മുടികൊഴിച്ചിലൊക്കെ ഇനി പമ്പ കടക്കും..; ശരീരഭാരം കുറയ്ക്കാനും കേമൻ..; 'റാ​ഗി'യുടെ ആരോ​ഗ്യ​ഗുണങ്ങൾ അറിയാം

ആരോഗ്യ സംരക്ഷണത്തിന് ഏറെ ഗുണകരമായ 'റാ​ഗി' വിവിധ രോഗങ്ങളെ അകറ്റി നിർത്താൻ സഹായിക്കുമെന്ന് പഠനങ്ങൾ പറയുന്നു. കാൽസ്യം, നാരുകൾ, കുറഞ്ഞ ഗ്ലൈസെമിക് സൂചിക എന്നിവ അടങ്ങിയ റാ​ഗി മൊത്തത്തിലുള്ള ആരോഗ്യത്തിന് ഉത്തമമാണ്.

ശക്തമായ എല്ലുകൾക്കും പല്ലുകൾക്കും ആവശ്യമായ കാൽസ്യം റാ​ഗിയിൽ ധാരാളമായി അടങ്ങിയിട്ടുണ്ട്. ഇത് എല്ലുകളുടെ ബലം വർദ്ധിപ്പിക്കുകയും ഒടിവുകൾ, ഓസ്റ്റിയോപൊറോസിസ് പോലുള്ള രോഗങ്ങൾ വരാനുള്ള സാധ്യത കുറയ്ക്കുകയും ചെയ്യുന്നു. ശരീരഭാരം നിയന്ത്രിക്കാനും റാ​ഗി സഹായിക്കും. ഉയർന്ന അളവിലുള്ള നാരുകളും പ്രോട്ടീനും ദീർഘനേരം വിശപ്പില്ലാത്ത പ്രതീതി നൽകുകയും അതുവഴി അമിതമായി ഭക്ഷണം കഴിക്കുന്നത് ഒഴിവാക്കാൻ സഹായിക്കുകയും ചെയ്യുന്നു.

പ്രമേഹ രോഗികൾക്കും റാ​ഗി ഗുണകരമാണ്. ഇതിന്റെ കുറഞ്ഞ ഗ്ലൈസെമിക് സൂചിക രക്തത്തിലെ പഞ്ചസാരയുടെ അളവ് പെട്ടെന്ന് കൂടുന്നത് തടയുന്നു. ഇരുമ്പിന്റെ അംശം ഹീമോഗ്ലോബിൻ ഉത്പാദനത്തെ ത്വരിതപ്പെടുത്തുകയും വിളർച്ചയെ പ്രതിരോധിക്കുകയും ചെയ്യുന്നു.

ദഹനസംബന്ധമായ പ്രശ്നങ്ങൾ ലഘൂകരിക്കാനും മലബന്ധം ഒഴിവാക്കാനും റാ​ഗിയിലെ നാരുകൾ സഹായിക്കും. ഹൃദയാരോഗ്യത്തിനും റാ​ഗി നല്ലതാണ്. ഇതിലെ കുറഞ്ഞ കൊളസ്ട്രോൾ, ഉയർന്ന നാരുകൾ എന്നിവ ഹൃദയത്തിന് അനുയോജ്യമാണ്. കൂടാതെ, ആന്റിഓക്‌സിഡന്റുകൾ അടങ്ങിയതിനാൽ ശരീരത്തിലെ ഓക്സിഡേറ്റീവ് സമ്മർദ്ദം കുറയ്ക്കാനും ഹൃദയ സംബന്ധമായ രോഗ സാധ്യതയെ ചെറുക്കാനും ഇത് സഹായകമാകും.

ചർമ്മത്തിന്റെ ഇലാസ്തികത മെച്ചപ്പെടുത്താനും മുടിയുടെ ആരോഗ്യത്തിനും റാ​ഗിയിലെ അവശ്യ അമിനോ ആസിഡുകളും വിറ്റാമിനുകളും സഹായിക്കുന്നു. ഗർഭകാലത്തും മുലയൂട്ടുന്ന സമയത്തും ആവശ്യമായ കാൽസ്യം, ഇരുമ്പ്, നാരുകൾ എന്നിവയുടെ ഉറവിടമെന്ന നിലയിൽ റാ​ഗി ഏറെ പ്രയോജനകരമാണ്. കഞ്ഞി, പുട്ട്, ദോശ തുടങ്ങിയ വിവിധ രൂപങ്ങളിൽ റാ​ഗി ഭക്ഷണത്തിൽ ഉൾപ്പെടുത്താം.