഭുവിൻ്റെ റിലീസ് തീയതി ഒന്ന് മാറ്റാമോ?' എന്ന് ഷറഫുദ്ദീൻ ചോദിക്കുമ്പോൾ, ചിരിയോടെയാണ് മറുതലയ്ക്കൽ പ്രതികരിക്കുന്നത്. 'കയ്യിലുള്ള പൈസ മുഴുവൻ ഇട്ടിട്ടാണ് ഞാൻ ഈ സിനിമ ചെയ്തത്. ഒരേ സമയം രണ്ട് മോഹൻലാൽ സിനിമകൾ എനിക്ക് താങ്ങാൻ കഴിയില്ല. അതുകൊണ്ട് ഒരപേക്ഷയാണ്,' ഷറഫുദ്ദീൻ വിനയത്തോടെ പറയുന്നു.

എന്നാൽ, മോഹൻലാലിൻ്റെ മറുപടി 'രാവണപ്രഭു' സിനിമയിലെ പ്രശസ്തമായ ഡയലോഗായിരുന്നു: 'ഇത് ഞാൻ ജയിക്കാൻ വേണ്ടി കളിക്കുന്ന കളിയാണ് മോനെ.' ഇത് പറഞ്ഞ് മോഹൻലാൽ ഫോൺ കട്ട് ചെയ്യുകയായിരുന്നു. മോഹൻലാൽ റിലീസ് മാറ്റാൻ തയ്യാറാകാത്തതിനെ തുടർന്ന്, തൻ്റെ സിനിമയുടെ റിലീസ് ഒക്ടോബർ 16-ലേക്ക് മാറ്റിയതായി ഷറഫുദ്ദീൻ വീഡിയോയിൽ അറിയിക്കുന്നു. 'ലാലേട്ടൻ്റെ അനുവാദത്തിനായി കാത്തിരിക്കുകയായിരുന്നു' എന്ന ക്യാപ്ഷനോടെയാണ് താരം ഈ വീഡിയോ പങ്കുവെച്ചിരിക്കുന്നത്. ഷറഫുദ്ദീൻ പ്രൊഡക്ഷൻസ് ബാനറിൽ ഷറഫുദ്ദീൻ തന്നെ നിർമ്മിക്കുന്ന 'പെറ്റ് ഡിറ്റക്ടീവ്' വലിയ പ്രതീക്ഷയോടെയാണ് പ്രേക്ഷകർ കാത്തിരിക്കുന്നത്.