ലക്ഷദ്വീപ് ബി ജെ പി യില്‍ വ്യക്തി താല്പര്യങ്ങള്‍ പിടി മുറുക്കരുതെന്ന ആവശ്യം ശക്തം; സംഘടനാ തെരഞ്ഞെടുപ്പ് പക പോക്കലിന് അവസരമാക്കി മാറ്റരുതെന്നും ഒരു വിഭാഗം നേതാക്കള്‍; കുടുംബ വാഴ്ചയ്‌ക്കെതിരെ വികാരം ഉയരുമ്പോള്‍
കവരത്തി :ലക്ഷദ്വീപ് ബി.ജെ.പി നേതൃത്വത്തിന്റെ പുതിയ പ്രഖ്യാപനങ്ങള്‍ പാര്‍ട്ടിയില്‍ വലിയ അനിശ്ചിതത്വവും പ്രതിഷേധത്തിനും കാരണമാകുന്നു. ജില്ലാ പ്രസിഡന്റ്മാരുടെയും സംസ്ഥാന കൗണ്‍സിലിന്റെയും പട്ടികയില്‍ നല്‍കിയ മാറ്റങ്ങള്‍ വ്യക്തി താത്പര്യപരമായതാണെന്നും പാര്‍ട്ടി പ്രമാണങ്ങള്‍ ലംഘിച്ചെന്നുമുള്ള ആരോപണങ്ങള്‍ ശക്തമായി ഉയര്‍ന്നിരിക്കുകയാണ്. മുതിര്‍ന്ന നേതാക്കളും പാര്‍ട്ടി പ്രവര്‍ത്തകരും പ്രതിഷേധം പ്രകടിപ്പിച്ചുകൊണ്ട്, ആസൂത്രിതമായി അനുഭവപരിചയസമ്പന്നരെയും സജീവ പ്രവര്‍ത്തകരെയും പുറത്താക്കുന്ന നടപടി ശരിയല്ലെന്നും അത് വ്യക്തിപരമായ ബന്ധങ്ങളെ മുന്‍നിര്‍ത്തിയതാണെന്നും ആരോപിക്കുന്നു.
പ്രവര്‍ത്തനപരമായ പരിചയസമ്പത്തുള്ളവരെ ഒഴിവാക്കി അനുഭവമില്ലാത്തവരെ പരിഗണിച്ചതാണ് പ്രധാന ആശങ്ക. പാര്‍ട്ടിയുമായി ദീര്‍ഘകാല ബന്ധമുള്ള നേതാക്കളുടെ ഒഴിവാക്കല്‍ പാര്‍ട്ടിയുടെ അടിസ്ഥാന തത്വങ്ങള്‍ക്ക് എതിരാണെന്ന് ഒരു വിഭാഗം പറയുന്നു. ഈ വിവാദം കൂടുതല്‍ രൂക്ഷമാക്കുന്നതാണ്, സംസ്ഥാന അധ്യക്ഷന്‍ മുമ്പ് കോണ്‍ഗ്രസുമായി ബന്ധമുണ്ടായിരുന്നതും അദ്ദേഹത്തിന്റെ കുടുംബാംഗങ്ങള്‍ ബി.ജെ.പി ലക്ഷദ്വീപ് യൂണിറ്റില്‍ വ്യക്തിപരമായ പ്രാധാന്യം നേടുന്നതുമാണ് നിലവിലെ സാഹചര്യം എന്നും ഒരു വിഭാഗം ചൂണ്ടിക്കാട്ടുന്നു. അടുത്ത ബന്ധുക്കളെ പ്രധാന നിലകളില്‍ കൊണ്ടുവരുകയും മറ്റ് പ്രവര്‍ത്തകരെ ഉപദ്രവിക്കുകയും ചെയ്യുന്നത് പാര്‍ട്ടിക്കുള്ളില്‍ 'കുടുംബവാഴ്ച' ഉള്ളതായി കാണിക്കുന്നു.
പ്രവര്‍ത്തകര്‍ ഇപ്പോള്‍ ആവശ്യപ്പെടുന്നത് പാര്‍ട്ടിയില്‍ സമത്വവും ഐക്യവും പുനസ്ഥാപിക്കുന്നതിന് കേന്ദ്ര നേതാക്കളുടെ ഇടപെടലാണ്. അവര്‍ ഒരു സുതാര്യവും പ്രതിബദ്ധതയുള്ള നേതാവിനെ വേണമെന്നാണ് ആവശ്യമുയര്‍ത്തുന്നത്. കൊച്ചി കേന്ദ്രീകരിച്ചുള്ള അധികാര കേന്ദ്രങ്ങളുടെ പാര്‍ട്ടിയെ നിയന്ത്രിക്കുന്ന നടപടികള്‍ ഇനി അനുവദിക്കില്ലെന്നും ഒരു വിഭാഗം നേതാക്കള്‍ പറയുന്നു.