താഴ്ന്ന് പറക്കുമ്പോൾ പൈലറ്റുമാർക്ക് ഒന്നും കാണാൻ പറ്റാത്ത അവസ്ഥ; ചുറ്റും മങ്ങിയ കാഴ്ചകൾ; കനത്ത മൂടൽമഞ്ഞിനെ തുടർന്ന് ദുബായ് എയർപോർട്ടിൽ വിമാനങ്ങൾ വഴിതിരിച്ചു വിട്ടു;അതീവ ജാഗ്രത

ദുബായ്: കനത്ത മൂടൽമഞ്ഞിനെ തുടർന്ന് ദുബായ് അന്താരാഷ്ട്ര വിമാനത്താവളത്തിലെ വിമാന സർവീസുകൾ തടസ്സപ്പെട്ടു. കാഴ്ചാപരിധി കുറഞ്ഞതിനെ തുടർന്ന് വ്യാഴാഴ്ച പുലർച്ചെ മുതൽ വിമാനത്താവളത്തിലെ പ്രവർത്തനങ്ങൾക്ക് തടസ്സം നേരിടുന്നുണ്ട്.

ദുബായ് എയർപോർട്ട് അധികൃതരെ ഉദ്ധരിച്ച് ഖലീജ് ടൈംസ് റിപ്പോർട്ട് ചെയ്തതനുസരിച്ച്, പ്രാദേശിക സമയം രാവിലെ 9 മണി വരെ 19 ഇൻബൗണ്ട് വിമാനങ്ങളാണ് സമീപ വിമാനത്താവളങ്ങളിലേക്ക് വഴിതിരിച്ചുവിട്ടത്. പ്രവർത്തനങ്ങൾ എത്രയും വേഗം സാധാരണ നിലയിലാക്കാനും യാത്രക്കാരുടെ ബുദ്ധിമുട്ടുകൾ കുറയ്ക്കാനും എയർലൈനുകൾ, കൺട്രോൾ അതോറിറ്റികൾ, മറ്റ് എയർപോർട്ട് പങ്കാളികൾ എന്നിവരുമായി ചേർന്ന് ദുബായ് എയർപോർട്ട് പ്രവർത്തിക്കുന്നുണ്ടെന്ന് വക്താവ് അറിയിച്ചു.

അതേസമയം, ഷാർജ വിമാനത്താവളത്തിലും കനത്ത മൂടൽമഞ്ഞ് കാരണം നിരവധി വിമാനങ്ങൾ വഴിതിരിച്ചുവിടേണ്ടി വന്നു. ഏറ്റവും പുതിയ വിമാന വിവരങ്ങളെക്കുറിച്ചും ഷെഡ്യൂളുകളിലെ മാറ്റങ്ങളെക്കുറിച്ചും അറിയാൻ എയർലൈനുകളുമായി ബന്ധപ്പെടണമെന്ന് ഷാർജ വിമാനത്താവള അധികൃതർ നിർദ്ദേശം നൽകി. മോശം കാലാവസ്ഥ കാരണം ഷെഡ്യൂൾ ചെയ്ത നിരവധി സർവീസുകളെ ബാധിച്ചെന്നും, വിമാനങ്ങളുടെ നിലവിലെ സ്റ്റാറ്റസ് മുൻകൂട്ടി സ്ഥിരീകരിക്കാതെ യാത്രക്കാർ വിമാനത്താവളത്തിലേക്ക് വരുന്നത് ഒഴിവാക്കണമെന്നും ഷാർജ എയർപോർട്ട് അറിയിച്ചു.