പടക്കനിര്‍മാണശാലയിൽ വൻ പൊട്ടിത്തെറി; ആറ് പേര്‍ മരിച്ചു; നിരവധിപേർക്ക് പരിക്ക്; വ്യാപക നാശനഷ്ടം; ഷോട്ട് സര്‍ക്യൂട്ടെന്ന് സംശയം; ദാരുണ സംഭവം തമിഴ്‌നാട്ടിൽ
വിരുദുനഗർ: തമിഴ്‌നാട്ടിലെ വിരുദുനഗറിലെ പടക്കനിര്‍മാണശാലയിൽ ഉണ്ടായ പൊട്ടിത്തെറിയില്‍ ആറ് പേര്‍ കൊല്ലപ്പെട്ടതായി റിപ്പോർട്ടുകൾ. സംഭവത്തിൽ നിരവധി പേര്‍ക്ക് പരിക്കേറ്റു. മരണപ്പെട്ടവരെല്ലാം ഫാക്ടറിയിലെ തൊഴിലാളികളെന്നാണ് ലഭിക്കുന്ന റിപ്പോർട്ടുകൾ.
തമിഴ്‌നാട്ടിലെ വിരുദുനഗറിലെ സത്തൂരിലാണ് നാടിനെ നടുക്കിയ അപകടം ഉണ്ടയത്. പ്രവര്‍ത്തിക്കുന്ന സായ്‌റാം ഫയര്‍വര്‍ക്‌സ് ഫാക്ടറിയിലാണ് സംഭവം നടന്നത്. സ്‌ഫോടനത്തില്‍ ഫാക്ടറിയിലെ നാല് മുറികള്‍ പൂര്‍ണമായും കത്തിനശിക്കുകയും ചെയ്തിട്ടുണ്ട്.
അപകടകാരണം ഇതുവരെ വ്യക്തമായിട്ടില്ല. ഷോട്ട് സര്‍ക്യൂട്ടോ പടക്കനിര്‍മാണ സാമഗ്രികള്‍ തമ്മില്‍ ഉരസിയപ്പോഴുണ്ടായ തീപ്പൊരിയോ ആകാം അപകടകാരണമെന്നാണ് സംശയിക്കുന്നത്. ഫയര്‍ഫോഴ്‌സും പോലീസും സ്ഥലത്ത് എത്തിയാണ് രക്ഷാപ്രവര്‍ത്തനം നടത്തിയത്. പരിക്കേറ്റവരെ ആശുപത്രിയിൽ എത്തിച്ചിട്ടുണ്ട്. സ്ഥലത്ത് പോലീസ് സംഘമെത്തി തുടർനടപടികൾ സ്വീകരിച്ചു.