പെണ്സുഹൃത്തിനെച്ചൊല്ലി തര്ക്കം; സുഹൃത്തിനെ കൊന്ന് കഷ്ണങ്ങളാക്കി കുഴല്ക്കിണറിലെറിഞ്ഞു; യുവാവ് അറസ്റ്റില്
സുഹൃത്തിനെ കൊന്ന് കഷ്ണങ്ങളാക്കി കുഴല്ക്കിണറിലെറിഞ്ഞു; യുവാവ് അറസ്റ്റില്
ഗാന്ധിനഗര്: പെണ്സുഹൃത്തിനെച്ചൊല്ലിയുള്ള തര്ക്കത്തിന് പിന്നാലെ സുഹൃത്തിനെ കൊന്ന് കഷ്ണങ്ങളാക്കി കുഴല്ക്കിണറിലെറിഞ്ഞ യുവാവ് അറസ്റ്റില്. ഗുജറാത്തിലാണ് നാടിനെ നടുക്കിയ സംഭവം. നഖത്രാന സ്വദേശി രമേഷ് മഹേശ്വരിയാണ് കൊല്ലപ്പെട്ടത്. സംഭവത്തില് ഇയാളുടെ സുഹൃത്ത് കിഷോറിനെ (19) പൊലീസ് അറസ്റ്റ് ചെയ്തു. മൃതദേഹാവശിഷ്ടങ്ങള് കുഴല് കിണറില് നിന്നും കണ്ടെടുത്തു.
ഡിസംബര് രണ്ടാം തീയതി മുതല് യുവാവിനെ കാണാതായതിനെ തുടര്ന്ന് രമേഷിന്റെ സഹോദരന് പൊലീസില് പരാതി നല്കി. അടുത്ത സുഹൃത്തായ കിഷോറിനെ പൊലീസ് ചോദ്യം ചെയ്തതോടെയാണ് കൊലപാതക വിവരം പുറത്തുവന്നത്. പെണ്സുഹൃത്തിനെച്ചൊല്ലിയുള്ള തര്ക്കമാണ് കൊലപാതകത്തിന് കാരണമെന്ന് കിഷോര് പൊലീസിനോട് പറഞ്ഞു.
രമേഷ് വിവാഹിതയായ യുവതിയുമായി ഏതാനും നാളുകളായി അടുപ്പത്തിലായിരുന്നു. ഇതേ യുവതിക്ക് കിഷോര് ഇന്സ്റ്റഗ്രാമില് സന്ദേശം അയയ്ക്കുകയും താനുമായി സൗഹൃദത്തിലാകണമെന്ന് ആവശ്യപ്പെടുകയും ചെയ്തു. എന്നാല് ഇക്കാര്യം യുവതി രമേഷിനെ അറിയിച്ചതിനെ തുടര്ന്ന് ഇരുവരും തമ്മില് വഴക്കാ.ി ഇതിനിടയിലാണ് കിഷോര് രമേഷിനെ കൊലപ്പെടുത്തിയത്. കൊലയ്ക്ക്് ശേഷം കത്തി ഉപയോഗിച്ച് രമേഷിന്റെ തലയും കൈകാലുകളും മുറിച്ചു. ശേഷം ഇവ കുഴല്ക്കിണറിലെറിയുകയും ബാക്കി ഭാഗങ്ങള് കത്തിക്കുകയും ചെയ്തു. മൃതദേഹം കത്തിക്കാന് പ്രായപൂര്ത്തിയാകാത്ത കുട്ടി സഹായിച്ചെന്നും ഈ കുട്ടിയെ കസ്റ്റഡിയിലെടുത്ത് ചോദ്യം ചെയ്യുകയാണെന്നും പൊലീസ് പറഞ്ഞു.
യുവാവിന്റെ മൊഴിയ്ക്ക് പിന്നാലെ സംഭവ സ്ഥലത്തെത്തിയ നഖത്രാന പൊലീസ് കുഴല്ക്കിണറില് നിന്ന് മൃതദേഹാവശിഷ്ടങ്ങള് കണ്ടെത്തി. സമീപത്ത് കത്തിക്കരിഞ്ഞ നിലയില് ചില ശരീരഭാഗങ്ങളും ഉണ്ടായിരുന്നു. സംഭവത്തില് കൂടുതല് അന്വേഷണം നടക്കുകയാണെന്ന് പൊലീസ് അറിയിച്ചു.