രണ്ടാഴ്ചക്കിടെ സംസ്ഥാനത്ത് നിന്ന് പിടികൂടിയത് 1.664 കിലോഗ്രാം എംഡിഎംഎ; 400 ഗ്രാമോളം പിടികൂടിയത് നഗരപരിധിക്കു പുറത്തുനിന്ന്; മാര്‍ച്ചില്‍ നടത്തിയ പോലീസ് റെയ്ഡില്‍ പിടികൂടിയത് 266 പേരെ; കൂടുതലും നഗരപരിധിക്ക് പുറത്ത് നിന്ന്; ലഹരിക്കടത്തും ഉപയോഗവും നഗരങ്ങളിലില്‍ നിന്ന് മാറി ഗ്രാമപ്രദേശങ്ങളിലേക്കും വ്യാപിക്കുന്നു
തിരുവനന്തപുരം: ലഹരിക്കടത്തും ഉപയോഗവും നഗരങ്ങളിലെ പ്രശ്നമെന്ന പൊതുവായ ധാരണക്ക് അന്ത്യമാകുന്ന തരത്തിലാണ് ഗ്രാമപ്രദേശങ്ങളിലും മയക്കുമരുന്ന് വ്യാപകമായി കടന്നു കയറുന്നത്. അതിരുകടന്ന് വ്യാപാരശൃംഖലകള്‍ പടര്‍ത്തിയ ലഹരി സംഘം, പട്ടണത്തിനകത്തേക്ക് മാത്രം പരിധിപെടുത്താതെ ഗ്രാമീണ മേഖലകളെയും കേന്ദ്രീകരിച്ച് പ്രവര്‍ത്തിക്കുന്നതായി അടുത്തിടെ നടന്ന ലഹരിവേട്ടകള്‍ വ്യക്തമാക്കുന്നു.
വ്യത്യസ്ത സ്ഥലങ്ങളില്‍ നടന്ന പരിശോധനകളില്‍ പിടിയിലായവരില്‍ ഭൂരിഭാഗവും നഗരപരിധിക്ക് പുറത്തുനിന്നുള്ളവരാണെന്നതും ഈ അവസ്ഥയെ കൂടുതല്‍ ഭീതിജനകമാക്കുന്നു. ചെറുപ്പക്കാരായ യുവാക്കളും വിദ്യാര്‍ത്ഥികളുമടക്കം പലരും ലഹരിക്കുരുക്കില്‍ അകപ്പെടുന്നുവെന്ന റിപ്പോര്‍ട്ടുകളും അന്വേഷണ സംഘങ്ങള്‍ക്ക് മുന്നില്‍ ഗൗരവമായ വെല്ലുവിളി ഉയര്‍ത്തുന്നുണ്ട്. നിരവധി ഗ്രാമപ്രദേശങ്ങളിലേക്കും ഈ ആസക്തി പടര്‍ന്നു പന്തലിക്കുമ്പോള്‍, അതിനോട് പ്രതികരിക്കേണ്ട സാഹചര്യമുണ്ടെന്ന് അന്വേഷണ ഉദ്യോഗസ്ഥര്‍ വ്യക്തമാക്കുന്നു.
രണ്ടാഴ്ചയ്ക്കിടെ സംസ്ഥാനത്ത് 1.664 കിലോഗ്രാം എംഡിഎംഎയാണ് പോലീസ് പിടികൂടിയത്. ഇതില്‍ 400 ഗ്രാമോളം നഗരപരിധിക്കു പുറത്തുനിന്നാണ് പിടികൂടിയത്. 180 കിലോ കഞ്ചാവ് പിടികൂടിയതിലും പകുതിയിലധികവും നഗരപ്രദേശത്തിന് പുറത്തുനിന്നാണ്. തൃശ്ശൂര്‍ നഗരത്തിന് പുറത്തുനിന്നുമാത്രം രണ്ടാഴ്ചയ്ക്കിടെ 28 കിലോഗ്രാം കഞ്ചാവാണ് പിടികൂടിയത്.
കോഴിക്കോട് റൂറല്‍ പ്രദേശത്തുനിന്ന് മൂന്നുകിലോയോളം കഞ്ചാവും പോലീസിന്റെ ഡി-ഹണ്ടിന്റെ ഭാഗമായി പിടികൂടി. ചിലതരം ലഹരിഗുളികകള്‍, ഹെറോയിന്‍, ബ്രൗണ്‍ഷുഗര്‍ എന്നിവയും നഗരപരിധിക്ക് പുറത്തുനിന്ന് പിടിച്ചെടുത്തവയില്‍ ഉള്‍പ്പെടുന്നു. മാര്‍ച്ച് ആദ്യ ആഴ്ചയില്‍ നടത്തിയ പോലീസ് റെയ്ഡില്‍ 266 പേരാണ് അറസ്റ്റിലായത്.
തിരുവനന്തപുരത്ത് അറസ്റ്റിലായ 49 പേരില്‍ 43 പേരും നഗരപരിധിക്ക് പുറത്തുനിന്നാണ് പിടിയിലായത്. എറണാകുളം, കോഴിക്കോട്, കണ്ണൂര്‍, കൊല്ലം ജില്ലകളില്‍ ലഹരിവസ്തുക്കള്‍ വിതരണംചെയ്തതിനും വില്‍പ്പനനടത്തിയതിനും കൂടുതല്‍പ്പേര്‍ അറസ്റ്റിലായതും നഗരത്തിനു പുറത്തുനിന്നാണ്.