വിവരം അറിഞ്ഞപ്പോൾ തന്നെ സ്പോട്ടിലെത്തിയ പോലീസ്; പക്ഷെ ജോലിയിൽ മുഴുകിയിരുന്ന സൈഫുദ്ദീൻ ഇത് ഒന്നും അറിഞ്ഞില്ല; പരിശോധനയിൽ കള്ളത്തരം കൈയ്യോടെ പൊക്കി; ആ 36-കാരൻ ഇനി അഴിയെണ്ണും

മലപ്പുറം: ജില്ലയിൽ ലഹരിമരുന്ന് വിൽപ്പന നടത്തുന്ന സംഘങ്ങൾക്കെതിരെ പോലീസ് നടപടി ശക്തമാക്കുന്നു. ബാംഗ്ലൂരിൽ നിന്ന് കേരളത്തിലേക്ക് കടത്തിയ 50 ഗ്രാം എംഡിഎംഎയുമായി (MDMA) യുവാവിനെ മലപ്പുറം പോലീസ് പിടികൂടി. വെള്ളില കോഴിപ്പറമ്പ് സ്വദേശി വലിയ പീടിയേക്കൽ സൈഫുദ്ദീൻ (36) ആണ് പിടിയിലായത്. മലപ്പുറം ജില്ലാ പോലീസ് മേധാവി ചൈത്ര തെരേസ ജോൺ ഐപിഎസിന് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന.

ഇതര സംസ്ഥാനങ്ങളിൽ നിന്ന് ജില്ലയിലേക്ക് സിന്തറ്റിക് ലഹരിമരുന്നുകൾ വൻതോതിൽ എത്തുന്നതായി പോലീസിന് നേരത്തെ തന്നെ സൂചന ലഭിച്ചിരുന്നു. ഇതിന്റെ അടിസ്ഥാനത്തിൽ മലപ്പുറം പോലീസും ജില്ലാ ഡാൻസാഫ് (DANSAF) സ്ക്വാഡും സംയുക്തമായി നടത്തിയ രഹസ്യാന്വേഷണത്തിലാണ് സൈഫുദ്ദീനെ കുറിച്ചുള്ള വിവരങ്ങൾ ലഭിക്കുന്നത്. ഇന്ന് പുലർച്ചെ സൈഫുദ്ദീന്റെ വീട്ടിൽ പോലീസ് സംഘം മിന്നൽ പരിശോധന നടത്തുകയായിരുന്നു.

ബാംഗ്ലൂരിൽ നിന്ന് കാർ മാർഗ്ഗം കടത്തിക്കൊണ്ടുവന്ന ലഹരിമരുന്ന് രാത്രിയിൽ വീട്ടിലിരുന്ന് ചെറിയ പാക്കറ്റുകളിലാക്കി മാറ്റുന്നതിനിടെയാണ് പോലീസ് സംഘം ഇയാളെ കൈയോടെ പിടികൂടിയത്. 50 ഗ്രാമോളം തൂക്കം വരുന്ന എംഡിഎംഎ ഇയാളിൽ നിന്ന് കണ്ടെടുത്തിട്ടുണ്ട്. നിലവിലെ വിപണിയിൽ ലക്ഷക്കണക്കിന് രൂപ വിലമതിക്കുന്ന മരുന്നാണിത്.

പിടിയിലായ സൈഫുദ്ദീനെ കൂടുതൽ ചോദ്യം ചെയ്തപ്പോൾ ലഹരി കടത്തിന്റെ ഞെട്ടിക്കുന്ന വിവരങ്ങളാണ് പുറത്തുവന്നത്. ബാംഗ്ലൂരിൽ നിന്ന് ലഹരിമരുന്ന് എത്തിച്ച് മലപ്പുറം ജില്ലയിൽ മാത്രമല്ല, ആവശ്യക്കാർക്കനുസരിച്ച് എറണാകുളം ഉൾപ്പെടെയുള്ള മറ്റ് ജില്ലകളിലേക്കും ഇയാൾ എത്തിച്ചു നൽകാറുണ്ടെന്ന് പോലീസിനോട് സമ്മതിച്ചു.

ലഹരി മാഫിയയിലെ പ്രധാന കണ്ണിയായ ഇയാൾക്ക് പിന്നിൽ വലിയൊരു സംഘം തന്നെയുണ്ടെന്നാണ് പോലീസിന്റെ നിഗമനം. ഈ സംഘത്തിലെ മറ്റ് അംഗങ്ങളെക്കുറിച്ചും ലഹരി ഉറവിടങ്ങളെക്കുറിച്ചും പോലീസിന് വ്യക്തമായ സൂചനകൾ ലഭിച്ചിട്ടുണ്ട്. വരും ദിവസങ്ങളിൽ കൂടുതൽ അറസ്റ്റുകൾ ഉണ്ടാകുമെന്നാണ് സൂചന.

മലപ്പുറം ഡിവൈഎസ്പി സുഭാഷ് ബാബു കെ.സി, പെരിന്തൽമണ്ണ ഇൻസ്പെക്ടർ സുമേഷ് സുധാകരൻ, മലപ്പുറം എസ്.ഐ എ.എം യാസിർ, എസ്.ഐ അൻവർ സാദിഖ് എന്നിവരുടെ നേതൃത്വത്തിലുള്ള സംഘമാണ് പരിശോധനയ്ക്ക് നേതൃത്വം നൽകിയത്. കൂടാതെ എസ്‍സിപിഒ രാജേഷ്, സുധീഷ് പെരിന്തൽമണ്ണ എന്നിവരും മലപ്പുറം ഡാൻസാഫ് സ്ക്വാഡും ഈ ഓപ്പറേഷനിൽ പങ്കാളികളായി. പ്രതിയെ കോടതിയിൽ ഹാജരാക്കി റിമാൻഡ് ചെയ്യാനുള്ള നടപടികൾ പുരോഗമിക്കുകയാണ്.

മലപ്പുറം ജില്ലയെ ലഹരിമുക്തമാക്കുന്നതിന്റെ ഭാഗമായി വരും ദിവസങ്ങളിലും പരിശോധനകൾ കർശനമാക്കുമെന്ന് പോലീസ് അറിയിച്ചു. ജനങ്ങൾ ലഹരി ഇടപാടുകളെക്കുറിച്ച് വിവരങ്ങൾ ലഭിച്ചാൽ പോലീസിനെ അറിയിക്കണമെന്നും അധികൃതർ അഭ്യർത്ഥിച്ചു.