നോമ്പുതുറക്കാൻ പോകുമ്പോൾ ശ്രദ്ധിച്ച് പോയാൽ മതി; അമിതവേഗതയും, വൈകുമെന്ന പേടിയും വേണ്ട; വണ്ടിയിൽ തന്നെ ഇരുന്നാൽ മതി 'ഇഫ്താർ പാക്കറ്റ്' കയ്യിലെത്തും; വീണ്ടും വ്യത്യസ്തമായി ദുബായ് പോലീസ്
ദുബായ്: റമദാന്‍ മാസത്തിൽ വീണ്ടും വ്യത്യസ്തമായി ദുബായ് പോലീസ്. ദുബായിൽ റംസാൻ മാസത്തിന്റെ തുടക്കം മുതൽ തന്നെ പോലീസ് വിതരണം ചെയ്തത് മൂന്ന് ലക്ഷത്തിലേറെ ഇഫ്താര്‍ പാക്കറ്റുകള്‍. റമദാന്‍റെ 25-ാം ദിവസം വരെ 325,250 ഇഫ്താര്‍ പാക്കറ്റുകളാണ് ദുബായ് പോലീസ് വിതരണം ചെയ്തത്. റമദാന്‍ വാഹനാപകടങ്ങള്‍ ഇല്ലാതാക്കുക എന്ന ക്യാമ്പയിനിന്‍റെ ഭാഗമായാണിത്. റോഡ് അപകടങ്ങൾ കുറയ്ക്കാൻ വേണ്ടിയാണ് ഈയൊരു വ്യത്യസ്തമായ പരിപാടിയുമായി ദുബായ് പോലീസ് രംഗത്ത് വന്നത്.
കൃത്യസമയത്ത് നോമ്പുതുറക്കാനായി തിരക്കിട്ട് വാഹനം ഓടിക്കുമ്പോള്‍ പലപ്പോഴും അമിതവേഗം മൂലവും അശ്രദ്ധ മൂലവും അപകടങ്ങള്‍ ഉണ്ടാകാറുണ്ട്. ഇത് പരിഗണിച്ചാണ് റമദാന്‍ വിതൗട്ട് ആക്സിഡന്‍റ്സ് എന്ന ക്യാമ്പയിന്‍ തുടങ്ങിയത്. സുരക്ഷിതമായി വാഹനമോടിക്കേണ്ടത് സംബന്ധിച്ച അവബോധം വര്‍ധിപ്പിക്കാനാണ് ക്യാമ്പയിന്‍ ലക്ഷ്യം ഇടുന്നത്.
നോമ്പുതുറക്കായി തിരക്കിട്ട് പോകുമ്പോള്‍ ഉണ്ടാകുന്ന വാഹനാപകടങ്ങള്‍ കുറയ്ക്കാനായി സിഗ്നലുകളില്‍ വാഹനം നിര്‍ത്തിയിടുമ്പോള്‍ യാത്രക്കാര്‍ക്ക് ഇഫ്താര്‍ പാക്കറ്റുകള്‍ വിതരണം ചെയ്യുകയാണ് ദുബായ് പോലീസ്. അബുദാബി ഉൾപ്പെടെ യുഎഇയിലെ വിവിധ എമിറേറ്റുകളിലെ പോലീസും ഇത് തുടരുന്നുണ്ട്.