കൈയില്‍ കത്തിയെടുത്ത് വെട്ടാന്‍ ഓങ്ങുമ്പോള്‍ 'അച്ഛാ' എന്ന് കുട്ടി കരഞ്ഞ് വിളിക്കുന്നുണ്ട്; മുടിയില്‍ പിടിച്ച് കുട്ടിയെ നിലത്തടിക്കുന്നതും ചുമരിലിടിക്കുന്നതും വലിച്ചെറിയുന്നതും ദൃശ്യങ്ങളില്‍; 'എന്നെ തല്ലല്ലേ' എന്നും കുട്ടി പറയുന്നു; 'അമ്മേ പേടിയാകുന്നു, ഒന്ന് വാ' എന്ന് വീഡിയോയില്‍ കുട്ടികള്‍ പറയുന്നുണ്ട്; വീഡിയോ പ്രാങ്കെങ്കിലും വിനായാകും; കുട്ടികളെ ദുരുപയോഗം ചെയ്യുന്നതും തെറ്റ്; മാമച്ചന്‍ കുടുങ്ങുമ്പോള്‍
കണ്ണൂര്‍: എട്ടുവയസുകാരിയെ പിതാവ് അതിക്രൂരമായി മര്‍ദിക്കുന്നതായുള്ള ദൃശ്യം പ്രചരിക്കുമ്പോള്‍ നടപടിയുമായി പോലീസ്. കണ്ണൂര്‍ ചെറുപുഴയിലാണ് സംഭവം. മലാങ്കടവ് സ്വദേശിയായ മാമച്ചന്‍, മകളെ അതിക്രൂരമായി മര്‍ദിക്കുന്നതിന്റെ ദൃശ്യങ്ങളാണ് പ്രചരിക്കുന്നത്. എന്നാല്‍ ഇത് പ്രാങ്ക് വീഡിയോയാണെന്നാണ് കുട്ടികള്‍ പോലീസിന് നല്‍കിയിരിക്കുന്ന മൊഴി. മാമച്ചനുമായി അകന്നു കഴിയുന്ന ഭാര്യ തിരിച്ചുവരാനായി പ്രാങ്ക് വീഡിയോ ചെയ്തതാണെന്നാണ് പറയുന്നത്. പ്രാങ്കാണെങ്കില്‍ പോലും കേസെടുക്കേണ്ട സ്ഥിതിയാണ് ഉള്ളത്. കുട്ടികളെ ദുരുപയോഗപ്പെടുത്തിയെന്നതും ഗുരുതര ആരോപണമാണ്.
ഈ സാഹചര്യത്തിലാണ് പിതാവിനെ പൊലിസ് കസ്റ്റഡിയിലെടുത്തത്. കാസര്‍കോട് ജില്ലയിലെ ചിറ്റാരിക്കല്‍ സ്വദേശി ജോസിനെയാണ് പൊലീസ് കസ്റ്റഡിയിലെടുത്തത്. ജോസിനെ മാമച്ചന്‍ എന്നാണ് നാട്ടുകാര്‍ വിളിക്കുന്നത്. ജോസിനെതിരെ കേസെടുക്കാന്‍ ജില്ലാ പൊലീസ് മേധാവി അനൂജ് പലിവാള്‍ ഐപിഎസ് ചെറുപുഴ പൊലീസിന് നിര്‍ദേശം നല്‍കിയതിന് പിന്നാലെയാണ് നടപടി. അടിയന്തിരമായി കേസെടുക്കുമെന്ന് കണ്ണൂര്‍ റൂറല്‍ പൊലീസ് കമ്മീഷണര്‍ മാധ്യമങ്ങളോട് പറഞ്ഞു. പിതാവ് മകളെ അതിക്രൂരമായി മര്‍ദ്ധിക്കുന്ന ദൃശ്യങ്ങള്‍ നേരത്തെ സോഷ്യല്‍ മീഡിയയിലൂടെ പ്രചരിച്ചിരുന്നു.
