അശ്രദ്ധമായി വാഹനമോടിക്കാതിരിക്കാൻ ആവശ്യപ്പെട്ട ദലിത്‌ വിദ്യാർത്ഥിക്ക് നേരെ ആക്രമണം; വീട് കയറി ബിയർ കുപ്പി കൊണ്ടു തല അടിച്ചു പൊട്ടിച്ചു; പ്രതികൾ ഒളിവിൽ
തിരുനെൽവേലി: തമിഴ്നാട്ടിലെ തിരുനെൽവേലിയിൽ അമിത വേഗത്തിൽ കാർ ഓടിച്ചത് ചോദ്യം ദലിത്‌ വിദ്യാർത്ഥിക്ക് നേരെ പ്രബല ജാതിയിൽപ്പെട്ട യുവാക്കളുടെ ആക്രമണം. ഇന്നലെ രാത്രിയാണ് സംഭവമുണ്ടായത്. ആക്രമത്തിൽ രണ്ടാം വർഷ പോളിടെക്നിക് വിദ്യാർത്ഥിക്ക് തലയിൽ സാരമായി പരിക്കേറ്റു. മേളപട്ടം ഗ്രാമത്തിലെ വീട്ടിൽ അതിക്രമിച്ച് കയറി തലയിൽ ബിയർ കുപ്പി കൊണ്ട് അടിക്കുകകയായിരുന്നു.
തിങ്കളാഴ്ച ഉച്ചയോടെ വീടിന് സമീപം നടക്കുമ്പോൾ അമിത വേഗതയിൽ വന്ന കാർ വിദ്യാർത്ഥിക്ക് അപകടം ഉണ്ടാക്കും വിധം കടന്ന് പോയി. തലനാരിഴയ്ക്കാണ് വിദ്യാർത്ഥി രക്ഷപ്പെട്ടത്. ഇതിനെ ചോദ്യം ചെയ്തതായിരുന്നു പ്രകോപനമുണ്ടാക്കിയത്. അശ്രദ്ധമായി വാഹനമോടിക്കാതെ സാവധാനം ഓടിക്കാൻ വിദ്യാർത്ഥി ആവശ്യപ്പെട്ടു. തുടർന്ന് കാറിലുണ്ടായിരുന്നവരുമായി രൂക്ഷമായ വാക്ക് തർക്കമുണ്ടായി. ഇതിന്റെ പ്രതികാരമായാണ് രാത്രി സംഘമായി വന്ന് ആക്രമികൾ വിദ്യാർത്ഥിയെ മർദിച്ചത്.
വീട്ടിൽ അതിക്രമിച്ച് കയറി വിദ്യാർത്ഥിയെ മർദിക്കുകയായിരുന്നു. ബിയർ കുപ്പി കൊണ്ടു തല അടിച്ചു പൊട്ടിക്കുകയും വാക്കത്തി ഉപയോഗിച്ച് വെട്ടി പരിക്കേൽപ്പിക്കുകയും ചെയ്തു. ഗുരുതരമായി പരിക്കേറ്റ വിദ്യാർത്ഥി തിരുനെൽവേലി മെഡിക്കൽ കോളേജ് ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്. പറയാതി ലഭിച്ചിട്ടും സംഭവത്തിൽ പോലീസ് ഇതുവരെ നടപടി എടുത്തില്ലെന്ന ആക്ഷേപവുമുണ്ട്. അക്രമി സംഘം ഒളിവിലാണെന്നാണ് സൂചന.