പിന്നിൽ നിന്ന് പിടിച്ച് ഒരൊറ്റ തള്ള്; തെന്നി താഴെ വീണതോടെ കാല് കൊണ്ട് ആഞ്ഞ് ചവിട്ടി; ചെരിപ്പൂരി കലി തീരുന്നതുവരെ മുഖത്ത് അടിക്കൽ; ചുറ്റും കണ്ടുനിൽക്കുന്നവർ പോലും പിടിച്ചുമാറ്റാതെ സങ്കടകാഴ്ച; ഇവർ തമ്മിലുള്ള ബന്ധം അറിഞ്ഞ് പൊലീസിന് ഞെട്ടൽ; എല്ലാം ഫോണിൽ പകർത്തിയപ്പോൾ സംഭവിച്ചത്

മംഗളൂരു: സ്വന്തം മകൾക്കെതിരെ പരാതി നൽകാനെത്തിയ ഒരമ്മയ്ക്ക് ഗ്രാമപഞ്ചായത്ത് ഓഫീസിന്റെ പടിക്കൽ വെച്ച് നേരിടേണ്ടി വന്നത് അതിക്രൂരമായ മർദനം. മംഗളൂരു മൂഡുഷെഡ്ഡെ ഗ്രാമപഞ്ചായത്ത് ഓഫീസിന് മുന്നിൽ വെച്ചാണ് മകൾ അമ്മയെ ചെരിപ്പൂരി അടിക്കുകയും ക്രൂരമായി ഉപദ്രവിക്കുകയും ചെയ്തത്. ഈ സംഭവത്തിന്റെ ദൃശ്യങ്ങൾ സമൂഹ മാധ്യമങ്ങളിൽ അതിവേഗം പ്രചരിച്ചതോടെ സംഭവം വലിയ പ്രതിഷേധത്തിനും രോഷത്തിനും ഇടയാക്കിയിരിക്കുകയാണ്.

മൂഡുഷെഡ്ഡെയിലെ ശിവനഗരയിൽ താമസിക്കുന്ന അമ്മയും മകളും തമ്മിൽ ഏറെക്കാലമായി വഴക്കുകളും തർക്കങ്ങളും പതിവായിരുന്നുവെന്നാണ് പ്രാദേശിക റിപ്പോർട്ടുകൾ സൂചിപ്പിക്കുന്നത്. ഈ തർക്കങ്ങളുടെയെല്ലാം തുടർച്ചയായി, അടുത്തിടെ മകൾക്കെതിരെ ഔദ്യോഗികമായി പരാതി നൽകുന്നതിനാണ് അമ്മ മൂഡുഷെഡ്ഡെ ഗ്രാമപഞ്ചായത്ത് ഓഫീസിലെത്തിയത്. എന്നാൽ, ഓഫീസിന് മുന്നിൽ വെച്ച് മകൾ അമ്മയെ തടയുകയും വാക്കുതർക്കം രൂക്ഷമായതോടെ ശാരീരികമായി ആക്രമിക്കുകയുമായിരുന്നു.

സംഭവത്തിനിടെ കോപാകുലയായ മകൾ അമ്മയുടെ മുഖത്തും ശരീരത്തിലും ചെരുപ്പൂരി ആവർത്തിച്ച് അടിക്കുന്നത് വീഡിയോയിൽ വ്യക്തമാണ്. പരസ്യമായി റോഡരികിൽ വെച്ച് ഒരു വയോധികയായ സ്ത്രീ ക്രൂരമായി മർദിക്കപ്പെട്ടിട്ടും, പഞ്ചായത്ത് പരിസരത്ത് ഉണ്ടായിരുന്നവരിൽ പലരും കാഴ്ചക്കാരായി നോക്കി നിൽക്കുക മാത്രമാണ് ചെയ്തത്.

ഈ സംഭവം കാണാനിടയായവർ അമ്മയെ രക്ഷിക്കാൻ ശ്രമിക്കുന്നതിന് പകരം മൊബൈൽ ഫോണിൽ ദൃശ്യങ്ങൾ പകർത്തുകയായിരുന്നു. ഗ്രാമപഞ്ചായത്ത് ഓഫീസിലെ ജീവനക്കാർ ഉൾപ്പെടെയുള്ളവർ ആക്രമണം തടയാനോ, ഉടൻതന്നെ പോലീസിനെ വിവരമറിയിക്കാനോ തയ്യാറാവാത്തതിനെതിരെ സമൂഹമാധ്യമങ്ങളിൽ കടുത്ത വിമർശനമാണ് ഉയർന്നിരിക്കുന്നത്.

അമ്മയെ മകൾ പരസ്യമായി ആക്രമിക്കുന്ന ദൃശ്യം വ്യാപകമായി പ്രചരിച്ചതോടെ, ഇത്തരം പൊതുസ്ഥലങ്ങളിൽ പോലും സുരക്ഷിതത്വമില്ലാത്ത അവസ്ഥയുണ്ടെങ്കിൽ സാധാരണക്കാർ എവിടെ പരാതി നൽകുമെന്ന ചോദ്യമുയരുന്നു. വയോധികയെ രക്ഷിക്കാതെ ദൃശ്യം പകർത്തിയ ജീവനക്കാരുടെയും മറ്റ് വ്യക്തികളുടെയും നിരുത്തരവാദപരമായ സമീപനത്തിനെതിരെ പലരും രൂക്ഷമായ ഭാഷയിൽ പ്രതികരിച്ചു.

അമ്മയും മകളും തമ്മിലുള്ള വാക്കുതർക്കത്തിന്റെ പേരിൽ ഇതുവരെ പോലീസ് സ്വമേധയാ കേസ് രജിസ്റ്റർ ചെയ്തിട്ടില്ലെന്നാണ് റിപ്പോർട്ട്. എന്നാൽ, മുൻപ് അമ്മയുടെ പരാതിയെ തുടർന്ന് കാവൂർ പോലീസ് സ്റ്റേഷനിൽ ഇരുവരെയും വിളിച്ചുവരുത്തി കൗൺസിലിംഗ് നൽകി മടക്കി അയച്ചിരുന്നു.

അതേസമയം, ഈ ദൃശ്യങ്ങൾ റെക്കോർഡ് ചെയ്യുകയും വ്യാപകമായി പ്രചരിപ്പിക്കുകയും ചെയ്ത വ്യക്തിക്കെതിരെ നിയമനടപടി സ്വീകരിക്കുമെന്ന് മംഗളൂരു സിറ്റി പോലീസ് കമ്മീഷണർ അറിയിച്ചു. സമൂഹത്തിൽ പ്രകോപനപരമായ ദൃശ്യങ്ങൾ പ്രചരിപ്പിക്കുന്നതിന് എതിരെയാണ് നടപടി.