മകളെ പിതാവ് ക്രൂരമായി മര്‍ദിക്കുകയും അരിവാളിന് വെട്ടാനോങ്ങുകയും ചെയ്യുന്ന വീഡിയോ ശ്രദ്ധയില്‍പ്പെട്ടിട്ടും കേസെടുക്കാതിരുന്ന ചെറുപുഴ പൊലീസ് നടപടിക്കെതിരെ വിമര്‍ശനം ഉയര്‍ന്നിരുന്നു. കുട്ടിയുടെ വീട്ടിലേക്ക് അടിയന്തിരമായി എത്താന്‍ ചൈല്‍ഡ് ലൈന്‍ പ്രവര്‍ത്തകരോട് ബാലാവകാശ കമ്മീഷന്‍ നിര്‍ദേശം നല്‍കി. സംഭവത്തില്‍ ബാലാവകാശകമ്മീഷന്‍ ചെയര്‍പേഴ്സണ്‍ കെ വി മനോജ് പൊലീസില്‍ നിന്നും റിപ്പോര്‍ട്ട് തേടിയിട്ടുണ്ട്. കണ്ണൂര്‍ ജില്ലയിലെ മലയോര പ്രദേശമായ ചെറുപുഴയില്‍ വാടക വീടെടുത്ത് താമസിച്ചുവരികയാണ് ജോസ്.
അതേസമയം മാറിത്താമസിക്കുന്ന അമ്മയെ തിരികെ കൊണ്ടുവരാനുള്ള പ്രാങ്ക് വീഡിയോ ആണെന്നാണ് പിതാവിന്റെ വിശദീകരണം. ഇത് വിശ്വസിച്ചായിരുന്നു പൊലീസ് കേസെടുക്കല്‍ നടപടി വൈകിച്ചത്. എന്നാല്‍ ഇതൊരു പ്രാങ്ക് വീഡിയോ അല്ലെന്ന് പൊലിസ് പിന്നീട് നടത്തിയ അന്വേഷണത്തില്‍ കണ്ടെത്തിയിരുന്നു തല്ലരുതെന്ന് കുഞ്ഞ് ആവര്‍ത്തിച്ച് ആവശ്യപ്പെടുന്നത് വീഡിയോയില്‍ കേള്‍ക്കാം. സംഭവം വിവാദമായതിനെ തുടര്‍ന്നാണ് പൊലിസ് നടപടിയുമായി രംഗത്തുവന്നത്. പ്രതിയുടെ അറസ്റ്റ് ചോദ്യം ചെയ്തതിന് ശേഷം രേഖപ്പെടുത്തുമെന്ന് പൊലിസ് അറിയിച്ചു.
ദൃശ്യങ്ങള്‍ വ്യാപകമായി പ്രചരിച്ചതോടെ പോലീസ് ഇടപെട്ടിരുന്നു. ഈ സമയത്താണ് ചെറുപുഴ പോലീസിനോട് ഇത് പ്രാങ്ക് വീഡിയോ ആണെന്ന് കുട്ടികള്‍ മൊഴി നല്‍കിയത്. മാമച്ചനും ഭാര്യയും ഏറെക്കാലമായി അകന്നു കഴിയുകയാണെന്നാണ് വിവരം. മാതാവ് വീഡിയോ കണ്ട് വീട്ടിലേക്ക് തിരിച്ചു വരാന്‍ വേണ്ടിയാണ് പ്രാങ്ക് വീഡിയോ ചെയ്തതെന്നാണ് കുട്ടികളുടെ മൊഴിയില്‍ പറയുന്നത്.
കൈയില്‍ കത്തിയെടുത്ത് വെട്ടാന്‍ ഓങ്ങുമ്പോള്‍ 'അച്ഛാ' എന്ന് കുട്ടി കരഞ്ഞ് വിളിക്കുന്നുണ്ട്. മുടിയില്‍ പിടിച്ച് കുട്ടിയെ നിലത്തടിക്കുന്നതും ചുമരിലിടിക്കുന്നതും വലിച്ചെറിയുന്നതും ദൃശ്യങ്ങളില്‍ കാണാം. 'എന്നെ തല്ലല്ലേ' എന്നും കുട്ടി പറയുന്നു. 'അമ്മേ പേടിയാകുന്നു, ഒന്ന് വാ' എന്ന് വീഡിയോയില്‍ കുട്ടികള്‍ പറയുന്നതും ദൃശ്യങ്ങളില്‍ കേള്‍ക്കാം. ഇതുകൊണ്ട് തന്നെ ഇതിനൊരു പ്രാങ്ക് സ്വഭാവമുണ്ട്. അമ്മയെ വരുത്താനുള്ള തന്ത്രമായി വേണമെങ്കില്‍ വിലയിരുത്താം. എന്നാല്‍ കുട്ടികളെ ഉപയോഗിച്ച് പ്രാങ്ക് വീഡിയോ എടുക്കുന്നതും കുറ്റമാണ്. ഈ സാഹചര്യത്തില്‍ മാമച്ചന്‍ കുടുങ്ങും.