ഷോലെയിലെ ജയിലറുടെ വേഷത്തിലൂടെ ശ്രദ്ധേയൻ; മുതിർന്ന ബോളിവുഡ് നടൻ ഗോവർദ്ധൻ അസ്രാണി അന്തരിച്ചു; വിടവാങ്ങിയത് 350ലധികം ഹിന്ദി സിനിമകളിൽ അഭിനയിച്ച താരം

ന്യൂഡൽഹി: ബോളിവുഡ് നടൻ ഗോവർദ്ധൻ അസ്രാണി (84) അന്തരിച്ചു. ഇന്ന് വൈകിട്ട് 4 മണിയോടെയായിരുന്നു അന്ത്യം. ദീർഘകാലമായി അസുഖബാധിതനായിരുന്നു. രാജസ്ഥാനിലെ ജയ്പൂരിലായിരുന്നു താമസം. ഇന്ന് രാവിലെ അസ്രാണി തന്റെ ഇൻസ്റ്റാഗ്രാം സ്റ്റോറിയിൽ ദീപാവലി ആശംസകൾ പങ്കുവച്ചിരുന്നു. 350ലധികം ഹിന്ദി സിനിമകളിൽ അഭിനയിച്ചിട്ടുണ്ട്.

ഷോലെയിലെ ജയിലറുടെ വേഷത്തിലൂടെയാണ് കൂടുതൽ പ്രശസ്തനായത്. 'ഹം അംഗ്രേസോം കേ സമാനേ കേ ജയിലർ ഹൈ' എന്ന അദ്ദേഹത്തിന്റെ സംഭാഷണം ഇന്നും ഓർമ്മിക്കപ്പെടുന്നു. ചാർലി ചാപ്ലിന്റെ 'ദി ഗ്രേറ്റ് ഡിക്റ്റേറ്റർ' എന്ന ചിത്രത്തിലെ കഥാപാത്രത്തെ മാതൃകയാക്കിയാണ് 'ഷോലേ'യിലെ ജയിലറുടെ വേഷം ചിട്ടപ്പെടുത്തിയത്. ഭൂൽ ഭുലയ്യ, ധമാൽ, ബണ്ടി ഔർ ബാബ്ലി 2, ഓൾ ദി ബെസ്റ്റ്, വെൽക്കം തുടങ്ങി നിരവധി ഹിറ്റ് ചിത്രങ്ങളിൽ അഭിനയിച്ചിട്ടുണ്ട്.